الموضوع: محتاج مساعدتكم ورايكم فى بيجو 305

السلام عليكم

أخي الكريم ، انا كان عندي بيجو 305 زمان ، العربيه كعربيه فهي ممتازه و قوية و انا من عشاقها ، لكن احنا كمصر العربيه دي سوقها قليل فيها و قطع غيارها نار شوية و نادره ، فرأي انك تحاول تشوف حاجه احسن و لو تقدر تجيب جديد فهو أريحلك طبعاً

انا لسه شاري العربية دي من حوالي 10 أيام و بصراحة عربية جميلة و أحسن من الفيات و اللادا بمراحل و مش لاقي مشكلة في قطع الغيار، كل حاجة احتاجت اغيرها لقيتها و بسعر مناسب جدا ما عدا الكبالن هي اللي غالية. و عن تجربة و خبرة في العربيات العربية دي أحسن من غيرها بكتيييييييييييير

شكرا ليكم جداا ياشباب على الردود
ربنا يبارك فيكوا يارب

استاذ azahra
انا محتاج حضرتك جدااا
ياريت تبعتلى رقم موبالك عشان فيه حجات كتير عايز اسال حضرتك عليها
معلش انا عارف انى هاتعبك
ربنا يبارك فيك والف مبروك ياجميل على العربيه
ربنا يديك خيرها يارب ويكفيك شرها بامر الله

العربيه ال305 من اجمل العربيات اللى ممكن تقتنيها
بس عاوزه واحد يحبها يعنى ميزهقش منها بسرعه وميكانيكى محترف بيجو
مش كل الناس ترضى تشتغل فيها
وقطع الغيار غاليه شويه بس ارحم من 504
اقوى من الفيات 128 بكتييير
واحسن من اللادا لان العجل بتاعها مش بملض من عند البيض زى اللادا
ثابته على الطريق
حماله اسيه بجد وسريعه فعلا
وده لان الماتور مدمج تحته الفتيس ونازل على الكبالن على طول يعنى مفيش فقد للطاقه خالص
وزيت الفتيس هو هو زيت الماتور (شير بين الاتنين)
والبنزين استهلاكه معقول لانها على كامه واحده وسير الكاتينه جنزير
بس هى فى طريقها للانقراض
لو لقيت 131 انا افضلها ليك طالما انك لسه مشترتهاش
او ماذدا 323 ممتازه برضو

انا العربية معايا من سبع سنين فقولك راىء بصراحة اولا هى عربية واسعة ومريحة وبتجرى حاجتها رخيصه مين اللى قال انها غاليه وموجود منها كل حاجة جديد واستيراد بس اهم حاجة يكون موتورها كويس وعفشتها كويسه دول اللى يمكن مكلفين الكبالن صح غاليه الاصلى ب 1300 جنيه بس انا بملاه كل سنتين ب 100 /150 وشغال تمام اما باقى المستهلكات فوانيس خلفى الوش 13 جنيه يعنى لو اتكسر ولا يهمك وش امامى الزجاج 16 جنيه الاشارة 7 جنيه الفانوس كله 15 سيور عادى زى اى سير 10/ 15 جنيه طقم كهربه زى اى الفيات اكرة باب خارجية 25 جنيه سلك دبرياج 35 جنيه سلك اكسراتير 10 جنيه ايه بقى اللى غالى عيوبها لو عايز تجيب موتور استيراد غالى نوعا ما 4000 ومبيسقطش فيها غير موتورها علشان حوضها ضيق العجل فى موديلات 3 خرم مش هينفع تركب جنوط 4 خرم بس الطيارة 4 خرم / صعوبة البيع يعنى حضرتك بتشترى تسمع 17 و18 تيجى تبيع تسمع 10 و 9 ليه اصلها مش مطلوبة بس عارف انا كل مااجى ابيعها بتصعب عليا بس التكييف بقى اساسى فى الجو الصعب ده فلازم الواحد يغير انا قلت راى فى البيجو لكن انا لو مكانك هجيب 323 لو انها اوطى وكفايه كده لان اخونا ميدو عاشق ال305 ممكن يتخانق معايا

بصراحة انا بحب العربية دي ومن زمان اوي .. وانا رايي فيها انها كشكل فهي سابقة موديلات كتير لماركات تانية ومن زمان بتحسسني انها رياضية .. وبصراحة الفرنسيين لغاية اواخر الثمانينات كانو بيبهروني بأدائهم في سيارتهم و خصوصا زي احد الاعضاء اللي شرح اسلوبهم في انهم دمجو الموتور مع الجير بوكس وبالشكل ده اصبح الزيت المستخدم يكفي للقطعتين

بصراحة بيعملو حجات غريبة ... واحد صاحبي كان معاه عربية ستروين كان جهاز التعليق بتاعها على كور بترفوع العربية لاكتر من مستوى والعربية دي تقريبا كانت موديل 72

يا تري اشتريت و لا ايه ؟
طمننا