تحذير لكل ساكنى الاسماعيلية و ملاك الكيا
فى البداية احب اعرفكم بنفسى - اسمى محمد شوقى و آسف تكون اول مشاركة فيها طلبات علطول بس الظروف حكمت
بدون رغى كتير احكيلكم الحكاية و هى كالاتى
الحمد للة ربنا اكرمنى و اشتريت سيراتو كوبية من 3 شهور و للاسف كانت خليجى فلم يقبل الوكيل ان يعملها صيانة
المهم اخى الاصغر يدرس بجامعة قناة السويس فى الاسماعيلية و اخبرنى ان فية مركز خدمة معتمد هناك
على الرغم من انى سالت المراكز المعتمدة فى القاهرة و قالو لا نقبل صيانة الخليجى قلت هنخسر اية اسالهملى ان كانوا يعملولها صيانة وكانت المفاجاة ان المركز قال عادى خليجى او وكيل
قلت فى نفسى و مالة المشوار بس يبقى اللى بيعمل الصيانة ناس فاهمة خصوصا ان الموديل جديد فالورش مش هتبقى فاهمة
انا كنت غيرت الزيت فى البنزينة عادى بعد اول الف و لكن بعد معرفتى انهم بيعملوا صيانة للخليجى قلت مبدهاش اوصل اخويا الاسماعيلية و اعمل صيانة و ارجع
المهم روحتلهم و العربية عاملة 3600 كيلو و قلتلهم انى مغير زيت على الالف بس يعملوا باقى الحاجة و فعلا اخدوا العربية حوالى نص ساعة و طلعت معمولها الصيانة
الملحوظات ان المركز كان حاطط انة وكيل معتمد لكيا و دايو و اسبيرانزا و كلهم فى مكان واحد
كمان المركز نفسة مش نضيف و اقرب ما يكون ورشة
المهم شيكت على العربية و دفعت الفلوس و مشيت و انا مبسوط انى خلصت بسرعة مش زى مكنت بتعذب فى غبور قليوب
قبل م امشى سالت الميعاد الجاى يبقى 5 و لا 10 تلاف عشان انا عارف ان فرع روكسى كل 5 تلاف فقالولى مش مهم ال 5 تلاف تعالى فى ال 10 تلاف
من يومين كدة قفلت ال 10 بحاجة بسيطة فكلمتهم انى اروح يوم الاحد اللى فات و قالولى تمام فاضيين تعالى
المهم اخدت العربية و روحت وصلت الساعة 12 دخلت العربية بس كان عندهم عربيات قبلى فدخلت على 1 كدة المهم صيانة 10 تلاف اخدت حوالى تلات ساعات و نص دفعت الحساب و لسة بدور لقيت لمبة التشيك فضلت منورة
طفيت و دورت تانى نفس الموضوع قمت نازل و ندهت للمحاسب طلع دور العربية و نفس الموضوع فقالى امشى شوية و هى هتطفى لوحدها
انا طبعا رفضت لان دة فية ضرر على الموتور زى ممكتوب فى الكتالوج
المهم ندة للعامل اللى كان شغال فيها وطبعا كان بيغير هدومة عشان يمشى لانهم بيقفلوا الساعة 5
طبعا العامل جة و عمل زيى بالظبظ دور و طفا و دور تانى و بعدين قالى امشى شوية و هى تطفى و انا رفضت تانى قاموا ندهوا لمدير المركز و انا قلتلة ان لازم اللمبة تطفى لانى مش همشى كدة
المهم قالى ماشى و خلا الصنايعى يلف بيها على الطريق الصحراوى 20 كيلو و رجع و اللمبة مطفتش بردة فالراجل مبقاش عارف يقول اية
انا قلتلة انى جايلو من القاهرة و مينفعش امشى كدة المهم دخلوا العربية تانى و حاولوا ينشفوا الكبوت بالهوا و مفيش فايدة لمدة نص ساعة
المدير جالى و قالى انهم لازم يقفلوا المركز لان مواعيد العمل انتهت و انهم هيكملوا بكرة
انا طبعا قلت دة بيهزر و قلتلة لازم امشى لان مفيش مكان ابات فية المهم الراجل طلب من الصنايعى انة يشوف حل و الصنايعى جرب ينشف بالهوا تانى و مفيش فايدة
طبعا الصنايعى عمال يقول للمدير يا باشمهندس ناصر فانا قلتلة طيب يا باشمهندس منكشف عليها كمبيوتر
الراجل تردد و لكن مع اصرارى وافق المهم جاب الجهاز و فتح الشنطة اللى هو فيها ووصل الكابل و نستنا حاجة تظهر مفيش انا ابصلة و هو يبصلى و بعدين قلتلة يمكن لازم تدوس على الزرار دة (زرار لونة اخضر كدة) و كان
و ابتدا الجهاز يبدا زى الكمبيوتر بالظبط و الراجل المهندس ناصر دة بصلى و قالى هو حضرتك بتعرف انجليزى حلو ؟ لحسن انا مش اوى
انا قلت يا لهوى لما سمعت كدة قمت ايلة امال مين اللى بيشغل الجهاز دة ؟ الراجل قالى الكهربائى
فانا سالتة امال حضرتك مهندس اية ؟ قالى انا مش مهندس انا كنت عقيد فى الجيش و بقيت مدير المركز بعد المعاش
طبعا انا كنت هتجنن و سالتة طيب فين المهندس بتاع المركز فقالى ان مفيش مهندسين و ان الصنايعية هما اللى بيعملوا كل حاجة
انا فى سرى يا لهوى
طيب يا عم اية الحل قالى لازم نكمل بكرة لان الكهربائى مشى و مش هيرجع تانى
ما باليد حيلة و رجعت بيتنا مواصلات على وعد انة يكلمنى اول ميخلص
الحمد لله على كل شىء خلصت الشغل و لسة مكلمنيش قلت اكلمة لانى مش عايز اسافر و يطلع لسة مخلصش و انا كل اللى فى دماغى ان اسوأ شىء ممكن يحصل انة ياخر العربية يوم كمان
كلمت المدير لقيتة بيرد و يقوللى ان فية مشكلة صغيرة و انا توقعى انهم يكونوا بوظوا حساس ولا حاجة و فوجئت بية بيقوللى العربية اتخبطت
طيب ازاى يعنى؟ طبعا الراجل كان بيقول حاجة بسيطة انا افتكرتها حكة و لا حاجة و قولت لازم اشوفها
طبعا هو قاللى مفيش داعى احنا هنصلحها على حسابنا و نكلمك اةل متخلص على اخر الاسبوع
انا طبعا سافرت النهاردة الصبح و فوجئت ان الجمب اليمين كلة متبهدل و مش شكلها خبطة جوا المركز من عربية تانى المهم اتخانقت معاهم عشان اعرف اتخبطت ازاى و مفيش حد راضى يتكلم
لما قولت انى هروح القسم اعمل بلاغ فيهم كلهم واحد قاللى انها اتخبطت على الطريق لما المدير بعت احد الصنايعية يجيب قطع غيار
انا قولت لازم ابلغ على الاقل عشان حقى ميضعش لان مفيش ضمان انهم يرجعوها فبريكة
المهم جيت ابلغ كيا الاول على الرقم الموحد و كانت المفاجاة انهم ميعرفوش المركز دة و مش مسئولين عن اى شىء طيب يا سيدى ازاى و هو حاطط يافطة بعرض المركز كلة انة مركز معتمد قالوا اليافطة ممكن اى حد يعملها و يعلقها
طيب ازاى دة على الطريق الصحراوى على مرئى و مسمع الناس كلها قالولى انهم ميعرفوش عنهم اى حاجة
المهم روحت القسم عملت محضى و جة معايا امين شرطة عشان يشوف التلفيات و للاسف لما سال المدير اتخبطت ازاى قالة على الطريق الصحراوى بالقرب من ابو غالى العبور و السبب طبعا تجربة السيارة بناء على طلب العميل ( لمبة التشيك) و لا جاب سيرة خالص عن موضوع قطع الغيار اللى كان باعت الصنايعى يجبهم عشان يبقى عداة العيب
السؤال بقى ممكن التامين يصلحلى العربية فى التوكيل و لا هيقولوا ان المركز النصاب دة اللى يصلحها لانى بعد كلامى معاهم قالوا انهم هيسمكروها و بعدين تترش و حاسس انها هتبقى باينة لان العربية باب واحد
تانى حاجة لو الضمان قال مش هيدفع تمن تغيير الباب و الفرف الامامى و الخلفى و ان المركز هو اللى يسمكر ممكن اشتكى فى حماية المستهلك ولا لأ
و اخيرا احب انصح الكل ميغلطوش غلطتى و يدخل اى مكان حاطط يافطة و السلام الفضل نسال الول هل دة معتمد بجد ولالأ