تقرير صيانة الـ 5000 في مركز العدوي بالمنصورة .. عاوز رأيكم يا وحوش
أعزائي ...
أنا عملت صيانة الـ 5000 في مركز العدوي بالمنصورة .. وعلشان اكون موضوعي هاقولكم على ايجابيات وسلبيات المركز علشان خاطر لوجانية الدلتا ... وارجو من الساده الاعضاء اللي عملوا صيانة في التوكيل إنهم يقيموا التقرير ويعرفونا المركز كويس ولا التوكيل احسن ..
أولاً: الإيجابيات
ـ استقبال محترم جداً من كافة الموظفين.
ـ مفيش زحمه .. يعني لو صحيت الصبح عايز تعمل صيانه ممكن تروح على طول.
ـ في كل مكان في المركز ورقة مكتوب عليها رقم مدير المركز للشكاوى.
ـ ممنوع الاكراميات نهائياً (وانا مش عارف دي ايجابية ولا سلبيه) علشان انا حسيت ان الصنايعيه بيشتغلوا من غير نفس ( الاكراميات ساعات بتضبط المسائل برضه).
ـ كافتريا بحائط زجاجي لمتابعة السيارة (بس محتاجه نظافه ومش مكيفه .. بصراحه مقدرتش اشرب الشاي اللي جابوهولي لأن الكبايه شكلها ميطمنش)
ـ انا طلبت شد الفرامل شويه لأنها كانت ضعيفه (شدوها بس مرجعتش زي الأول)
ـ النور عندي كان مشتت (ضبطوه وخلوه عشره على عشره واشتغلوا فيه مده كبيره)
ـ ربطوا العفشه بس محستش بتأثير كبير .
ثانياً: السلبيات
ـ ميعرفوش حاجه عن المنتدى بتاعنا (أنا مستغرب جدا من الموضوع ده لأنه المفروض يكون عندهم اطلاع دائم على مشاكل العملاء من خلال المنتديات)
ـ عملوا غسيل الماكينة بالفوم بمبلغ 65 جنيه وانا سمعت انه اقل من كده في التوكيل.
ـ معرفوش يصلحوا الصفارة اللي بتيجي بعد سرعة الـ 100 وانا اتفاجأت ان المهندس اللي هناك مش عارف عنها حاجه وبيقولي اني اول واحد يشتكي من الموضوع ده !!!!!!!!!!!!!!!!!!!
ـ غسلوا العربية من بره بس غسيل أي كلام وقالوا ان ده غسيل مجاني (يعني علشان مجاني لازم يتقلب ولا ايه ..!!!!)
في النهاية عايز رأيكم ... ولو حد عمل حاجه تانية في صيانة الخمسه يا ريت يقول علشان اخد بالي بعد كده ومحسش اني اتقلبت ... ومشكلة الصفارة دي حلها ايه ..
