دلوقتى في عرض كشف مجانى على سيارات نيسان (الموتور + التكييف) و فلتر تكييف هدية في بعض محطات موبيل :
شارع الهرم
المقطم
الزمالك
مدينة نصر
مساكن شيراتون
وده من 28/5 حتى 8/6/2011 من الساعة 10 ص حتى 8 م
عرض للطباعة
دلوقتى في عرض كشف مجانى على سيارات نيسان (الموتور + التكييف) و فلتر تكييف هدية في بعض محطات موبيل :
شارع الهرم
المقطم
الزمالك
مدينة نصر
مساكن شيراتون
وده من 28/5 حتى 8/6/2011 من الساعة 10 ص حتى 8 م
مش فاهم !!!!! هو الكشف المجاني تبع المحطة ولا تبع نيسان ؟؟؟ يعني اللي بيكشف على العربية ناس من نيسان ولا ناس شغالين في محطة موبيل ؟؟
وهل ده في محطات موبيل فقط ولا ايه ؟؟؟
ممكن تجيب لينا تفاصيل أكتر عن الخبر لو سمحت
عرض هايل بصراحة بس مش فاهم ازاى مجانى
ده فلتر التكييف لوحده فى السبع كان ب130ج
فعلا هايكون مجانى والكشف الدورى كمان
ياريت حد يروح يجرب ويقولنا يا اصحاب الصنى
بامانة لو كده اروح من بكرة باذن الله على موبيل شيراتون
يا جماعة أنا رحت امبارح بس للأسف كانوا مشيوا........أنا رحت الزمالك
و على فكرة حوار الفلتر ده حقيقى لأنى كلمت 16244 واتأكدت
يعني أيه مشيوا ؟؟؟ وهل العرض ده مستمر ولا لسه ؟
وبعدين محدش جاوب لسه على أستفساري : هل الكشف تبع ناس من نيسان ولا تبع محطة موبل ؟؟ وبعدين أنا دخلت على موقع نيسان أيجيبت الرسمي وملقتش أي أعلانات عن حاجه زي دي .. وهما في العادة بيعلنوا عن أي حاجه زي دي
ممكن حد أتصل ب 16244 يقولنا أيه النظام ؟؟
معلش أنا معرفتش أعبر.......... أنا قصدى أنا عديت بالليل فكانوا خلصوا شغل.......... انما العرض مستمر اسبوعين
الناس بتوع نيسان هما اللي بيعملوا الفحص ........... وأنا كلمت 16244 وقالولى الكلام ده
شكرا على الخبر وجزاك الله خيرا
احنا بس عاوزين نعرف تفاصيل اكتر عن الموضوع ده
الكشف على الكمبيوتر ازاى يعنى ,, هل بيكشوف ولو فى اخطاء بيظبطوا العربية على الكمبيوتر مثلا وبيظبطوا الحساسات وقرائتها
وبعدين فلتر التكيف هدية , لما يعمل ايه عندهم بالظبط !
وكمان انا اعرف ان الصنى مفهاش فلتر تكيف ,, هل مقصود بالناس اللى عندهم ومركبين على حسابهم , ولا مقصود باقى عربيات نيسان زى التيدا والليفينا والسلفى
الموضوع ده عاوز ايضاح شويتين
متابع بأهتمام
يا جماعة لو سمحتو حد يقولنا عمل ايه بالزبط لو كان راح
اصلا النيسان صنى واغلب السيدان بتنزل من غير فلتر تكييف يعنى تركبه على حسابك وتمنه ما يقلش عن 130ج غير المصنعيات
ياريت حد يفيدنا عشان انا هاجى من خارج القاهرة وبدل ما اروح ع الفاضى
منتظر الرد
السلام عليكم. انا روحت بنزينة موبيل شيراتون وفعلا تم فحص السيارة شامل الموتور والفرامل ومنسوب الزيوت و الكلاكس والفتيس والسيور وفلتر الهواء وفلتر التكيف ووادوني كوبون لأستلام فلتر تكيف مجانا لأن الصني مش بتنزل بفلتر تكيف بس بصراحة الحمد لله لأني كنت بشم تراب مع التكيف
ومكانالاستلام في اي مركز خدمة ودي فتررة محدودة حتى نهاية يونيو لأستخدام الكوبون وتركيب فلتر التكيف وأنا حجزت وإن شاء الله اكتبلكو التفاصيل
ممكن اماكن الفحص بالظبط
good news
انا لسه مكلم 16244 و سالتهم عن القصة .... قالو فعلا زي ما الاعضاء المحترمين قالو ... الموضوع دا في الخمس محطات موبيل السابق ذكرهم ...
و في خصم 10 % على قطع الغيار و 15% على المصنعية في حالة انهم لقو حاجة في الكشف محتاجة تغيير او تظبيط ...
و الكوبون بتاع فلتر التكييف صالح معاك لحد اخر شهر يونيو لتركيبه في اي مركز خدمة معتمد ...
انا لسة مكلمهم ونازل دلوقتي وان شاء الله لما ارجع اتكلم عن التفاصيل
في انتظار التفاصيل وشكرا واذا ممكن فين مكان موبيل شيراتون
لو جاى من مصر الجديدة ونادى الشمس او شارع جوزيف تيتو هاتخلى سور الكلية الحربية على يمينك وتفضل ماشى عالطول لحد اما تدخل منطقة شيراتون وبعد فندق راديسون بلو وقبل الاكاديمية اللى هناك هتلاقى البنزينة على ناصية شارع ومشهورة الف مين يدلك عليها
ولو جاى من صلاح سالم بعد الفيرمونت هيليوبوليس ما تطلعش الكوبرى وخد يمين من تحت وافضل ماشى برضه لحد فندق راديسون بلو والبنزينة ع اليمين
السلام عليكم يا اصحاب النيسان
انا النهاردة كلمت الخط الساخن 16244 وعرفت منهم التفاصيل كلها بس ربنا يسامحه بقى اللى رد عليا فهمنى ان كل بنزينة بتاخد منها الكوبون الخاص بفلتر التكييف على مركز صيانة معين
يعنى ببساطة لو عاوز تروح السبع عليك وعلى موبيل المقطم
عاوز مودرن ابو رواش روح موبيل شيراتون
عاوز المحمل قليوب عليك وعلى موبيل الزمالك
وهكذا !!!!!!!!
وطبعا لأنى عملت صيانات ال20 وال30 الف وهاعمل ال40 الف باذن الله الشهر الجاى عند السبع زهراء المعادى قولت مش هاروح ابورواش حتى لو كان عشان فلتر تكييف مجانى
وقولت الله المستعان وطلعت ع المقطم
طبعا رحلة ما يعلم بيها الا ربنا فى عز الضهر والحر وشغلت التكييف وتوكلت ع الله
على فكرة اول ما وصلت اكتشفت ان فيه خانة فى الكوبون بيتكتب فيها اسم المركز اللى ناوى تروح تعمل فيه الصيانة فطبعا دعيت على الاخ اللى رد عليا
هما اكيد مش عاوزين يبقى فيه تكدس على محطة ومحطة لأ فقالوا يقسموها بطريقتهم
المهم اول ما وصلت بالسلامة فرحت وقولت ربنا بيسبب الاسباب لأنى قبل ما انزل من العربية لقيت المهندس محمد غالى المحترم بتاع مركز خدمة السبع زهراء المعادى - كنت كلمته قبل كده فى مشكلة حصلت للعربية بعد الغسيل فى صيانة ال20 الف لمبة الموتور نورت -
وبالزبط ما كملتش 10 دقايق كان كله تمام التمام
يادوب خد الرخصة وسجل البيانات وعقبال ما مليت ورقة استطلاع رأى وخدت الكوبون بفلتر التكييف سارى المفعول حتى اخر يونيو 2011 كان الفنى اللى معاه كشف ع العربية وعمل اللازم وكتب الريبورت وسلمهولى وطبعا فيه 10% خصم على قطع الغيار و15% على المصنعيات
وسبحان الله كل ما اروح اعمل صيانة يكونوا عاملين عروض وما استفدش بكارت الvip اللى معايا
يلا هاييجى اليوم اللى استخدمه فيه باذن الله
المهم استلمت العربية وانطلقت فى رحلة العودة ومعايا الريبورت والكوبون وفى انتظار الشهر الجاى باذن الله لما اروح اركب الفلتر واعمل صيانة ال40 الف اللى سامع انها غالية اوى ... ربنا يستر
يا جماعة أنا رحت محطة موبيل اللى فى طريق النصر قدام جامع رابعة العدوية و كشفولى على الموتور بالكمبيوتر و ادونى الريبورت وكوبون استلام الفلتر....... الحوار مخدش 3 دقايق........ بس مصلحة لووووووووووز عشان الفلتر ده تمنه فى التوكيل 176 جنيه
انا رحت بنزينة موبل الي في شارع الهرم
والصيانة كانت كاتالي حط جهاز كمبيوتر الله اعلم عمل ايه المهم قال تمام وبص علي الزيت وزيت الفرامل وقال تمام وزود قربة المياه بتاع المسحات
خلاصة الموضوع اهم حاجة في الموضوع ده كلة هو فلتر التكييف
وقال ان تمنة 150 جنية وانا عرفت مكانة
وعلي فكرة فلتر الهواء غير فلتر التكييف
فلتر التكييف المفروض السيارة تنزل بية من الاصل بس تقولوا ايه في الدنائة منزلنها من غيرة
المهم اداني كوبون عشان انزل المحمل وقال علي طريق الدئري وشغلانة كده المهم انا بعمل صيانتي في السبع وهحاول اجيب الفلتر من هناك مش من المحمل عشان دي قصة حمضانة خالص
الصيانة المجانية ولا حاجة مطلفا عشان مفيهاش تربيط عفشة ولا اي حاجة غير فحص فقط لا غير
ارجو التاكيد
هل يكتب مركز الصيانه في الورقه ولا ممكن اروح اي مركز
خلى بالكم ممكن يكون الفلتر ببلاش بس التركيب بفلوس و ممكن يوصل التركيبل 130 ج
هههههههههههههههههههههههه
تمنه بدون العرض 176 + 10%
مصنعيه التركيب 37 جنيه .
بكل بساطة لو فيها لعب يبقى بالسلامة احسن هما 30 جندى تركيب بعد خصم المصنعية كمان مفيش غيرهم
واعتبر انك غسلت العربية عندهم
لأ بقى انا خايف من الاقبال الكبير تروح مثلا يقولك الفلتر خلص ونديك وصل بيه تيجيلنا بيه بعدين فى اى وقت وتفضل رايح جاى لحد اما تصرف اكتر من تمنه
هههههههههه
شكرا اخي الكريم
اتصلت بمودرن الدوقي وسالتهم علي الفلتر قالوا هيجي بعد اسبوع
لما نيسان ايجيبت مش موفراه بتحدد تاريخ في الكوبون لية
حاجة تجيب شلل
سؤال صغير:
انهي موبيل اللي فيها الحملة دي في الهرم ؟
و لازم اعمل صيانة في شهر 6 عشان استلم الفلتر ده و اركبه ولا ممكن اعدي علي مركز الصيانة استلمه و ابقي اركبه بعدين في ميعاد الصيانة ؟
حضرتك تفاصيل الموضوع كله حتلاقيه بايضاح اكثر هنا
http://www.nilemotors.net/Nile/222904-a.html
وكمان فى الموضوع اللى هنا فيه فى اول صفحة حتلاقى عناوين المحطات
اى مركز تعمل فيه عادى بالكوبون , وتقريبا لاخر الشهر ده بالنسبة لتركيب الفلتر , وبردوا فى الموضوع اللى بعتلك لينكه فى التفاصيل
موبيل اللى فى الهرم اللى هى جنب كايرو مول يا جماعة
انا عديت امبارح وشفتهم بس معدتش عليهم لان ناحية الطريق اللى فيه البنزينة كانت زحمة من التعاون للطالبية
انا اخدت الفلتر من مودرن الهايكستب بعد الكشف وموجود .