الموضوع: الفار دخل المصيده

السلام عليكم

الفار دخل المصيده

من 3 ايام وانا داخل المطبخ حسيت ان فيه حاجه جرت بسرعه ادام عينى وشكيت انه فار لانى مااخدتشى بالى منه اوى بصراحه
قولت لبابا قالى فار ايه دى عمرها ماحصلت اشمعنى انت اللى شوفته
قولته ياسيدى هى علشان عمرها ماحصلت يبقى خلاص مستحيل تحصل عموما هاتلى سم فران وطعميه احسن يمكن يكون فار بجد وياريت يكون بيتهيالى فعلا لانى بخاف منهم جدا
لدرجة ان من 10 سنين كنت شغال فى شركة المقاولات بتاعت خالى ساعتها وكنا واخدين مشروع فى الاسكندريه وساكن فى العجمى البيطاش وانا قايم بالليل علشان اخش الحمام لاقيت فار فى الصاله بس من الحجم العائلى وعرفت بعد كده ان ده اسمه فار مزارع وكنت لوحدى فى الشقه , قمت راجع مارشيدير ولابس هدومى وخدت بعضى وجرى على دمنهور ووصلت بيتنا الساعه 5 الفجر ونمت ساعه ورجعت الشغل تانى الصبح ومن بعديها ماعتبتش الشقه دية تانى رغم ان سمعت انهم لاقوه وقتلوه بس عملتها حجه وبقيت اروح بيتنا كل يوم
المهم جت امبارح داخل المطبخ برده لاقيته بيجرى ادامى قولت لا بقى ده اكيد فار ومش متهيالى زى بابا لما قالى
نزلت الساعه 11 بليل ادور على مصيده وحاسس ان الدنيا مسوده فى وشى لان انا بترعب منهم اصلا
المهم لاقيت واحده واشتريتها وحطيت فيها جبنه رومى وسيبتها فى المطبخ
بابا قالى تعالى ندخل ونخبط على الدواليب قولتله انسى ياعمرو ادخل اتصرف انت واقفل على نفسك
دخل يخبط ومفيش فايده قالى كان زمانه طلع مع الخبط ده انت اكيد بيتهيالك وجت اختى وتقولى انت اصلك بتشوف حاجات غريبه ساعات قولتلها حاجات غريبه ايه يا بنت انت جننتى هو اخوكى ده عبيط ولا ايه وشخط فيها جامد " ماتصدقوش حكاية الشخط ده دية فشره من عندى لانى ماقدرشى اشخط فيها اساسا ده حتى العربيه اللوجان بتاعتها وممكن تحرمنى منها وانا مقدرشى على بعاد اللوجان طبعا "

جبت واحد يوم الجمعه ينضف الشقه دخل نضف المطبخ الاول وقالى مش لاقيله اثر نهائى
قولت يبقى خلاص انا فعلا بشوف حاجات غريبه
ونمت الساعه 11 ولاقيت اختى جايه تصحينى الساعه 2 بليل وبتقولى الحق الفار دخل المصيده قولتلها تانى
قالتلى هو ايه اللى تانى
وجريت على المطبخ لاقيت البيه مشرف فى المصيده فعلا استجمعت شجاعتى بالعافيه والله وروحت شايله بالمصيده ورميه فى الشارع وسايبه للقطط عماله بتحاول تطلعه ومش عارفه بس للاسف صاحى من ساعتها ومش عارف انا تانى وقايم رايح الشغل دلوقتى
ودية كانت قصة مصطفى سعد مع الفار والمصيده

طبعا انا عارف انى فكرتكم باحزان قديمه بس قولت اغتت واعكنن عليكم شويه ومهى ناقصه اصلها وبعدين مش كفايه انكم سيبتونى فى قسم الاوبل بحارب لوحدى يوم الجمعه ومفيش غير ringoo لحقنى فى الاخروانتم نايمين او بتتفسحوا يبقى لازم اعكنن عليكم
بس بامانه رجالة الاوبل دول ناس محترمين ولما حسوا ان الراجل غلطان كله غلطه ووقف معايا ومحدش سكت الصراحه

يا نهار اسود ده كله علشان فار

لا السنة اللي فاتت طلع عيني علشان فارين كانوا في المطبخ وشيلت التلاجة والبوتاجاز والغسالة الاوتوماتيك وفي الاخر الحمد لله مسكتهم انا وابن البواب الحمد لله اخوك مبخفش من الفيران (صعيدي بقي بس ربنا كتب عليا اعيش في القاهرة )

المدام بقي لو شافت صرصار في الشقة مش بتقعد فيها ............. انما لو كانت صعيدية علي ما اعتقد ما كنتش خافت من حاجة