الموضوع: ياحبيبي ياغنيم ماخيبتش توقعاتي فيك كانت واضحة زي الشمس

فعلا انا شايف انه تناقض واضح
اتهمو الرئيس السابق انه عميل للامريكان
و ها هو قائد من قوات الثورة صناعة امريكية قبل الثورة و مستمر ايضا بعد الثورة
مش هيا دي امريكا اللي بتستحل دم الابرياء في العراق و افغانستان و هيا ايضا اللي بسبب الفيتو بتاعها فلسطين متشحططة مع اسرائيل في مجلس الامن طوال سنوات و سنوات و هيا دي امريكا اللي بتعلن دائما و ابدا وقوفها مع اسرائيل و مساندتها سواء معتدية او مجرمة او سارقة او او او
هيا مش دي امريكا اللي كانت دائما ضد العرب و يا ما اتهم مبارك بأنه لا يستطيع ان يرد لهم طلب
انا و الله مستغرب ( ايه اللي جاب القلعة جانب البحر )
هتجننونا ارحمونا يا متناقضين الاراء

م.حاتم السباعي

المشاركة الأصلية كتبت بواسطة otefa

بالظبط كده أزدواجية في التقييم وفقا للعواطف بس فيه حاجة غامضة برضه في توقيت الجائزة والأعلان عنها ياترى أيه الهدف ياهندسة!

فعلا يا هندسة
الموضوع مش انتقاد للاخ وائل و لا ربيع
لا الموضوع اكبر من كده بكتير
انا مثلا هنا علي نفس صفحات منتدانا الجميل انتقدت حركة حماس حينما كانت تتهم فتح بالعمالة و الخيانة اثناء تولي فتح للحكم لمجرد ان فتح كانت تعقد اتفاقات و قف اطلاق نار من طرف الفلسطينين بأتجاه اسرائيل لفتح المعابر مثلا او لعدم وقف الحال في القطاع او للحفاظ فترة علي حالة هدوء و لا نجد الا التخوين و التجريم و الانتقاد من حماس لهم حينما كانو يطلبو منهم وقف اطلاق الصواريخ
و سبحان مغير الاحوال تمر الايام و تنتزع حماس حكم غزة منفردة و تنضرب غزة و يجدو انفسهم مطلوب منهم نفس ما كانو يطالبو به فتح من توفير غذاء و دواء و كساء و عمل للشباب فأذا بهم يضطرو للتفاوض مع المحتل فيقول لهم لا تفاوض الا بعد وقف الصواريخ بتاعة لعب الاطفال تجاهنا فتصدر حماس منشور و تهدد كل الكتائب من الجهاد و فتح و عز الدين القسام و هم بالطبع اوامر مشددة بعدم اطلاق الصواريخ تجاه العدو الاسرائيلي مش غريبة دي
و موضوع اخر
تجد بعض الشويخ مثلا يقف معتلي ممبر المسجد و ينادي بتعدد الزوجات و ان علي من يعدد ان يراعي الله في العدل بينهم و يشدد علي الاسراع بزواج الارامل و العازبات و هكذا و هو نفسه متزوج اتنين او 3 او 4 و حتي الان بارك الله فيه و اكيد ربنا سيكرمه و يجازيه خيرا علي ذلك اذا عدل بينهم
و العجيب بقي و اللي يموتك من الضيق انك تجد نفس هذا الرجل مرت عليه الايام و اذا به يطلق بنته من زوجها بسبب ان زوجها من تلاميذه و عاوز يطبق ما تعلمه من الشيخ طوال السنوات الماضية و يعدد
فيقول له الشيخ هوه كل الرجال يبني زي الرسول او الصحابة لا العهد ده انتهي خلاص متصدقش ده هم كبير ابعد عنه احسن و الله اطلقها منك
اليس كل هذا تناقض صريح
طبعا انا ضربت امثلة من مواقف تمثل لي شئ في حياتي فأنا مؤيد لحركة حماس في حقها في الدفاع عن بلدها و اعلم انهم عارفين اسرائيل كويس و عارفين انهم ناس ليس لهم عهد و لا زمة و كانو دائما لا يصدقوهم قبل ان يتصدو للحكم و لكن تغيرت مفاهيم بعضهم اضطرارا لما فرضته عليهم المواقف و لم يقدمو الاعذار لغيرهم حينما واجهو نفس المواقف
و كذلك الشيخ اللي اعطي لنفسه حق منعه عن غيره
و لذا انتقدت و ائل و غيره ممن يرتمو في حضن اعداء الامة و هم من قبل جرمو شخص كان مرمي تحت ارجلهم

م.حاتم السباعي