السلام عليكم
ياجماعه فيه موضوع غريب حصل معايا
ابنى خالى قالى فيه عريس لاختك بس معاه بكالوريوس تجاره وشغال فى الكهربا حاتوافق عليه هى ولا عاوزه واحد دكتور وبرده انا حبقى اشوف رايه يمكن مايكونشى عاوز واحده معاها شهاده اعلى منه
قولتله حاسالها واشوف وماخدتش فى بالى انه ممكن الرفض يكون من العريس اساسا علشان العروسه دكتوره وشهادتها اعلى منه طيب ماهو برده مؤهل عالى زى حالاتى
سالتها لاقيت معندهاش مانع وكنت خايف لاترفض احسن ازعل واقولها طيب مااخوكى معاه بكالوريوس تجاره برده وشغال فى الجوازات ايه اللى بيعيبه غير جيبه

المهم فوجئت ان ابنى خالى بيقولى العريس مارديش وبيقول علشان العروسه اعلى منه فى الشهاده
طبعا هما اساسا لسه ماشافوش بعض ولا احنا حتى نعرف اسمه ايه
بس انا مستغرب جدا من الموضوع ده وازاى لسه فيه رجاله بالعقليه دية ده عمره 27 سنه يعنى اصغر منى كمان ب 5 سنين ولسه بيفكر ان الزوجه لازم تكون اقل من الزوج علشان يقدر يسيطر عليها ويكتم نفسها كان المؤهل الدراسى هو الحاكم فى الموضوع ده
انا عن نفسى اتمنى انى اتجوز دكتوره دية حاجه تشرفنى ماتزعلنيش على الاقل لما اعرفها باصحابى او ناس معرفه اقولهم الدكتوره فلانه مراتى مش اقولهم مراتى فلانه ويسالنى حد هى بتشتغل ولا معاها ايه اقوله دبلوم او معهد مع احترامى طبعا للمعاهد والدبلومات

بس بجد ياجماعه انا مصدوم جدا من التفكير بتاعه لانى كنت مفكر انه انتهى من زمان
على كده ده البنت اللى حتقع تحت ايده حيطلع عينيها وحيوريها الذل ويمكن يمنعها تضحك ادامه اساسا
وحسيت ساعاتها ان اختى كان ليها حق تخاف من الجواز لان بقالها فتره وكل لما يجيلها عريس او حد يكلمها على عريس تتحجج باى حجه والاقيها سهمت ووشها بلم اكنها سمعت خبر وحش ومش عارفين ايه السبب وفى الاخر اعترفت لينا انها خايفه من الجواز من اللى بتسمع عنه
رغم ان انا كان ليا تجربه سيئه جدا فى الخطوبه ومكانتشى دكتوره ولا حاجه وكنت لما اروح ازورها احس انى زى العيل الصغير اللى رايح المدرسه وحيسيب امه ويقعد يعط بسبب انى كل لما اروح اخد المحاضره المتينه وتحسسنى انى كل عيوب ومفيش مميزات نهائى وهى مستحمله وجايه على نفسها وعاصره لمونه بس علشان خاطر ان احنا قرايب وممنوع انى ارد او اعترض ولو رديت او اعترضت يبقى فيه لوى بوز وتدينى ضهرها ويمكن اقعد اسبوع علشان اخليها تدينى وشها تانى واسبوعين تلاته علشان تفرد بوزها تانى
وطبعا النتيجه انها بعد حوالى تلات سنين بتحاول ترجع تانى ورسايل على الايميل والفيس بوك بس انا مصدرالطرشه علشان تعرف انى قفلت سكه الرجوع دية نهائى
حتى اصحابى بعد الجواز حسيت انهم مش مبسوطين والابتسامه غايبه عنهم قولت يبقى فعلا الرجاله مجنى عليهم لكن كده واضح ان لسه فيه ستات مجنى عليها
انتم رايكم ايه ياجماعه مين المظلوم الست ولا الراجل
طبعا انا عارف ان كل حاله وليها وضع مختلف بس انا باتكلم على الاغلبيه الساحقه



----------------------------
تم غلق الموضوع تمهيدا لحذفه بناء على طلب صاحب الموضوع
رجاء التأني في وضع الموضوعات الشخصية قبل عرضها على صفحات المنتدى
مشرف القسم 5ب
230-6-2011
10:23ص