الموضوع: حد يرد عليا بخصوص الماروتى

اكيد الشكل الجديد احلي لأنه مطور عن القديم و شبيه بالسوزوكي التو بس ع اصغر شوية
مع العلم ان كل الماروتي تقفيل هندي من اول ما نزلت هي و الالتو و حتي السيلاريو عشان محدش يقولك القديم ياباني و الجديد هندي

و طبعا الافضل تجيب موديل احدث عشان العربية تكون كويسة

بالنسبة لاسعار التابلوه للاسف مقدرش افيدك لو ينفع تغير
بالنسبة للدريكسيون فكر في دريكسيون الالتو لأنه هيليق ع العربية نفسها اكتر من بتاع السيلاريو و حجمه اصغر من بتاع الماروتي
مش قصدي ان بتاع السيلاريو شكله وحش لكن اقصد التناسق و الشكل العام

مميزات الماروتي
انها عربية شبابية و اقتصادية في كل حاجة قطع غيار و بنزين و كله
شغلها سهل و احلي حاجة انك تجيب بيها 120 هوا خاصة ع كوبري اكتوبر هههههه اسأل مجرب
العربية كربراتير
و اخيرا حجمها اللي يعتبر ميزة و عيب في نفس الوقت لكن في مصر ميزة
نظرا لضيق الشوارع و الغرز و تقدر تركنها في اي مكان

عيوب العربية
انها صغيرة شوية زي مقولنا
العربية مش عايزة قرص اوي و لا مشاوير طويلة طول الوقت
مع انها بتسافر عادي و بتحمل كمان
لكن لازم تهتم بيها بعد كل سفرية عشان تفضل تمام معاك

لاحظت ان اسطوانة الدبرياج اول حاجة بتبقي محتاجة تتغير فيها لو واحد رجليه تقيلة شوية ع الدبرياج يبقي يعمل حسابه انه يغيرها دايما :)
انما لو بتحافظ عليه متقلقش ان شاء الله
اخيرا و ليس اخرا العربية لا تتمتع باي وسائل رفاهية الخاصة بالصيف لكن ده كله يمكن التغلب عليه بالتركيب

لكن في المجمل العربية مناسبة لاي شاب او اسرة صغيرة لا تتعدي 3-4 افراد و اطفالهم صغيرين

و بالتوفيق ان شاء الله