الموضوع: ممكن المساعدة فى اختيار بين كيا سكترا و اوبل كورسا 2005

الكلام اللي سمعته ديسك واسطوانه بيبوظو بسرعه بس ماحصليش الشرف قبل كده ومش عايز يحصلي
الكلام اللي شفته عندي وعالجته في التوكيل تبع الضمان كان حاجتين العربيه عامله دلوقتي 60 الف ولسه عاملها صيانه في التوكيل دخلت في 2750 جنيه

1-الدهان كان بيقشر وده ماكانشي في الكورسا بس لأ كان في معظم العربيات اللي البيه منصور بيرشها زي الأسترا وكان معايا ساعت مهندس المصنع معتز لما كان بيعاين العربيه لأن مكن الدهان كان عنده فيه مشكله والتوكيل رشها بالكامل في الضمان والرش طالع زي الفابريكه بالظبط

2- مشكلة العفشه كان عندي صوت بسيط وغيرت علبة دركسيون تبع الضمان بس الصوت فضل موجود وبعد التغيير اكتشفو في الاخر ان الصوت كان من المقص بتاع العربيه ماكانشي مربوط كويس وكان عامل الصوت والحكايه كلها كانت تربيط فقط بس طبعا سابولي العلبه الجديده ودي تمنها بيوصل ل 7000 جنيه مصري

غير كده العربيه كسحب وتكييف وموتور وعفشه والصاج بتاعها وسهولة المناوره بتاعتها والسواقه اديها 10 على 10 بس العفشه هاتلاقيها ناشفه شويه مش زي الياباني يعني بس هاتاخد عليها مع الوقت وكمان كماليات العربيه كتير وجميله قوي وصعب جدا تلاقيها في حاجه غير الأوبل
ممكن تحس ان العربيه من جوه بسيطه شويه زي التابلوه واللأبواب بس عادي يعني احسن من عربيات كتير
اه نسيت اقول كان عندي رجه في الفرامل والعربيه عامله 15 الف غيرولي الطنابير امامي وخلفي في الضمان وكان العيب ده ساعتها مشهور قوي في العربيات دي
لو هاتقارن بلاش كيا خليك في حاجه ياباني احسن انما لو غاوي اوبل وركبت وجربت اوبل قبل كده يبقى اتكل على الله وهاتها بس اعمل حسابك في المصاريف لأنها غاليه شويتين وخاصة لو هاتجيب قطع غيار من التوكيل وممكن صعب تلاقي حاله نضيفه من العربيه دي لأن معظم العربيات اللي هاتلاقيها هاتكون معديه ال 60 الف كم وده كتير عشان تلاقي عربيه نضيفه الا لو كان صاحبها محافظ
ونصيحه في الاخر لو مالقتش حاجه نضيفه وتتأكد انها كويسه يبقى سيبك منها خالص لأنك صعب تلمها وترجعها زي الأول