موضوع جميل جدا واسلوب راقى فى الشرح

وربنا يدينا طول العمر لحد ما نشوفه اتحقق فعلا

انا من الناس اللى عندى مشكله مش مع الاسلام ولا الجماعات الاسلاميه

انا عندى مشكله واحده بتضايقنى جدا جدا وهى اسلوب بعض الاشخاص فى الحجر على الرأى الاخر

يعنى طول الوقت هتلاقى ناس بتشرح وتحاور بأسلوب كويس زى حضرتك

وناس تانيه ماشيه بمبداء لا تجادل ولا تناقش

بمعنى انى اخاف من تحميل الدين بأكثر مما فيه

زى ما اكيد حضرتك ملاحظ ان فيه ناس بتدخل امور دنيويه كتيره فى الموضوع وغالبا سياسيه

وبسرعه بيتهموا اى حد معارض لهم بأنه لا دينى او علمانى او ملحد رغم ان الموضوع ملوش اى علاقه بالدين

انا الحمد لله مسلم ملتزم بشكل معقول عندى اخطاء زى اى حد من البشر

مليش اى اتجاهات سياسيه لا يمينى ولا يسارى ولا اخوانى ولا عمرى اتكلمت فى السياسه

بس من حقى افكر واختار

بيقابلنى ناس بتتهمنى بحاجات انا برىء منها وناس بترمى كلام جارح واتهامات فى دينى لمجرد رأى فى حال البلد رغم ان الموضوع بعيد عن الدين

بحب جدا اسمع للشيخ محمد حسان ومحمد حسين يعقوب بس مبقدسهمش

ومن حقى لو عالم غلط وخاصه لو الموضوع خارج الدين اقول انا رأيى انه غلطان الاقى ناس بتتهمنى فى دينى

من حقى لما ابقى بصلى فى الجامع وشيخ الجامع فى الخطبه يقول ان اللى هيقول لاء ده عاوز الزنا والشذوذ وقفل الجوامع اقوله انت غلطان ويسمعنى ويفهمنى لانه فعلا غلطان وانا ليا رأى مش مضحوك عليا

يعنى فى الاخر انا من حقى اخاف من الاستخدام الخاطىء للدين فى امور شخصيه

واننا نوصل لمرحله نفس اللى وصلت ليها اوروبا فى العصور اللى حكمت فيها الكنيسه

انا رأيى الشخصى ان الحل الامثل هو بالدوله التى تطبق قواعد الاسلام لكن مختلف فى الطريقه

انا شايف ان الاسلاميين او علماء الاسلام يبدأوا بمحاوله تقريب الناس من دينهم اولا وتقريب وجهات النظر وشرح تعاليم الاسلام وسماحته

وفى نفس الوقت ابعاد المتشددين اللى اوقات كتير بتشوه صوره الاسلام والرقابه على الدعاه والمتحدثين باسم الاسلام والتنبيه عليهم بعدم التدخل فى الامور الدنيويه محل الخلاف الا عن فهم
وعدم ربطها بالدين طالما فعلا غير مرتبطه به (فهم اعلم بامور دنياهم)


والاهم اعتبار ان صاحب الرأى الاخر على حق فى رأيه وحتى لو خاطىء فهو مسلم مخطىء مش عاصى وكافر وملحد وعلمانى

وان شاء الله بعد وصولنا للمرحله دى هنلاقى كل الناس حتى غير المسلمين بيطالبوا بتطبيق الشريعه الاسلاميه