الموضوع: الدركسيون بيهتز عند 90 كم /س و الاهتزاز بيزيد بقوه مع زيادة السرعه .. اعمل ايه

المشاركة الأصلية كتبت بواسطة poiuyt

طبعا الموضوع ترصيص زى م الاخوة الفضلاء قالوا

بس انتوا عارفين ليه الترصيص ( ما بقولش ايه لان انتوا طبعا شوفتوا الراجل و هو بيحط رصاص للعجل)
الترصيص ده ناتج من العيوب الطبيعية للصناعة ( ما تتخضش) العربية مش معيوبة و لا حاجة
ولكن اى جسم مصنوع لكى يستخدم و هو فى حالة دوران لازم يتعمل له حاجة اسمها ( اتزان) اللى هيه الترصيص
ليه؟
لان كتلة الكاوتش او الجانط لو كانت متوزعة بانتظام فى كل الاتجاهات اذن الكاوتش موزون
و عند الدوران عند اى سرعة مش هيبقى هناك مصدر اهتزاز بسبب القوة الطاردة المركزية الناتجة من الكتلة الغير منتظمة
مش فااااااااااااااهم؟؟؟؟؟؟؟؟
ابسطهالك
مروحة السقف ف بيتكم, لما بتشغلها بتلف عادى بدون اهتزاز ( رفة يعنى) لكن لو حضرتك وقفتها و لزقت قطعة فلين على ريشة من الريش المتركبة وشغلت المروحة تانى(انصحك على اقل سرعة) هتلاقى ان فيه رفة ملحوظة و لو زودت السرعة (مضمنش اللى هيحصل) هتلاحظ الرفة زادت( طب اللى حصل ده ليه) لان قطعة الفلين(مع صغر وزنها) الا انها زودت كتلة احد الريش عن الاخرين بالتالي عند الدوران مجموع القوى الطاردة المركزية للريش متساوى على الكل ما عدا الريشة الاتقل
القوة الطاردة المركزية= الكتلة x نصف القطر الموجود عنده هذه الكتلة x (سرعة الدوران)^2

لو فردة كاوتش و هى بتتصنع كان كتلة مادتها مش متوزعة بانتظام( وكذلك جانط السيارة) اذن عند الدوران هيكون هناك كتلة ف اتجاه معين بتعمل قوة طرد مركزى مش هيظهر الا عند السرعة العالية زى مانت شايف من المعادلة
الراجل بتاع الكاوتش ( مع احترامى الشديد له) مش فاهم المعادلة و لا الكلام ده (الا من علمه الله)
هو بيحط الفردة على الجهاز و الجهاز بيقول له حط 20 جرام او 30 جرام او ايا كان الوزن
و لو انت مركز معايا الجهاز بيقول له حط الكتلة ف الاتجاه المضاد لكتلة عدم الاتزان علشان القوتين يلاشوا بعض لانه طبعا مش هيقدر يشيل الكتلة اللى جوة الكاوتش علشان يخللى الكاوتش موزون
و لازم تعرف ان الاتزان ده بيتعمل للكاوتش او الجانط اللى لسه طالع جديد من المصنع بالتالى ما تقلقش ان كانت العربية جديدة و عايزة ترصيص ده هو الطبيعى
اقوللك على حاجة جامدة تنين
الراجل و هو بيوزن الفردة بيوزنها مع الجانط طبعا(صح) طب لو الفردة اتخرمت و انت فكيتها من الجانط علشان تصلحها لازم تكون معلم قبل الفك علامة على الكاوتش و على الجانط قصاد بعض علشان لو رجعتها على وضع تانى يبقى لازم توزن الفردة تانى(ترصصها) لان انت ايه اللى يضمنلك ان الكُتَل على الوضع الجديد متوزعة بانتظام ^_^

موضوع الاتزان موضوع مهم علشان راحتك فى السواقة - ثبات السيارة و سهولة التحكم فيها - البلى bearing

الصراحة مفيش بعد كده
انا استفدت جدااا من المعلومات دي
ربنا يجازيك كل خير على المعلومات الجميلة دي
و يجعله في ميزان حسناتك
اعتقد ان حضرتك مهندس,صح؟؟؟
بجد فعلا انت انسان محترم جدااا

المشاركة الأصلية كتبت بواسطة c318i

يا جماعة انا متشكر جدا ليكم - انا برده كان الترصيص هى اقرب فكره و حروح ارصص و قولكم ايه الاخبار - انا الى قلقنى ان بعض الاعضاء فى مواضيع اخرى قالوا انهم لما استلموا عربيتهم كان فى عيوب تصنيع فى الطنابير و اتغيرت فى الضمان " ان شاء الله يكون ترصيص و بس "

منتظرين تطمنا عليك يا باشا