بسم الله الرحمن الرحيم
السلام عليكم و رحمة الله و بركاته

بعد ما شوفت امبارح الجيب الجديدة بتاعت الشرطة في روكسي و الحملة اللي عملوها لتطهير روكسي من سوق العتبة اللي كان فيه

و بعد كلام و خناق مع ضميري

قررت اكبسه لتاني مرة و اخد الالتو حبيبتي و الكاميرا
و انزل روكسي عشان اجيبلكم صور الجيب و صور الحملة الشرطية الرهيبة اللي حصلت

المهم توكلت ع الله و نزلت

و جيت من طريق السويس و عند الهيئة العربية للتصنيع و انا ماشي ع 100 لقيت عربية بيضا واقفة شكيت فيها فهديت وصلت لــ 90 و بعد ما عديت حمدت ربنا اني قللت السرعة لأن اللي كان مستخبي قدامها طلع رادار
يا ابن الايه الشرطة هتبتدي الحركات النص كوم ديه تاني و في مكان غير متوقع بالمرة
لقيت ضميري اللمض بيقولي ( يا ريتك فضلت ماشي ع 100 و كنت تتلقط عشان افرح فيك .... اخرس ياض مش ناقصاك في اول النزولة كده )
هي شكلها نزولة منيلة من اولها ردار اومال كمان كام متر هلاقي لجان
المهم حمدت ربنا اني قللت لأني اساسا مغير العجل و العجل اكبر من القديم يعني كان هيلقطني فوق ال100

كملت الطريق و الطريق الحمد الله مقولكوش فاضي لدرجة مرعبة لدرجة انك متعرفش تلف الدريكسيون درجة

وصلت لنفق الثورة اللي بقي اجدع من سوق العتبة في مجده بالرسوم اللي عليه و هيئة المجاري شغالين في الارض والناس ماشية بتتفرج كأنه حاجة اوريجنيال خالص
و كان ناقص اللي في العربية اللي جنبي تطلع تقول ( اوه لالا ) oh La la بالفرنساوي يعني ( انت امتي خدت فرنساوي يا أكسل ... ايه يا عم ده من رابعة ابتدائي و ارحمني بقي مش كفاية موضوع الفتيس هتقرفني هنا )

خلصت من نفق الثورة بعد عذاب مرعب و حسيت ان العربية هتكح من كتر الخنقة و ساعتها ضميري غلس عليا و قالي ( في صيدلية بعد النفق انزل جيبلها دوا كحة ) طبعا كنت هنزل احط ضميري تحت العجل بس مسكت نفسي عشان عشرة العمر برده متهونش الا علي الكتاكيت

عديت الكوربة و وصلت عند القصر الجمهوري و لقيت شوية عيال صغيرة بتتلامض مع الشرطة اللي بتحرس القصر (ده انتو عيال تيييييت تربتتيييت...عيب ياض )

وصلت للاشارة اللي عند الامفتريون و مقولكوش عسكري و امين شرطة و كل الاتجاهات داخلة في بعض راح العسكري وقف بتفرج و امين الشرطة عمال يروح من هنا لهنا يسلك ديه ديه تتسد يروح يسلكها التانية تتسد ديه لو شبكة مجاري المطرية مش هتقرفه كده الراجل بقي في دوامة و حسيت انه هيرمي الجهاز و دفتر المخالفات و يقولهم غوروا يا عالم يا تيييت

الحمد الله بعد ربع ساعة سلكت المهم لسه عند عمر افندي و لقيت عربيتين شرطة عسكرية وبينهم نجدة و بيجروا لما سلكت و الانذار ( وي وا وي وا وي وا ... بس ياض مش ناقصة صداع .... في ايه يا أكسل ده انا ضميرك يا جدع سيبني افرفر عن نفسي شوية ) ما علينا من ضميري

و انا شوفتهم بيجروا من هنا و لطمت من هنا قولت انا ايه اللي نزلني لازم تاخدني الجلالة اوي و انزل اصور هي باينة من اولها رادارة مستخبي ورا عربية قولت يلا خليها ع الله و كملت

وصلت عند الجنينة اللي قدام عمر افندي ابو كام دور ده و اول ما وصلت هناك استعديت عشان اطلع الكاميرا و اصور الجيب بتاعت الشرطة و اوريكم ثورة الظابط اللي حصلت هناك و رتب واقفة
المهم طلعت الكاميرا عشان اصور مفيش الكاميرا مش عايزة تتفتح يادي النيلة افتحتي يا منيلة ع عينك مفيش ضربتها و عاتبتها مفيش فايدة طب مش هشحنك تاني لو مفتحتيش مفيش برده

فوجئت بذكاء رهيب مني اني نسيت البطارية بتتشحن في البيت و نزلت
لقيت ضميري بيقولي ( احسن احسن احسن فرحان فيك فرحان فيك ....اسكت ياض مش ناقصاك بدل ما اخليهم يحبسوك )

يعني يا ربي بعد كل العذاب ده مفيش حتي صورة واحدة

قولت يلا مفيش نصيب
من كتر قر ضميري معرفتش حتي القط صورة

بالنسبة لهناك بقي الحملة شديدة جدااا من الشرطة ظباط هناك زي النمل من كل الرتب من عسكري لحد فوق و كلهم ماكسين المعادي و البطنجات و الكلبشات ماشية بتلمع في الاحزمة بتاعتهم شكلها لسه طالعة من عند الحداد
و كل ده بالاضافة لــ2 جيب واحدة قديمة و واحدة الجديدة نوفي اللي شوفتها امبارح معبيين شرطة
غير البوكسات المعتادة و عربيات النجدة وعربية نقل مساجين غير الموتسيكلات يعني الواحد ميعرفش يمشي من كترهم هناك غير الشرطة العسكرية
و طبعا انا شوفت من هنا و قلبي و عيني كانوا بينطوا من هنا زي كارتون توم و جيري من الفرحة الشرطة نزلت هيييه الشرطة نزلت هيييه و قعدت اسقف و منورين الشارع يا رجالة لدرجة ان في كام واحد شكلهم متشرد واقفين بقي يبصولي بقرف و حاسس انهم عايزين يقولولي فرحان في ايه يا تيت
المهم الشرطة قامت بالواجب مع سوق العتبة اللي كان الباعة الجائلين فاتحينه هناك و مفيش نفر واحد واقف بحتة قماشة حتي

وصلت بقي للاشارة بتاعت روكسي عشان اطبق نظرية علاء ولي الدين الله يرحمه في فيلم الناظر
لما الانجليز جريوا وراهم في المظاهرة

لف و ارجع تاني لف و ارجع تاني لف و ارجع تاني
يا سلام يا سلام يا سلام

وقفت في الاشارة استغربت لقيت حملة ظابط هناك تانية خالص و الموتسيكلات و كله بيشوف شغله بهمة و نشاط قولت اده ده في امل
لقيت ضميري بيتلامض و يقولي ( لأ في عمر يا ظريف ...ماشي يا عم متشكرين )

المهم لقيت واحد مفيييم دارك بلاك يا نهار الوان امين الشرطة رايحله قولت بس خلاص الراجل ده هيتقفش و انسي ع كده و غميت عيني عشان مشوفش المنظر و انا مقهور ع الفيمية اللي هيروح
بشيل ايدي من ع عيني
لقيت امين الشرطة بيقوله نزل الازاز كله عشان الفيمية

نعم !!!!!!!!!!!



نزل الازاز عشان الفيمية خدتني الجلالة اشمعني يعني الواحد قارف نفسه في الشمس و مش عايز يحط فيميه و انت بكل بساطة تقوله نزله
عليا النعمة هركب فيميه من بكرة

و لفيت و رجعت و اتفرجت ع الحملة اللي قولتلكم عليها
و الناس كلها بتبص و بانبهار للجيب و بيشاوروا عليها
ياااه فكروني بعربيات الشرطة زمان في التمنينات مع اني مكنتش اوعي عليها بس كنت بشوفهم في التلفزيون

و رجعت البيت و انا في قمة القهرة و الحسرة و الشلل
اني بعد كل العذاب ده معرفتش اخد صورة واحدة
عشان افرجكم ع الحملة الرهيبة ديه



و توتة توتة خلصت الحدوتة
حد يسلفني 3 جنيه بقي لأخر الشهر
هههههههههه