توكيل العبور مصلحش عيب نور الصالون

**themyth999** · 06-06-2011 02:32 PM

السلام عليكم
انا اشتريت عربية لوجان موديل 2011 و مبسوط بيها جداً
اول ما طلعت بره العرض لقيت نور الصالون بينور مع المطبات كأن في باب مفتوح و لمبه الباب في الطابلوه بتنور برضو مع نور الصالون
المهم سألت الإخوه الأعضاء قالولي ده عيب بسيط و التوكيل هيحلوا في اول صيانه
مكدبتش خبر و قلت للمهندس عبيه في توكيل العبور في صيانه العشره <اصلي معملتش صيانه الخمسه>
المهم العيب فعلاً اتصلح و اول ما مشيت بالعربيه بره التوكيل
طبق الأصل اللي حصل في المعرض
النور برضو بتاع الصالون و لمبه الباب في التابلوه بيرعشوا في المطبات
طيب انا دلوقتي هيفرقعوا مني بسبب الحوار ده و عايز اصلحوا
حد عندو فكره العيب ده يتصلح ازاي يقولي و انا اعملوا بنفسي
اه حاجه كمان
في زرار في سقف الشنطه من ناحيه الشمال مش عارف بيعمل ايه بس اللي فهمتو من المهندس ان العيب بتاع نور الصالون بيكون من الحته دي
لو حد عندو فكره يقولي
و شاكرين لكم حسن تعاونكم معنا

**elshaky** · 06-06-2011 03:45 PM

النور بتاع الصالون بيلعب بسبب اللوك بتاع الشنطه ولازم تبقى الشنطه مقفوله كويس انا الحمد لله عرفت اتعايش معاه ولما بيعمل كده بفتح الشنطه وبقفلها تانى وبتبقى الدنيا زى الفل والحمد لله

بس تقريبا اللوك بتاع الشنطه عايز يتربط كويس

**a7madahly** · 06-06-2011 03:52 PM

انا اساسا اللمبه بتقع مع المطبات

**themyth999** · 06-06-2011 04:03 PM

المشاركة الأصلية كتبت بواسطة elshaky

النور بتاع الصالون بيلعب بسبب اللوك بتاع الشنطه ولازم تبقى الشنطه مقفوله كويس انا الحمد لله عرفت اتعايش معاه ولما بيعمل كده بفتح الشنطه وبقفلها تانى وبتبقى الدنيا زى الفل والحمد لله

بس تقريبا اللوك بتاع الشنطه عايز يتربط كويس

الشنطه بتبقى مقفوله كويس و برضو بيعمل نفس العيب
العيب ده عيب تقفيل من المصنع و لازم يكون ليه حل
و بعدين انا مش عارف اتعايش معاه
حوار ....................

برجاء حسن اختيار الالفاظ
مشرف عام 4

**akerima** · 06-06-2011 04:57 PM

العيب اللي عندك عيب بسيط فعلا وبيجي يا من لوك الشنطة او يكون احد الابواب مش مربوط كويس - حتروح التوكيل حيزبتهولك قبل ما تمشي دوس علي الشنطة من بره والابواب من جوه ان ظهر تاني يبقي هما معملوش حاجة بس اهم حاجة قبل ما تمشي تتاكد ان المشكلة اتحلت

**MOUSTAFA_SAAD** · 06-06-2011 06:25 PM

زار الشنطه اللى على الشمال ده هو زرار نور زى الابواب بالظبط وهو اللى بيخلى نور الصالون ينور مع فتح الشنطه

**Ahmed A Rahman** · 06-06-2011 10:28 PM

ياباشا العيب ده حليته من اكتر من سنة

العيب من باب السواق يا باشا

مع المطبات الحلوة بتاعة بلدنا بترجرج باب السواق

في الباب من الداخل حاجه بتقفل على مفتاح عامل زي مفتاح باب التلاجة (صباع كده بيدخل لجوا يقفل نور الصالون)

الصباع ده مبيبقاش مضغوط عليه للآخر ولو مضغوط عليه الهزهزة بتاعة العربية على عيون القطط اللي عندنا بترجرجه

بكل بساطة :
حتروح لواحد عجلاتي (فاكر البتاعات المدورة الجاهزة اللي بيلحموا بيها كاوتش العجل بتاع العيال الصغيرة)

هتجيب حته صغيرة وحتحطها على جسم الباب من الداخل (في الحته اللي ادام الصباع)

انت مش محتاج غير حته واحده اللي تخانتها 2-5 مللي

وانسى نور الصالون يولع ثاني

انا حاططها بقالي سنة ونص ولازقها بامير ودهنتها اسود بحيث لما بتفتح الباب بتبان كانها جزء من العربية رغم اني عربيتي فضي وشكلها شيك

**ABOHAZEM_NEW** · 07-06-2011 01:07 AM

طب أنا عندى مشكله فى نور الصالون
بينور ويطفى مع فتح الباب وقفله عادى زى الفل بس والعربية دايره
يعنى لما أفصل العربية وأخرج منها واقفل الباب .. النور يفضل منور
على فكره أنا ركبت إنذار وولف عند واحد كويس وشغال زى الفل
ومش عارف الموضوع ده ظهر قبل ولا بعد تركيب الإنذار وحاجر صيانه 5000 بعد كام
يوم ياترى العيب من العربية ولا من الإنذار ولا العيب فى أنا

**akerima** · 07-06-2011 10:57 AM

المشاركة الأصلية كتبت بواسطة abohazem_new

طب أنا عندى مشكله فى نور الصالون
بينور ويطفى مع فتح الباب وقفله عادى زى الفل بس والعربية دايره
يعنى لما أفصل العربية وأخرج منها واقفل الباب .. النور يفضل منور
على فكره أنا ركبت إنذار وولف عند واحد كويس وشغال زى الفل
ومش عارف الموضوع ده ظهر قبل ولا بعد تركيب الإنذار وحاجر صيانه 5000 بعد كام
يوم ياترى العيب من العربية ولا من الإنذار ولا العيب فى أنا

نور الصالون بيفضل منور بعد مابتقفل الباب وانت مبطل العربية وبيقفل بعد تقريبا 10 ثواني دا طبيعي جدا ومن اوبشن العربية - اما في حالة لو نزلت من العربية وقفلت الباب واستعملت ريموت العربية في غلق الابواب فبيقفل في لحظتها ان كان عندك حاجة تانية يبقي فية مشكلة