أحبائي اعضاء قسم نيسان
احب اني اعرض عليكم تجربتي في موردن موتورز ابورواش امبارح و عايز اعرف أرائكم و اللي انا عملتوا ده ايه رأيكوا فيه.
روحت امبارح مركز مودرن ابورواش عشان عندي شوية مشاكل في العربية و قولت بالمرة اعمل صيانة 25000 رغم اني كنت شايف انها مش مهمة اوي لكن قولت مفيش مشكلة.
طبعا كالعادة لما اكون رايح المركز بكون مجمع المشاكل اللي موجهاني في العربية و بكتبها علي ورقة بالكمبيوتر و اخلي نسخة معايا و نسخة مع المهندس المسئول
و كانت المشاكل :
1- يوجد خبط تركات بالمساعدين الاماميين و خصوصا عند المطبات
2- خبط بالفرامل الخلفية عند رفع الارجل من علي دواسة الفرامل
3- الهاندبريك خفيف عند رفعه مع عدد تكات اكتر
4- الباب الامامي يمين لم يغلق بسهولة و ارجح رفعه قليلا ً
المهم روحت للمهندس و بقوله علي المشاكل ديه لأقيته بيقولي انك كده هتدفع ثمن مصنعية المشاكل ديه لأنها خارج الصيانة و المفروض انك بتعمل الحاجات ديه في صيانة العشرات
فطبعا ساعتها اتدايقت جدا و قولتله ازاي يبقي عندي مشكلة في العربية و ان داخل الضمان و ادفع كمان مصنعية انا دفعتها قبل كده في صيانة العشرين الف
المهم من هنا و من هنا قولتله خلاص الغي صيانة الـ 25000 انا مش هعمها و كمان انا هروح السبع و هناك بيحلوا كل المشاكل ديه في اي وقت انما كده انا مش هدفع حاجه و انا في الضمان
طبعا الموضوع اتصعد بفضل اخويا الحبيب احمد مصطفي اللي دايما بصماته الجميلة بتكون معانا في اي مكان و دايما بتعبه معايا في كل حاجه كده خاصة بالعربية
جه المهندس الجميل الذوق عبدالجواد اللي بشكره علي محبته الواسعه
قام بدوره و صعده مدير الشركة و قاله اني ادفع المصنعيه بخصم كويس علشان ده سيستم التوكيل
فبكده اصبح مصنعية النقطه رقم "1" بتاعة المساعدين 50 جنيه لأنهم بيفكوهم و بيشوفوا فيهم ايه و فعلا المهندس قال انهم كانوا محتاجين صنفرة في مكان معين عشان الاستهلاك و فعلا المساعدين بقوا افضل كتير
و بالنسبة للنقطة رقم "2" و رقم "3" بتاعة الفرامل تم فك الطنابير و تم تشحيم كامل للفرامل و بكد الصوت مبقاش موجود خالص و بعد الخصم كلف 80 جنيه
بالنسبة للنقطة "4" المهندس رفع الباب بإيده شوية و بقي بيقفل عادي بدون مشاكل
طبعا انا من بره القاهرة خالص و كده يعتبر دفعت مصنعيات 130 جنيه .. انا حسبتها بصراحة و قولت اني لو كنت عملت الصيانة كانت هتكلف 75 جنيه و لو كنت سيبت التوكيل و حجزت ميعاد في السبع كان هيكلفني مشاويير و اجازات و بنزين .. فقولت كأني روحت السبع و حصل كل ده بـ 55 جنيه
فأنا كنت مبسوط و قولت مفيش مشكلة و برده اهوه الواحد مش بيتعلم ببلاش
ركبت هناك بقي قوجات تايواني عاملة 700 جنيه بصراحة يا جماعة الفوجات هي الاصلي بالظبط و خطيرة و ده لأن في فوج صيني عندي اتكسر و لما ركبت التايواني في التوكيل فرق شاسع جدا جدا جدا بين الاتنين و نوره مفروش علي الارض و قوي كمان لدرجة اني منورتش كتير النور العادي في الطريق و انا راجع
دي كانت تجربتي في مودرن ابورواش امبارح و مستني ارائكم ....
المفضلات