السلام عليكم
حبيت احكى تجربتى مع التكييف للإستفادة
اولا : وقبل اى كلام احب اشكر هيثم بية كمال لأنة السبب طبعا وبفضل توجهاتة الجميلة
روحت عند واحد بتاع تكييف فى الجراج .. اسمة سليمان الأطير (طبعا هيثم هو اللى عرفنى علية )
بداية كلمت هيثم فى التليفون وشرحلى الطريق وكمان بعتلى رسالة برقم تليفون سليمان
كلمتة وعرفتة بنفسى وقولتلوا انى جيلك من طرف هيثم كمال .. بصراحة الرجل رحب جدا وقالى اتفضل
قولتلو انت موجود قالى لأ بس الرجالة موجودة اتفضل وانا هكلمهم
فعلا توكلت على الله وروحت لقيت صنايعى محترم اسمة عبد الحميد فى انتظارى
قولتلوا انى كلمت سليمان قالى .. تمام وعرفنى انه عارف ومستنينى
حكيتلوا طبعا على العك اللى عندى والمحاولة الفاشلة اللى عملتها قبل كده (أنى جبت فريون 12 على حسابى وشحنتة ) والتكييف برضوا مش مضبوط وبحس بيية فى الطوالى فقط ومع الوقفة فى الأشارات بعرق جوة العربية واتخنق
الرجل بصراحة سمع كل كلامى باهتمام وكشف على العربية وقالى هنفضى الفريون ده عشان مش مرتاحلوة وهظبطلك التكييف كلة عشان متقفش تانى ان شاء الله
بداية ...
1- فضا دورة لتبريد كلها
2- فك الكويل (الثلاجة يعنى ) مش عايز اقول طلعت اية كان فيها بلاوى..وطبعا نضفها كويس جدا
3 - تغيير بلف
4 - تغيير ترموستات (الترموستات القديم كان بيفصل بدرى قوى )
5- بعد التركيب المحكم تم كبس الدورة بالهواء للتأكد من عدم وجود تسريب
6- تركيب جهاز كمبيوتر فى بلف التكييف (الجهاز بيسحب الزيت القديم والهواء الموجودين فى الكمبوريسور والدايراة .. وبعدها بيتم شحن 500 جرام فريون a134 ووضع زيت جديد للكمبريسور ) طبعا الجهاز بيعمل كل ده من دون اى تدخل ..
7- ضبط مسمار فكيوم التكييف على المستوى الصحيح لضبط اداء التكييف
8- غسيل سربنتية التكيف جيدا بالصابون وضغط الماء
9- غسيل العين الخاصة بمستوى الفريون (العدسة) مش عارف لية
طبعا الحكاية دى استغرقت وقت محترم انا محسبتش بالظبط بس مش اقل من ساعتين او اكتر
جربت التكييف فى طريق العوده للمنزل ... بسم الله ماشاء الله حاجة تانية خالص .... عقبال عندكم

فكرت بصراحة نعمل عرض مع صاحب الورشة يفيد أعضاء هوندا وطبعا كل اعضاء المنتدى ... واكيد مفيش غير سمسم هو اللى يقدر يوصل صوتنا للإدارة ويشوف امكانية الموضوع من عدمة