تقرير عن اللوجان بعد 3500 كيلو تقرير شامل ( الكل يدخل )

**elshaky** · 27-05-2011 04:46 PM

بسم الله الرحمن الرحيم

اولا هنبدأ بالشكل الخارجى : الشكل يوحى بانه سياره معلومه الابعاد وليس بها اى تصميم فنى وشكل غير شبابى ( عائليه 100/100 )

ثانيا : داخل العربيه : اول ما تقعد فى العربيه مش هتشعر بفخامه لكن ستشعر بأنك راكب عربيه اوروبى وهذا اعلى من انك تجد السياره فخمه لكن السياره تصميمها جميل من الداخل و من الوهله الاولى تجد اماكن الزجاج والكلاكس مش طبيعين لكن مع التعود هتلاقى الدنيا بقت جميله جدا جدا ( وهتكلم ليه اتصممت العربيه كده )

نبدأ ندور العربيه : هتلاقى صوت الماتور عالى نسبيا لكن ليس مزعج وانما صوت ناعم الى حد كبير نسيب العربيه تسخن فجأه تلاقى العربيه صوتها بيختفى وياسلام لو قافل الازاز مش هتحس بحاجه بره خالص انا اول مره اشوف عربيه فى الفئه دى عزلها جميل كده انا ركبت الالنترا عزلها مش كده خالص ااقل طبعا

نتحرك بالعربيه واحده واحده : فتيس ناعم ودبرياج ناعم ةفرامل انعم واجمد واجمل لكن باور تقيل نسبيا ( بيدى ثبات رهيب على السرعات العاليه )

تعالى سوا نجرب نحرق على الغيارات : هتلاقى بعد 4 ار بى ام صوت ماتور تانى خالص خالص هتلاقى نعره رياضيه وذلك بفضل over drive شئ جميل جدا جدا جدا وهتلاقى سحب افضل بمراحل هتشعر انك راكب عربيه سبور بجد عربيه تحفه فى السحب رغم كون الماتور 90 حصان v8 كل ده انا مش مصدقه لانى لما بدوس على دواسه البنزين بلاقى مارد طلعلى من الماتور بيدوس على اى حد بجد ماتور ياخد 10/10 على العربيه دى بجد ماتور متناسب مع حجم العربيه

نيجى بقى لعفشه العربيه : هى هى عفشه الصنى بس انعم شويه لكن برضو ناشفه اى حد ما لكن انعم بكتير من الانوس والفيرنا ولكن نشفان العفشه بيعطى لها ثبات على الطريق السريع وايضا عفشه قويه ومتينه وتستحمل الطرق الوعره ونشفان العفشه من الجنط ال 15 لو الجنط كان 13 كنت هحتس انك راكب عربيه سفنجه ومريحه الى ابعد الحدود ده رأى انا واختلاف الرأى لا يفسد للود قضيه

طب هقول حاجه حلوه : العربيه كمجمل ناعمه جدا جدا جدا جدا جدا مش هقدر ااقول اكتر من كده ناعمه فى كل حاجه سواقه وعفشه

تعالى بقى نجرى على طريق سريع معاك لحد 200 لو قادر تكمل كمل انا بفضل الله جبت 180 وغرز كمان بين النقل على الدائرى والحمد لله الاوروبى متفوق دائما الى ابعد الحدود بجد تحفه فى الثبات بفضل الله اولا ثم نظام التعليق العبقرى وهو التورشين بم بجد تعليق شبه مستقل لكن تحفه

كلنا بنسأل بقى ليه اماكن الزجاج مش موجوده فى الباب اول لان السواقه فى العالم كله باليد الشمال يعنى دايما ايديك اليمين فاضيه او على الفتيس لوا انت عايز تقفل الازاز مش محتاج تبعد ايدك عن الفتيس علشان تقفله هتلاقي ايدك رؤاحت ناحيه الازاز لوحده وغير كده تم تصميم العربيه على ان الكهرباء تبقى مجمعه فى ماكن بعيد عن المياه والتى تضر الكهرباء بشكل كبير جدا جدا ولذلك تعالى مثلا فى عربيات ناس اصحابى وهما بيغسلوا الباب بتدخل منهم مياه جوه زرار الازاز وبلاقيه فصل ومحتاج تنضيف اما لما تيجى تغسل باب اللوجان من الداخل هتلاقى نفسك تغسله بدون قلق على كهربه العربيه ده ( مجرد رأى وانا مقتنع بيه ) ولكن مع التعود هتلاقى نفسك مستمتع بالعربيه الى ابعد الحدود

تعالى بقى الناس اللى بتقول موضوع الشنطه والتانك بصو على الكيا كارينز والبيجو307 وهتعرفوا انها كدهاضمن بكتير بكتير لان ممكن لقدر الله لو حصل اى حاجه لزرار الشنطه او التانك لو اطنطط مش هتعرف تفتحهم بجد انا مقتنع بالموضوع ده والحمد لله على كل شئ

تعالوا بقى للناس اللى عندها عقده من الرينو ويقولك انتوا مش لاقين غير الرينو طب ما تجيبوا لانوس ولا فيرنا يا عم انت تعرف ايه اللى فى العربيه دى يقولك لا طب ركبتها برضو لا امال بتفتى ليه ( هما اللى بيقولو ") يا عم مين اللى بيقولك : يقولك الناس : ايه خلاص الناس كلها مش طايقه الرينو وقبل اى حاجه قبل اى حاجه اهم شئ تبقى مقتنع بالعربيه انت ملكش دعوه بالناس لان دى ازواق ولولا اختلاف الازواق لبارت السلع

واحد صاحبك يجى يقولك العربيه شكلها مش حلو تقوله يا عم دى عربيه عائليه مستنى منها ايه : مستنى سبويلر وفلتر رياضى وتهبيط وتنطيط لا كل عربيه وحسب تصميمها وان كانت اللوجان افخم خارجيا من الانوس والفيرنا لكن هنقول ايه بقى ناس متخلفه مصممه تكرهك فى العربيه

وبالنسبه لموضوع قطع الغيار انا عملت حادثه بالعربيه طلعت فوق رصيف كنت بفادى عيل بيجرى قدامى والحمد لله الواد سليم وانا كمان كنت سليم ايه اللى حصل بقى فى العربيه عايز جوز مصين وقنطره المهم قولت اسأل فى التوكيل بكام

لقيت ان العميله هتكلفنى فى التوكيل بتاع 5000 بالظبط

1140 جوز مقصات
1550 قنطره
800 مصنعيه
غير الضريبه وغير قطر العربيه

المهم قولت ( انا اخدت خازوق مغرى ) يعنى العربيه مش هعرف اصلحها المهم وانا ماشى فى البلد بعد الحادثه بكام يوم لقيت محل بتاع رينو قولت اسأل قولتله جوز المقصين

قالى : 400 جنيه الاتنين ( قمت تنحت على طول )
أنا : انت متأكد من الرقم ده يعنى الاتنين ب 400
قالى : واناا ههزر معاك ( قفشنى بس مش مشكله ) المهم
انا : طب والقنطره : قالى ب 1300 جنيه

قولت الحمد لله فجأه لقيت الحسبه من 5000 الى 2000 جنيه بالتركيب بكله

قولت والله اللوجان دى عظيمه وكويس قطع غيار موجوده ورخيصه كمان مش غاليه زى ما بيقولوا

والعربيه اتصلحت الحمد لله الحمد لله

انا عربيتى عامل بيها 3500 كيلو ف
فى الاول كنت مستنى اشوف العيوب بتاعت العربيه مش لاقى والله ما لاقى غير ان الماتور صوته مش هادى والحمد لله اتغلب على الموضوع وخليته هادى جدا جدا جدا زى الكورى واليابانى والطريقه اهى :

اولا : تسخن الصبح العربيه عادى جدا وتبدأ تمشى براحه خالص خالص يعنى انا عايز رجلك يدوب على دواسه البنزين وقبل ما الغيار يجيب 2.5 اربى ام تنقل على طول على الغيار اللى بعده وخلى بالك لازم تبقى رجله بدوس بسيط يعنى مش تفعص الدواسه وقبل 2.5 ار بى ام تنقل لا .لازم تبقى بسيطه خالص
ثانيا: تفضل كده ماشى على طول لمده اليوم بطوله مثلا ومتحاولش تفعص الدواسه او تدوس عليها جامد علشان ده هيبوظ اللى احنا عملنا
ثالثا : تعيش مع اللوجان بالطريقه دى مدى الحياه وصدقنى عمرك ما هتحس بالماتور تانى ابدا ابدا
رابعا : يجي واحد يقولى بس احنا كده ما استفدناش حاجه ااقوله لا احنا استفدنا حاجتين مهمين جدا اولا ريحت الماتور جامد فبتالى ماظهرش صوت الماتور عالى ثانيا هتلاقى نفسك ماشى براحه وبهدوء تام مما يجعل اعصابك مرخيه جدا جدا وقادر انك تسوق لمده يوم بحاله بدون تعب وغير كده هتوصل بسلامه الى اى مكان انت عايزه اينعم ممكن يكون فى تأخير بس طفيف وصدقنى لما تحسبها هتلاقى انك كسبان مش خسران ورابعا استهلاك بنزين ااقل فى حين انك مش بضغط على الماتور لحرق البنزين خامسا انت كده حافظت على اللوجان بكل قواها وصدقونى اللى انا بعمله ده بدون ضرر 0.1 من الميه لاى شئ فى العربيه بل بالعكس بتحافظ على كل حاجه وساعتها هتشعر بنعومه اللوجان وجمالها
سابعا : ارجوا الدعاء لى ولوالدى وللمسلمين وشهداء ثورتنا العظيمه
السلام عليكم

المهم قولت ادور على باقى العيوب كانو بيقولوا : حراره عند الدواسه ( والله مش لاقيها )

اماكن الازاز ( انا فرحان بيه جدا جدا )

رعشه فى الفتيس ( اختفت نهائى او انا مش بركز معاها اساسا )

والله ما عارف كانوا بيقولوا ايه تانى

المهم العربيه من الاخر عربيه عائليه مع بعض الشبابيه ولكنها عربيه اقتصاديه ذات اسم معتمد ومتانه ومرونه ونعومه وانا الحمد لله كل ما ابص على العربيه بحمد ربنا انى ما فكرتش فى غيرها والحمد لله ويا جدعان الناس اللى معاها اللوجان احمدوا ربنا بكره هتلاقوا نفسكم راكبين اكتر عربيه موجوده فى البلد وبفضل الله الانتشار مش محتاج اتكلم فيه انا عندى فى السويس كل يوم بشوف ما لا يقل عن 30 / 40 عربيه ومنها الجديد والقديم بجد شئ جميل جدا

والعربيه دى فلوسها حلال حلال حلال الحمد لله وتستحق لقب افضل سياره اقتصاديه بجد ( القيمه مقابل المال )

انا فى الاخر بقول للناس انا اسف عن اى الفاظ واسف على الاطاله وعدم ترتيب التقرير لان ده اول تقرير ليا

والسلام عليكم

**Mzeid** · 27-05-2011 05:38 PM

ربنا يبارك لك في العربية و يعطيك خيرها و يكفيك شرها

و بجد اللوجان اختيار موفق
مع ان فيه ناس كتير مش عاجباهم
و ناس كتيييييييير برضوا بيقولوا ان اللي راكبين لوجان بيشكروا فيها علشان كانوا راكبين قبلها 128
ماشي كل دة بس لما اركب العربية و الاقيها مريحة و اريح من عربيات كتييييير اغلى منها و كمان الاقي ان ثباتها ممتاز ( على الاقل بالنسبة لاستعمالي ) و مش انا بس اللي بشكر فيها يبقى مش حكاية كنا راكبين 128
عربية شنطتها 500 لتر الاقي فين عربية بالحجم دة
عربية صاجها كويس و الله واحد غفير شغال عند ابويا قاله يا بشمهندس العربية بتاعتك دي احسن من التانية ( كانت عربية افيو بتاعت مندوب شركة بيتعاملوا معاها ) والدي قاله و ايه عرفك قاله اضغط عندك على الصاج و اضغط على صاج التانية :)
الغفير اكتشف ان صاج عربيتنا اقوى من صاج الافيو :)
و معاك كمان محرك جامد مع انه 90 حصان بس بجد شدته جامدة و احسن من اللانسر ال 1600 علشان جربتها
و ممكن و الله اعلم علشان ما درستش الحكاية دي بالضبط اركب وش السلندر بتاع الموتور ال 16 صمام او اغيره كله حتى و يبقة معايا عربية 110 حصان و اشوف بقى هتعمل ايه مع الفيرنا
عربية موفرة

كل دة لقيته في العربية مش علشان كنت راكب 128 لا علشان لقيته فعلا في العربية

**mosomodo** · 27-05-2011 05:49 PM

تقرير ممتاز و صحيح 100 فى ال 100.

ياريت تقولنا جبت قطع الغيار منين عشان اضيفها فى موضوع "قطع الغيار جوة و برة التوكيل" او ضيفها انت بنفسك و لك جزيل الشكر.

**nour_nrc** · 27-05-2011 05:55 PM

سبحانك اللهم وبحمدك ، أشهد أن لا إله إلا أنت أستغفرك وأتوب إليك

**MOUSTAFA_SAAD** · 27-05-2011 06:45 PM

شكرا عى التقرير

**elshaky** · 27-05-2011 06:46 PM

للعلم انا اول عربيه امتلكها لكن انا سوقت عربيات زى
مرسيدس c280 موديل 2006
bmw 320 موديل 2009
مازدا 3 موديل 2010
سكودا اوكتافيا موديل 2010
كروز 2011
واخيرا السياره الاوروبيه الكوريه سوناتا 2011

وبجد وبجد محستش بفرق كبير اوى لانى راكب برضو عربيه اوروبى

وكل اللى سوقتهم تلت ارباهم المانى وثبات محدش يقدر يفتى فيه لكنى عمرى ما حسيت ان ثبات عربيتى ااقل من كده غير فى المناورات الديقه بس واكتر عربيه كنت باخد بيها غرز على 200 كانت المرسيديس بجد كان ثباتها مستفز الى ابعد الحدود تشعر وكانك مالك الطريق

ربنا يباركلنا فى اللوجان العظيمه

**lena jo** · 27-05-2011 07:18 PM

اولا : تسخن الصبح العربيه عادى جدا وتبدأ تمشى براحه خالص خالص يعنى انا عايز رجلك يدوب على دواسه البنزين وقبل ما الغيار يجيب 2.5 اربى ام تنقل على طول على الغيار اللى بعده وخلى بالك لازم تبقى رجله بدوس بسيط يعنى مش تفعص الدواسه وقبل 2.5 ار بى ام تنقل لا .لازم تبقى بسيطه خالص
ثانيا: تفضل كده ماشى على طول لمده اليوم بطوله مثلا ومتحاولش تفعص الدواسه او تدوس عليها جامد علشان ده هيبوظ اللى احنا عملنا
ثالثا : تعيش مع اللوجان بالطريقه دى مدى الحياه وصدقنى عمرك ما هتحس بالماتور تانى ابدا ابدا
سابعا : ارجوا الدعاء لى ولوالدى وللمسلمين وشهداء ثورتنا العظيمه
السلام عليكم

Thanks for the information but may u please explain this part.i change to the 2 nd T. after the car move and to the third at about 2.5 r.p.m.Then change at 3 or 3.5 r.p.m.after that.