سؤال عن حجز تذاكر طيران علي الانترنت

**wael17** · 14-06-2011 09:16 PM

السلام عليكم

ان مسافر ان شاء الله بره مصر في شهر 7 و المفروض هاشتري تذاكر السفر دلوقتي

امبارح دورت علي اقل سعر للتذاكر و لاقيته موجود علي موقع الخطوط الجوية النمساوية ب 3000 شامل الضرائب
نزلت النهاردة وسط البلد عشان اجيب التذكرة من شركة سياحة لاقيت اقل سعر 3250 مع العلم انها نفس رقم الرحلة اللي انا شفتها علي الانترنت و لما سألت ليه السعر ازيد 250 جنيه قالت لي ده اقل سعر و لو رحت جبتها من الخطوط الجوية النمساوية هايدفعوك اكتر من السعر اللي شفته علي النت...انا بصراحة مش مقتنع و حاسس ان ال 250 جنيه الزيادة دي عمولة بيضربوها في جيبهم..في ناس اصلا بتشتري التذكرة من علي النت و تدفع بالفيزا و تطبع التذكرة و هي قاعدة في بيتها...يعني السعر الموجود علي الموقع ده نهائي لاني لو دفعته هاخد البرينت بتاع التذكرة و هاطلع علي المطار علي طول...حاولت اكلم مكتب الخطوط النمساوية بس ماحدش بيرد عشان كانت الساعة 4....ايه رايكم حد عنده فكرة عن شركات السياحة و الطيران

**heshamzaky** · 14-06-2011 09:38 PM

التذكرة الى حضرتك حا تشتريها أسمها تذكرة أليكترونى etkt الفكرة أنك لما بتروح لشركة سياحة بيدفعك حاجة اسمها service charge بس مش بتكون 250 جنية لو التذكرة مثلا درجة سياحية فى حدود 100 جنية أو 120 جنية و لو بيزنس من 200 الى 250 جنية تقريبا
ممكن تعمل التذكرة من على النت و حا تبقى تمام بس لو حا تدفع تمنها بالفيزا كارد يفضل أن الكارت بتاع الفيزا يكون باسمك و بتاعك يعنى تبقى أنت ال card holder لانك لو جيت تسترجع التذكرة حا ترجع فى نفس رقم حساب كارت الفيزا و لو التذكرة مدفوعة مثلا من خارج مصر ممكن يطلب منك كارت الفيزا المدفوع بية التذكرة دة نوع من انواع الامان علشان فية ناس كانت بتسرق كروت الائتمان و تعمل بيهم تذاكر و تبيعهم
و خلى بالك اقرا شروط التذكرة كويس خصوصا فيما بتعلق بعملية الارتجاع او تغير المواعيد لان بيبقى عليها غرامات و دى لازم تتعمل من شركة الطيران
انا شخصيا ارجح أنك تعمل التذكرة من شركةالطيران ذات نفسها
الخطوط النمساوية حا تلاقيها فى نفس مكاتب شركة لوفتهانزا

**A.Saad** · 14-06-2011 10:30 PM

انا حجزت من مصر للطيران داخلى
الموضوع سهل
بس اقرا كل حاجة كويس
ويفضل تعمل مرة استكشاف قبل الحجز الفعلى
لان لقيت اختيار مثلا لتحديد المقعد
واختيار لو عايز اكل نباتى
كدة يعنى

بس انت هتسيب الفلول لوحدهم كدة يا وائل