الموضوع: حدائق الاهرام

المشاركة الأصلية كتبت بواسطة mohamedbook

المشكلة مش في سعر المتر سواء تمنة 1100 ج او تمنة 1400ج المشكلة انهم حرمية هناك بمعني ان الي بيبيع الشقة بيبعهالك علي اساس انها علي سبيل المثال مساحتة 200 وهي فعلي مساحتها حوالي من 160 الي 170 متر وهو بيقنعك ان الباقي ده كله مرافق يعني مساحة الجنية ومدخل اسلم والحجات دي عمرها متحصل في المجمل مهما كانت عن 10 او 15 متر عشان بتتوزع علي عدد السكان كلهم
المهم خد بالك من سماحه الشقه مش من سعر المتر
انا كنت هاخد هناك بس الي وقف الموضوع حكايه المساحة ديه والمشكله ان الي بيتعامل معاك شويه جهلة مش فهمين اي حاجة بوبين علي سماسره المهم في الاخر اخر ميزهق منك يقلك هي كده لو انت عايز

نفس الموضوع لما رحت هناك برضو المقاسات مش مظبوطة
دخلت شقة 115 متر لما قيستها صفت على 80 متر و برضو يقولوى اصل المساحة من الحوائط و الاصانصير و المناور و كلام اهبل
انا حاسس انهم كمان بيبيعوا الشارع مع الشقة
رحت هناك كذا مرة عشان اشترى و اتفرج و نفسى تتسد و امشى و بفكر جديا ماسكنش هناك

المشاركة الأصلية كتبت بواسطة samoreception

هوه بصراحة اللى انا اعرفه انى الشقق هناك بتباع وعليها نسبة 20% خدمات وكل الناس هناك عارفة كده وبتبيع وبتشترى هناك كده يعنى حتى لو فكرت تيجى تبيع شقتك بتبعها كده ده غير انى العقد بيتكتب فيه كل الكلام ده وبيضمنلك حقك يعنى فعلا شراء شقة فى الحدائق بيبقى غير شراء شقة فى فيصل او المريوطية مثلا فانت فى الاماكن ديه بتحاسب على مساحة الشقة صافى فقط

ايوة بس مستحييييييييييييييل 20 % دول يبقوا 35 متر حرام يعنى فى شقة 115 متر
يعنى حوائط و مناور و اسانسير و تراث و طرقة كل دول 35 متر ؟
ماينفعش ابدا

السلام عليكم

شوف يا عزيزى

أن شاء الله والدى رايح بكره يشترى شقه

خلاصه الموضوع

الأسعار يتبدأ من 1250 للمتر ( كاش ) لو قسط بيزود 100 جنيه على المتر

السعر حسب العماره لسه أرض ولا خرسانات ولا تشطيبات ولا جاهزه , يعنى السعر بيعلى معاك

موضوع السعر شامل ده عادى لكن أنت تسأله هو الصافى كام وتقيس وراه ( حوالى 25 % )

من الدور الاول بيزيد السعر 2000 جنيه على الاجمالى علشان نور السلم وخلافه

من الدور التانى بيزيد 5000 علشان الاسانسير

شوف الواجهه لأن الواجهات أنواع

فى أتجاه واحد ( لما تكون الشقه فى وسط العماره )

فى أتجاهين بحرى شرقى , بحرى غربى , قبلى شرقى , قبلى غربى ودى ألعنهم

العماره لما تكون واجهتين ,الواجهه الجانبيه على شارع ولا جار وبينك وبين الجار قد أيه لأنها تفرق

الهضبه متدرجه , يعنى فى صف عمارات بيكون الدور الارضى أعلى من سطح العماره اللى قدامك ودى تفرق طبعا

فيه عمارات بيديك حصه فى الجراج لو كان عامل جراج بس مش كلهم عاملين

ساعات يقولك الدور الرابع تقوله فوقيك السطح وهتكون حر قوى يقولك هبنى دور زياده مخالف ( كل العمارات اربع ادوار )

روح أى مكتب عقارات هيديك خريطه المنطقه علشان تعرف أماكن الخدمات والنوادى والمولات و و وو وو وو

ما تزهقش من التدوير لأن كل الأنواع والمساحات والمميزات كتير قوى وموجوده

الشقه حوائطها مش مقدسه يعنى ممكن ليك مساحه قسمها براحتك وهو هيعملهالك ( لو الشقه مش مبنى حوائطها ) أو هتغير أنت على حسابك , بس لو هتعمل تراس أو برج عرف المالك علشان يعمل حسابه فى الواجهات


شوف المنطقه اللى تعجبك وشوفها على الطبيعه فيها كافيهات كتير فيها مطاعم أو هاديه حسب ذوقك

الورق المطلوب صوره من عقد بيع الارض وصوره من رخصه البناء وتروح الجمعيه تتأكد أن الورق سليم وأنصح بعدم الشراء فى عماره متباعه بتوكيل مش عقد بيع

موضوع المنطقه مستقبلها أيه أنا معرفش بصراحه بس أنا لفيت فيها وكانت حلوه

دى خلاصه لف فى المنطقه مع والدى وأرجو أكون أفدتك

مع تحياتى