نوارة نجم: 27 مايو ... للتوضيح
والنبي الله يكرمكم نركز.. ونحاول نجمع الصفوف، احنا ما اتاكلناش على قفانا كده الا لما اتفرقنا وبقى اليساريين والليبراليين يشتموا في الاخوان والاخوان يغطسوا ويروحوا يجيبوا ورقة بوستة والسلفيين والمسيحيين يقعوا في بعض والدنيا تشرذمت خالص
صلوا ع النبي كده وموسى نبي عيسى نبي محمد نبي وكل من له نبي يصلي عليه
وبحق من قال لموج البحر يهتدي، لتقولوا يا عزيز
انا مش شايفة الناس مختلفة على الاهداف، انا شايفاهم مختلفين على الحلول
والاختلاف على الحلول مش مشكلة... فيه حل كلنا مجمعين عليه اللي هو وقفتنا في الميدان
اللي بيقول تأجيل الانتخابات ده عيل ساقط وعايز يأجل الامتحان
واللي عايز مجلس رئاسي كفران زيي، بس مش لازم يجبر الناس توافق معاه على حاجة هم مش عايزينها، خلاص يا شباب، ننزل على الاجماع واللي يحب البلد اكتر ييجي على نفسه
واللي بيتحجج انه مش نازل عشان اللي بيقولوا تأجيل الانتخابات ومجلس رئاسي بيناقد نفسه، وبيشتغلنا بصراحة، لأنه في نفس الجملة بيقول الاغلبية مش عايزة كده، طيب يا عم انت الاغلبية، ما تنزل تاكل الميدان لصالحك، انت حتشتغلنا؟
الله.. جرا ايه؟ ما نزلتوا اليوم اللي ظباط التحرير نزلوا فيه وكان فيه ناس بتقول نازلين نسقط المشير ولما انتوا نزلتوا الميدان اتاكل لصالحكم وبتوع يثقط المثير دول بقوا نملة في غيط
من بات في بيته سلم اصحابه
حد مختلف على ان مبارك وحاشيته لازم يتحاكموا؟ ومش بس يتحاكموا على الفلوس يتحاكموا على الدم؟
حد مختلف ان فيه حاجة مش تمام بتحصل وانهم بيتسرسبوا الواحد ورا التاني؟
حد مختلف ان دول لو خرجوا حيبقى نهارهم نادي ونهارنا احنا اللي مش باين؟
حد مختلف على ان التهديد بالازمة الاقتصادية لوي دراع وان مصر فيها اقتصاديين عباقرة يحلوا الازمة الاقتصادية دي في يوم ونص؟
حد مختلف على ان التحجج بالازمة الاقتصادية لعدم محاسبة رجال الاعمال الفاسدين ورجال الوطني حجة مش مقبولة؟
حد مختلف على حد ادنى واقصى للاجور؟
حد مختلف على ان ما ينفعش شباب طاهر ونقي يتقدم لمحاكمة عسكرية في نفس الوقت اللي الجمل بيدعو فيه للمصالحة مع الحرامية؟
حد مختلف على ان الجمل لازم يمشي امبارح؟
حد مختلف على ان عمر سليمان بيلعب في اساسنا بالفتن الطائفية ولازم يتجاب؟
حد مختلف على ان عودة امن الدولة بالشكل ده مش مقبولة وانهم لازم يبقوا تحت اشراف قضائي وحقوقي؟
حد مختلف على ان الشرطة عاد لينتقم.. واذا كان على الشرطة امرها سهل تنضرب تاني مدام بقت مدمنة ضرب، لكن ينفع الجيش يكتفنا للشرطة، خلاص.. الجيش يخلي بينا وبين الشرطة ولا يتدخل لا لصالحنا ولا لصالحهم، واحنا نتصرف معاهم، لكن ظابط شرطة يقول لظابط جيش قدام العيال بتوع السفارة: انا جاي اخد تاري؟ الله الله الله.. هي بقت كده؟
من هنا ليوم الجمعة ممنوع الآتي:
1- الخلاف والشقاق
2- الاتهام والتخوين
3- طرح قضايا خلافية
كل واحد حييجي على نفسه عشان اخوه، المهم نرجع الميدان رجعة قوية ويبقى شكلنا محترم
المجانين يمتنعون.. المهم وحدة الصف
الاندال يتنحررون.. عشان وكتاب الله المجيد انتوا اول الناس حتندبحوا، لايموها بقى، بقاء المجانين كمعارضة في مصلحة النظام القديم اللي بيعيد انتاج نفسه لانهم اساسا تغور المعارضة من وشهم، الناس بتكرههم وما بيعرفوش يكسبوا الشارع، بالعكس، كل لما يتبنوا قضية الناس تكرهها كأنهم ثورة مضادة على نفسهم، الناس كرهت العمال من وشهم، وكرهت البرادعي من وشهم، وكرهت الديمقراطية من وشهم، وكل ما يحطوا صباعهم في حاجة يكرهوا الناس فيها.. بالصلاة ع النبي، عاملين زي مبارك ربنا مسلط عليهم نفسهم
فدول مافيش اي خطر عليهم، حيتسابوا يعني، عشان النظام القديم الجديد يشاور عليهم ويقول: لو عارضت حتبقى زي عمو الجرسون
انما اللي بيعرف يكسب الشارع هو ده اللي حيندبح، وحتبقى مدبحة تاريخية، ومدبحة بتشويه، ومش بعيد يطلعوكوا عملاء وجواسيس وقرف.. لايموها بقى، بلاش غباء
مافيش داعي للندالة
انت بتستندل مع نفسك كده