الموضوع: بخصوص العضو فورميلاتور

المشاركة الأصلية كتبت بواسطة osamy

MMamdouh شكله دخل معاك في مناقشه قويه :]

زى ما قال يوكو انا بتكلم دلوقتى بصفتى عضو مجلس ادارة مش عضو زى باقى الناس

القواعد و القوانين اتعملت عشان نحافظ على المنتدى... و الناس اللى بتسجل فى المنتدى بتوافق على اتباع القوانين دى وقت التسجيل... بالتالى مينفعش بعد كدة اعترض على القوانين خصوصا لو عملت حاجة غلط و لقيت نفسى متعاقب

اما اوافق على القواعد و القوانين من الاول و التزم بيها على طول... و اما ارفضها و مشتركش فى المنتدى من الاول

اما على المستوى الشخصى فا انا دخلت معاه فى مناقشة واحدة فقط... و لو دة كان اسلوبة فى كل او حتى معظم مناقشاتة مع الاعضاء فا مستبعدش خالص انة يتوقف

MMamdouh

المشاركة الأصلية كتبت بواسطة M.Gamaledeen

العضو الفاضل محمد ممدوح
المشكلة دلوقت على معظم صفحات المنتدي، مش في فورميولاتور لوحده، لازم نشو ف الطرف اللآخر من المشكلة وهي (الأعضاء المستفزين)

كتير دلوقت على صفحات المنتدى، اعضاء بيدخلوا في كل المواضيع، اللي تهمهم واللي بعيده عنهم، وكل اللي بيعملوه انهم يستفزوا في خلق الله.
وده (للأسف) كان أحد اسباب قله دخولى ومشاركاتي على صفحات المنتدى الذي ادمنته.

تدخل ترد على عضو بيسأل عن رأيه في عربيتك، ولما تجاوبه، تلاقي واحد منهم داخل يهاجمك بجمل غريبة، مالهاش علاقة بالفنيات ولا المواصفات اللي بتتكلم فيها، زي مثلا "دي ماتستاهلش، ايه اللي يخليني اجيب عربية زي في حين اني ممكن اجيب دي؟ وانت مااااالك ياسيدي؟ كل واحد يجيب اللي يعجبه.

وتلاقي معظمهم ماركبش العربية وانما ممكن يكون شاف أو سمع حد بيتكلم عليها، في حين ان ردي عن تجربة!!

ده غير انك لما تحط عربيتك في مقارنة مع احدى السيارات ذات الطول، اللي ماينفعش تقارنها بباقي العلب الحديد اللي احنا راكبينها، وبمجرد انك تجيب "سيراتو" قصدي سيرتها، تلاقي الأعضاء دول قفزوا على الشاشة وممكن يجيبوك من البيت كمان.

ويمكن بسبب الغيرة الزائدة للعضو الفاضل فورميولاتور (زي غيره كتييير)
بتحصل بعض المشاحنات والخروج عن النص

لكن في النهاية
أنا مش ب أطالب بأي استثناءات من قواعد المنتدى الذي احترمه وأعضاءه كثيرا
ولكن لابد من وجود ما يسمى بروح القانون
بمعنى
ان مش كل اللي بيخبط عربية من ورا بيكون هو اللي غلطان
وياريت تكون الرسالة وصلت ، وتقبل تحياتي (:

انا قابلت العينات دى كتير... فيه ناس عندها هوس بعربيات معينة و بتحبها لدرجة اعتبارها احد افراد العائلة... و الناس دى لو جت سيرة عربياتهم فى اى موضوع بحاجة وحشة بيركبهم 100 عفريت... و العكس تماما فيه ناس بتكرة عربيات لله فى لله و مبتصدق تلاقى موضوع فيه سيرة العربية دى تدخل تقول انها زبالة ووحشة و الكارو احسن منها و الكلام اللى بالك فيه دة

طبعا حط الصنف الاول على التانى فى موضوع واحد حتلاقى الناتج حريقة ملهاش اول من اخر و حتلاقى الموضوع قلب خناقة و تقطيع و 99% حيبقى فيه غلط بين الاعضاء و بعضها و ممكن يتحول الى شتيمة

المشكلة هنا ان الادارة و الاشراف ميقدروش يتدخوا فى حاجة طالما محصلش مخالفة للقوانين بتاعت المنتدى... و حتى الان مفيش قاعدة بتمنع حد انه يقول رائية و علية اى حد بيقول على عربية انها وحشة ميعتبرش ارتكب مخالفة... لو قال انها زبالة مثلا يبقى استعمل لفظ مش كويس و ممكن يتعاقب... لكن لو قال انها تعبانة و متسواش تمنها و هى اوحش عربية فى فئتها... محدش حيقدر يعملة حاجة (اقصد الاشراف و الادارة)

دة بيلقى بالحمل على الاعضاء نفسهم انهم لان هما اللى ليهم حق الرد و مواجهة الراى دة اما بادلة و براهين تثبت ان الراى دة لا اساس له من الصحة و ان العضو بيقول اى كلام فاضى ولا يفقه شىء عن السيارات سوا انها باربع عجلات و تعيش فى الشارع (بس طبعا بدون خرق قواعد المنتدى لتلافى العقوبات)... و اما بالتجاهل التام حتى يشعر العضو دة انه منبوذ

و على فكرة القصة دى مش جديدة... الناس القديمة فى المنتدى اكيد فاكرة موضوع "الملوخية" اللى كان فى قسم بروتون و الموضوع قلب بمشكلة و اتوقف فيه 13 عضو... و برضة الموضوع كان بادىء بمناوشات بين محبى و كارهى الجين 2 الى ان تحول الى ساحة من المخالفات

اللى عايز اقولة باختصار ان الحتة دى تقع تحت بند الخلاف فى الراى و بالتالى احنا كادارة و اشراف مغلولى الايدى و الحل فى ايد الاعضاء عن طريق تقويم الناس دى او اعتبارهم قيمة مهملة

MMamdouh

المشاركة الأصلية كتبت بواسطة osamy

سبحان الله قبل ما اعرف اي حاجه كنت متوقع كل حاجه
والله والله دا الي توقعته قبل ما اقرا اي حاجه
فورميلاتور اتناقش مع حد وهزمه نقاشيا (وده مش عيب)
والحد في مجلس الاداره فطبعا بقى عليه العين وبعد كده طراخ طريخ طروخ

بعد ما خلصت ضحك على جملة "هزمة نقاشيا" احب استفسر منك على حاجة.... انت بتتهمنى انى كنت السبب فى وقف فورميلاتور بدون وجه حق؟

MMamdouh

المشاركة الأصلية كتبت بواسطة osamy

انا مابتهمش حضرتك انا رأيي ان لو فورميلاتور جاله انذار او وقف بسبب المناقشه دي سواء بطريقه مباشره (ودي معروفه) او بطريقه غير مباشره (عن طريق ان العين تبقى عليه ونقفله على الواحده) يبقى فعلا بدون وجه حق وده رأيي الشخصي

ألنقاش بينى و بين فورميلاتور توقف فى الموضوع اللى انت ذكرتة من زمان و الموضوع مشى بعد كدة عادى خالص و هو متوقفش بسببى ولا حاجة... لا انا عملت تقرير مشاركة بطالب بمعاقبتة ولا هو اساسا عمل حاجة مخالفة للقوانين عشان يتوقف بالتالى الافتراض الاول غير صحيح

و حتى تاريخ فتح الموضوع اللى احنا بنتكلم فيه انا مكنتش اعرف اصلا انه اخد وقف نهائى... انا دخلت اوضح تفاصيل و شروط الوقف النهائى كعضو مجلس ادارة فقط و الكلام اللى قولتة كان حيتقال بالنص لو كان الموضوع عن اى عضو تانى غير فوميولاتور لان القاعدة المطبقة واحدة فى كل الاحوال

و انا مكنش عندى خلفية عن الاحداث السابقة ولا تفاصيل الوقف... و الدليل انى مكنتش حتى عارف انة اتوقف اكتر من 3 مرات بالفعل و تم تخفيف عقوبة الوقف النهائى مرتين الا لما اتبعتلى رسالة فيها التفاصيل دى

و اكيد مش كل واحد حدخل معاه فى مناقشة و رائية يبقى مختلف عن رائى حتلككلة و اوقفة... المنتدى مش عزبة و كل واحد بيعمل اللى هو عايزة ول هوا قالب اصم كل الناس فيه راى واحد و فكر واحد ... لو هى كدة كان المنتدى بقى فيه 500 عضو فقط و كلهم بيقولوا امين لاى حد من الادارة و شكرا على كدة

المنتدى فيه فريق اشراف كبير ماشى حسب القواعد و القوانين و الفريق دة بيراقبة مجلس ادارة و المجلس ككل يقدر يحاسب اى عضو مجلس ادارة يرتكب خطاء من خلال لجنة فض منازعات بالتالى مينفعش حد "يتلكك" ولا "يستقصد" حد لان مفيش حد بياخد قرار منفرد بمزاجة

اعتقد كدة يبقى الافتراضين بتوعك صعب تحققهم جدا جدا الا اذا كان فريق الاشراف و الادارة و لجنة فض المنازعات على بعض عبارة عن عصابة كبيرة

ثانيا
ليه حضرتك ضحكت على الكلمه؟؟؟؟؟!!!!!!!!!!!!!!!!!!!!!!!!!
هيه حاجه عيب يعني!!!!!!!!!
هوه حضرتك فاهم في كل حاجه وخبير في كل حاجه لدرجة انك لا تهزم نقاشيا ؟؟؟؟؟؟
يمكن !

ضحكت جدا عشان حاجتين:

اول حاجة كلمة "هزمت".... الموضوع مش معركة فيها غالب و مغلوب و عمر ما كان الهدف من اى نقاش او حتى جدال ان حد يفوز و حد ينهزم

الاحساس بان اى نقاش معركة بيفقدة موضوعيتة و بالتالى مش حيبقى فيه فائدة منة لا للاطراف اللى بتتناقش ولا الاطراف اللى بتتابع الموضوع لان كل طرف بيحاول يفوز و يكسب مجد شخصى بغض النظر عن الموضوع المطروح ولا المعلومات المتبادلة ولا الافادة و الاستفادة بشكل عام

و قبل كدة كنت اتكلمت فى الجزئية دى ايام وقف المهندس سمير عياد و قولت ان مش شرط فى اى مناقشة واحد يطلع صح وواحد يطلع غلط... ممكن الاتنين يطلعوا صح بس بشرط ان متغير معين يكون فى حالة معينة زى ما حصل فى موضوعى مع المهندس طارق فى موضوع التكييف و طلع كلامنا احنا الاتنين صح بس كل واحد فينا ماشى فى اتجاه غير التانى... و ممكن الاتنين يطلعوا غلط و الصح حاجة تالتة خالص و فى الحالة دى الطرفين بيستفيدوا من المناقشة و يصححوا معلوماتهم او على الاقل يضيفوا ليها معلومات جديدة

فى النهاية اللى اقصدة ان الموضوع مش معركة... الموضوع سعى وراء المعرفة

تانى حاجة ضحكت عليها هى "نقاشيا" لان الموضوع مكنش مناقشة... هو كان جدل ممزوج بتنشيف الدماغ و انا سيبت المناقشة لما لقيت الموضوع ماشى فى السكة دى لان زى ما قولت مش حنوصل لحاجة مفيدة طالما فيه طرف مش عايز يتقبل راى الاخرين... النقاش بطبيعتة تبادل وجهات نظر و بحث فى المعلومات و الحقائق المطروحة للوصول الى الحل او الاختيار الانسب... لو احد الاطراف متمسك بمبداء "انا صح و خلاص" يبقى كدة احنا بنحرت فى البحر و مش حنوصل لحاجة و دة السبب انى خرجت من المناقشة نتيجة غياب الموضوعية

اذا معنى كدة انى لا كنت فى "معركة" ولا كان فيه "نقاش" من اساسة بالتالى جملة "هزمت نقاشيا" اصبحت جملة مضحكة بالنسبة ليا

و على فكرة انا عمرى ما قولت انى اعرف كل حاجة فى كل حاجة و مفيش حد يعرف كل حاجة فى كل حاجة... بس لو عايز تتناقش مع اى حد لازم اولا تسمع اللى قدامك و تناقشة و انت متقبل انة ممكن يكون هو صح و انت غلط و تحلل الكلام اللى بيقولة و تدرس الادلة اللى بيجيبها و فى الاخر تكون انت و هو راى... قد يكون تاكيد على وجهة نظرك انت (و فى الحالة دى يبقى انت الاصح) او قد يكون تاكيد على وجهة نظرة هو (و فى الحالة دة يبقى هو الاصح) او قد يكون الناتج تاكيد عليكم انتوا الاتنين ( و فى الحالة دى يبقى فيه متغير معين هو اللى سبب الخلاف فى وجهات النظر من الاول) او قد يكون الناتج حاجة غير وجهات نظركم انتوا الاتنين ( و هنا يبقى انتوا الاتنين فاهمين حاجات غلط و معلومات كل واحد افادت التانى)

لاحظ انى استخدمت مصطلح "وجهة النظر الاصح" لاننا بنبحث عن الصح مش بنبحث "مين اللى غلط"... و لو النقاش فقد الشروط اللى ذكرتها فى الاول بين الناس اللى بتتناقش يبقى النقاش ملوش اى لزمة ولا اى داعى ان الواحد يشارك فيه او حتى يتابعة... لان فى الغالب حتلاقى الموضوع عبارة عن كلام مرسل و جدل عقيم لن يفيد اطراف الموضوع ولا متابعية

MMamdouh