الموضوع: مشكلة و انا بنظف الكاربراتير - ماروتي

انت بتنظف بايه المرادي؟؟

وياريت تحكي عملت ايه بالتفصيل عشان نقدر نفيدك


تحياتي

المشاركة الأصلية كتبت بواسطة moustafamoussa

هههههههههه شكلي ذهقتك ...
هو نفس المنظف يا كبير . انا فتحت ببص علي الكاربراتير لقيتو متوسخ و اظن ان الفلتر الهواء هو اللي مش كويس و بيدخل تراب ...
فبخيت عالبوابات و داخل الكاربراتير كالمعتاد.. :)

وجيت ادور العربية عادي ...طولت شوية وبعدين سمعت اكن صوت بومبة فرقعت و دخان اسود طلع من الكاربراتير :(

لا ياباشا مفيش زهق ولا حاجه
طيب الاحتمالات المطروحه كلها مفيهاش حاجه تخوف

ممكن تكون وساخه او تراب نزلت جوه الكربيراتير
وممكن الوساخه دي نزلت لغرف الحريق فاتحرقت مع البنزين فعملت كده

وممكن ترتب على كده ان علبة البيئه في الشكمان اتكتمت شويه وفتحت مره واحده وده سبب الفرقعه

وممكن من غير ولا حاجه تحصل الفرقعه لان التنظيف ممكن يرسب هباب عالبوجيهات ويخلي واحد منهم ميشتغلش وبالتالي بيحصل ما يسمى بال misfiring وده حاجه مش مشكله كبيره

عموما بعض النصائح اللي ممكن تجنبك الكلام ده
1-لما تيجي تنظف نظف الاول من بره باستخدام الدبليو دي 40 وفنفس الوقت تكون حاطط فوطه نظيفه او حاجه تسد بيها البوابات عشان مفيش وساخه تتنطر جوا الكربيراتير وتعمل المشاكل دي
وم ثم تشيل الفوطه دي وتنظف الكربيراتير من الداخل باستخدام الاسبراي
2- ينصح ان انت بعد اما تحط المنظف من جوه تكون فاكك البوجيهات اصلا وتدي مارش مرتين تلاته تطرد اي وساخه محتمل انها دخلت
يعني هتفك البوجيهات وتدي مارش مرتين تلاته هتلاقي الوساخه اللي جوه بتتنطر من فتحات البوجيهات وبعد كده تركب البوجيهات وتدور...
3-لا ينصح بتنظيف الكربيراتير بالاسبراي اكتر من مره كل 10 آلاف كيلو لان الماده المصنوع منها قويه شويه وأكاله...
4- لتنظيف دورة البنزين والكربيراتير كل 5 آلف كيلو مكن تستخدم منظف الدوره اللي بيتحط عالتفويله لانه اخف من الاسبراي بكتير
5-لا يفضل اطلاقا استخدام نفس البوجيهات الموجوده اثناء عمليه التنظيف بل والافضل ان عمليه التنظيف تتعمل كمرحله اوليه لتغيير البوجيهات...
6-عمليه تنظيف الكربيراتير من غير تنظيف فلتر الهوا ملهاش لازمه وفلتر الهوا لو تعبان ارميه وهات غيره احسن سواءا ابو 10 جنيه المصري ولا ابو 25 الماليزي ولا ابو 45 الهندي

سابعا واخيرا ودي عشانك

عربيتنا بغزاله
هتلعب فيها كتير هتوريك الويل وهتزعل منك وتقرفك
طالما ماشيه ومبتنتشش منك وحلوة ولا تمد ايدك عليها غير كل 10 آلاف في الصيانه الدوريه...


تحياتي

المشاركة الأصلية كتبت بواسطة moustafamoussa

لا يا باشا انا كنت جوة العربية ...و شفت الدخان ... وافتكرت ان الموتور ولع :)
بس بالنسبة للرد "عربيتنا بغزاله هتلعب فيها كتير هتوريك الويل وهتزعل منك وتقرفك"
هل دة علي الماروتي عموما والا عربيتي بالاخص؟ عشان كل شوية اشتكي منها ؟

وشكرا علي ردك السريع ....

ولا يهمك يا مصطفى ولا اي حاجه زي مبقولك البخاخ نفسه بيعمل كده احيانا

انا بتكلم عن الماروتي عموما مش عربيتك يا باشا
صدقني بقالي شهرين نفسي اغسل العربية وخايف لان فعلا هيا بغزاله وطول مهيا شغاله متمدش ايدك عليها
وعلى قولة سبعاوي

never touch a working machine

تحياتي