اذا قررت ابيع العربية تجيب كام دلوقت

السلام عليك جميعا
محتاج مشورتكم و خبرتكم خصوصا اللى باع أو اشترى فى الفترة القريبة
احتمال كبير اخد قرار نهائى ببيع احدى السيارتين و للأسف ها تكون البولو بإذن الله
اعتيز تساعدونى اطلب كام و ايه الرقم اللى المفروض ما اتنازلش عنه
العربية زى ما انتم عارفين بولو 6N2 1000 CC. باور و تكييف و سنتر و كاسيت الاصلى شرايط فقط
فابريقة بالكامل و لا تخلو من تجريحات بدون خبكات و الحمد لله
عداد الكيلومتر 116 موتور و فتيس وعفشة حالتهم بحسب تعبير مهندس التوكيل perfect و الحمد لله
اللى فيها كالاتى فرش السقف بعد غسله فك و مرضيتش الزقه عشان قلت اغيره انضف بس الوقت لم يسمح
المراية اليمن لا تستجيب لذراع الضبط و تضبط يدوى و المايه الشمال مكسورة
و الفرش الداخلى سليم تماما

قولو لى تجيب كام ان شاء الله و جزاكم الله خيرا

السلام عليكم

استفسار بسيط اخى ابو حمزة

هى العربية موديل كام وما معنى 6n2

ربنا يوفقك فى البيع

موديل سنة 2001
6n2 ده الموديل بتاع 2000 و 2001 فولكس سمته كده
و الموديل اللى قبله كان 6n

موفق ان شاء الله في البيع

اطلب 48 الف وحاول تلم اللى فيها عشان محدش يتلككلك على اللى فيها وخصوصا انهم مش هيصرفو كتير

جزاك الله خير على النصيحة
فعلا فكرت اعمل كده بس عايز افضى يوم
ربنا يسهل

أنا شخصياً شايف سعر الاستاذ محمد مصطفى مناسب جداً والمفروض متقلش عن كدة وعلى فكرة أسعار البولو شدة قوى اليومين دول المعروض قليل قوى والمميزات كتيرة قوى فإطلب زى ما انته عايز

بيع موفق باذن اللة
العربية دى لا تقل عن 47000 جنية باى حال من الاحوال يعنى اطلب 48 علشان 47 وربنا يوفقك فى بيعها

السعر معقول وهتلاقى مشترى فى ساعتين. الناس بتحب البولو قوى زينا كده وربنا يوفقك فى سعرها

بناءا على نصيحتكم قلت اعمل فرش السقف و المراية عشان ما يبقاش شكلهم وحش فى عين المشترى
السؤال مين سروجى ممتاز فى الهرم أو قريب منه اروح له
مش ها اقدر اروح لصنايعى نص نص عشان مش ها تهون عليا

أنا كنت بظبط الكرسى بتاع العربية بتاعتى عند سروجى فى دمياط والراجل قالى آخذ بالى من السقف ومحاولش أنظمفة وقالى يومها ان السقف لو باظ بيتكلف حوالى 400 جنية لأنة كرتون والكلام دة من حوالى 5 شهور كدة دى المعلومات اللى عندى عن الموضوع دة مش عارف فى القاهرة بيتكلف كام بقى وفين

أنا اعرف انه ها يتكلف من 250-350 عشان يتعمل صح
لو بالعك السروجى ها يعمله ب50 لزق من غير ما يغيره بس ها يفك بعد شهر بالتقريب و ده يبقى غش
المهم ان الصنايعى يبقى تمام و شغله نضيف و ياخد المصنعية اللى يستحقها

انا كنت عامل سقف عربيتى من سنه قبل ما ابيعها وكلفنى 250 ج وعملهولى من خامه محترمه جدا وبتتغسل عادى والأهم ان طلعه كأنه فابريكه ومحدش فعلا شافه الا واعتقد ان هو كدا فابريكا ومحدش شك انو متغير خالص
بس مش عارف دلوقتى يتكلف كام

طب عملته عند مين يا محمد بك
يا رب يكون حد قريب.

دا سروجى جنبى فى الهرم اسمه الأسطى عيد وميزة الراجل دا ان معندوش صبيان بيشتغل بنفسه فى كل حاجه
لو حابيب تروح نسق معايا وانا ابقى أوديك ليه

يا ريت يا استاذى
أنا ممكن اروح له النهاردة من الشغل على طول أو يوم السبت بدرى
لو توصف لى مكانه و تدينى نمرته تبقى عملت فيا جميل كعادتك

لو تعرف كنتاكى الهرم المقام مكان ومبى سابقا هتدخل من الشارع اللى بعده على طول اسمه جمال الدين الأفغانى هتاخد الشارع ده لأخره لحد ما توصل لشارع خاتم المرسلين هتضطر تدخل يمين اجبارى وتعمل يوترن وهتكمل فى امتداد جمال الدين الأفغانى اللى بيطلق عليه ش مشروع اليابان هتاخد الشارع ده لأخره هتلاقى ان الشارع فى نهايته بيضيق فى المنطقه دى هتلاقى شارع شمال على ناصيته ورشه رخام هتدخلشمال فى اول يمين هو فى اخر الشارع ده على اليمين اسمه الأسطى عيد قلو انا جايلك من طرف محمد مصطفى اللى كان معاه البولو البيضاء وحاليا معاه النترا 2006 وكلمنى من عنده عشان انا رقمه اللى معايا تقريبا اتغير رقمى 0113666755

الوصفة سهلة
1000 شكر لك يا استاذى
ان شاء الله اروح له السبت قبل صلاة الظهر

اقتباس:

---

اطلب 48 الف وحاول تلم اللى فيها عشان محدش يتلككلك على اللى فيها وخصوصا انهم مش هيصرفو كتير

---

+1111

الف شكر محمد مصطفي علي العنوان
انا كمان محتاج شوية تظبيط للفرش بتاع العربية بالزات الكراسي بتزييق وانا ماشي ولو طلعت طلعة جامدة بحس ان الكرسي مال لورا وبسمع طقطقة

كمان عايز اعمل مقايسة لتفصيل فرش

والله المستعان
،
،

اقتباس:

---

المشاركة الأصلية كتبت بواسطة syd

الف شكر محمد مصطفي علي العنوان
انا كمان محتاج شوية تظبيط للفرش بتاع العربية بالزات الكراسي بتزييق وانا ماشي ولو طلعت طلعة جامدة بحس ان الكرسي مال لورا وبسمع طقطقة

كمان عايز اعمل مقايسة لتفصيل فرش

والله المستعان
،
،

---

يافندم العفو انا تحت امر كل اخواتى واحبائى فى الله ومبروك مقدما على الفرش ان شاء الله
بص هو الراجل دا غالى حبتين بس هتاخد منه شغل نضيف ان شاء الله