كنت عايز اعرف ازاى ممكن اقيس خرج الجى ام؟؟؟
بفولتميتر ولا ايه بالظبط؟؟؟
عرض للطباعة
كنت عايز اعرف ازاى ممكن اقيس خرج الجى ام؟؟؟
بفولتميتر ولا ايه بالظبط؟؟؟
حتحتاج جهاز واط ميتر واعتقد انه مش موجود فى مصر
ممكن بالافوميتر بطريقه تانيه
حتظبطه على الامبير وتوصله بين البطاريه وموجب الجى ام
حتعلى على الاخر وتشوف الجى ام بيسحب كام امبير
مثال الجى ام متوسط بيسحب 10 امبير
يبقى10*12=120 واط
الطريقه غير دقيقه
سيدي الفاضل الطريقة دي نظرياً سليمة..
ولكن عملياً لا يمكن تطبيقها ومخاطرها كبيرة وممكن تتسبب في حريق لا قدر الله !!
مبدأيا..
مفيش جي إم بياخد 10 أمبير إلا اذا كان جي ام تعبان آخر حاجة
وبنفس الوقت مفيش آفوميتر بيقيس أمبير عالي بالشكل ده إلا اذا جبت حاجة احترافية وغالية مش هايقل تمنها عن 700 جنيه !!
تالت حاجة بقا ودي الأهم واللي عاوزك تشوفها بنفسك عشان تقتنع بكلامي..
روح هات الآفو بتاعك واقطع السلك بتاعه اللي بتقيس بيه - هاتلاقيه يدوب مايزيدش عن 3 أو 4 شعرات رفيعين أوي
بالله عليه ده سلك تمشي فيه 10 أمبير عشان تقيسهم ؟؟؟!!!!
أكيد هايضرب وهايسيح في إيدك وانت ماسكه..
وأكيد لما يضرب سعادتك هاترميه من إيدك واحتمال كبير أوي يلمس في أي حاجة في العربية ويعمل قفله أو ماس ولا قدر الله سهل جدا تتسبب في حريق للسيارة أو على أقل تقدير ممكن أي مكونات إلكترونية في السيارة تتحرق بسبب القفلة اللي حصلت..
معلش نسيت اقول الطريقة الصحيحة لقياس الباور..
حضرتك هاتظبط الآفو على مود الفولت..
الكاسيت شغال + الجي ام متوصل وشغال + السماعة أو الصب متوصل وشغال وفيه صوت طالع..
هاتيجي على الطرفين بتوع السماعة أو الصب (أو طرفين الخرج بتوع الجي إم)
تقيس الفولت وتشوفه هايطلع معاك كام... وخد بالك اننا محتاجين هنا Absolute Value
لأن انت لو حاطط الأظراف مقلوبة ممكن تطلعلك القراية بالسالب مش مشكلة هاتاخد القراية وتتجاهل وجود السالب ده خالص
نقول جاب معاك 15 فولت مثلا
هاتضرب الـ15 في نفسها يبقوا 225
تقسمهم على مقاومة السماعة أو الصب (نفترض انها سماعة 4 أوم) يبقا 225 تقسم على 4 لتجد أن الناتج النهائي هو حوالي 56 واط RMS خارجين من السماعة في هذه اللحظة اللي انت خدت فيها القياس..
طبعا لما تعلي الصوت أو توطيه قراءة الآفوميتر هاتختلف معاك
وفي حالة السماعات أو الصبات أو استخدام حاجة دبل كويل وحسب طريقة التوصيل من بريدجات وخلافه يبقا قيمة المقاومة اللي هاتقسم عليها هاتتغير معاك بالتبعية...
باختصار..
المعادلة اللي هاتشتغل بيها هي:
الفولت أس اتنين وبعدين الناتج مقسوم على المقاومة
معرفتش اكتبها بالانجليزي عشان لقيتها متلخبطة والأقواس مخلياها هاتظهر غلط عالمنتدى فحطيتهالك صورة أهي:
http://i039.radikal.ru/1106/24/fc53c8b453c7.jpg
حيث أن الـV هي قياس الفولت على أطراف خرج الجي إم
والـ R هي القيمة النهائية للمقاومة المتوصلة على الطرفين اللي انت بتقيس عليهم
يعني تاخد بالك لو حاطط سماعتين على نفس الشانيل هاتبقا المقاومة 2 أوم بدل 4 أوم..
ولو مش عارف كيفية حساب المقاومات لطرق التوصيل المختلفة هاتلاقي موضوع هنا في المنتدى كان بيتكلهم عنها
انا قولت فى الاول على الصح هو عايز جهاز بيقيس الواط ميتر
وانا قولت الطريقه غير دقيقه
الافو سلكه رفيع انا عارف وميستحملش بس التجربه لحظيه ممكن10 -20ثانيه فحتعدى(واكيد اللى حيجرب فاهم هو بيعمل ايه)
وحضرتك سلمونتى بتاع الدى فى دى
في الحقيقة الطريقة بتاعتك صح زي منا قلت قبل كده،،
لكن الأجهزة الصيني المضروبة والخامات الزبالة اللي بتجيلنا هي اللي بتمنع تطبيقها عمليا..
سلك الآفو انت بتقول انه رفيع من شكله لكن كمان مش متخيل انه الحجم ده كله بلاستيك عازل ومنظر عالفاضي !!
اللي جواه بالعدد لا يزيدوا عن 4 أو 5 شعرات رفيعين أوي أوي تخاف تحمل عليهم حتى 5 أمبير مش هاقوللك 10
والعازل اللي حواليهم هو اللي تخين أوي عشان يحسسوك ان السلك تخين !!
العدوى دي انتشرت كمان في مشتركات الكهربا الصيني الرديئة اللي بتتباع على الارصفة...
بجد ربنا يستر علينا م الحجات الصيني دي..
بالنسبة لجهاز الواط ميتر هو غير موجود بمصر ..
وعموما هي فكرته انه بيقيس الفولت والمقاومة عند طرفين التوصيف في نفس الوقت ويعمل المعادلة اللي انا كتبتها فوق دي
وفيه اختراع تالت بيقيس شدة الصوت بالديسيبل بنشوفه في الفيديوهات الأجنبية لكن مشفتش زيه في مصر قبل كده
أيوة انا سلامونتي بتاع الدي في دي
انت مين هناك بقا عشان اوقفك؟ :grin54:
ماشى يا باشا
وانا rot@na على الدى فى دى
نورت المنتدى يا عم روتانا
كده مش هانقدر نغمض عنينا ههههههه