تقرير ناشطة : لقاء مجموعة "لا للمحاكمات العسكرية للمدنيين" مع المجلس العسكري

تلقت مجموعة " لا للمحاكمات العسكرية للمدنيين" دعوة للقاء المجلس العسكري, و بعد نقاش داخل المجموعة قررنا الموافقة برغم تشككنا من جدوى اللقاء, و أعلننا مسبقا مطالب المجموعة المخطط تقديمها للمجلس العسكري.

اقتباس:

---

· وقف إحالة المدنيين للمحاكمات العسكرية وإحالتهم للنيابة العامة والمحاكمة العادية، وإصدار تعليمات للشرطة العسكرية و الشرطة المدنية بعدم إحالة أي شخص للنيابة العسكرية إلا فى حالة أرتكاب جرائم داخل ثكنات القوات المسلحة، وإصدار بيان خلال أسبوع من تاريخ اللقاء بالتعهد بعدم إحالة المدنيين لأي نوع من المحاكمات العسكرية.

· حماية التجمعات السلمية (التظاهرات, الاعتصامات و الاضرابات) باعتبارها أحد منجزات الثورة، و عدم التعرض للمشاركين بها ( مثل عمال بتروجيت الجاري محاكمتهم عسكريا الان).

· الافصاح عن أعداد و بيانات كل المدنيين الذين مثلوا امام المحاكم العسكرية منذ 25 يناير 2011 و حتى وقتنا هذا، وإعادة محاكمتهم جميعا أمام قاضيهم الطبيعي، خلال جدول زمني معلن قريب المدي.

· إسقاط كل الأحكام التي حكم بها على شباب الثورة – بما فيها الأحكام مع ايقاف التنفيذ- وتنفيذ الوعود بالأفراج عن باقي شباب الثورة المسجونين، تطبيقاً لنص المادة 99 من قانون القضاء العسكري ، خلال جدول زمني معلن قريب المدي.

· التحقيق في الانتهاكات التي ارتكبها بعض أفراد الجيش و الشرطة العسكرية تجاه المواطنين ( اعتداء جسدي، تعذيب،كشف عذرية المتظاهرات ، إلخ ) ووضع جدول زمني لسير التحقيقات ، والإعلان عن نتائج التحقيقات.

· تقديم اعتذار رسمي عن الانتهاكات التي ارتكبها بعض أفراد الجيش و الشرطة العسكرية تجاه المواطنين، و تعويض ضحايا التعذيب و المحاكمات العسكرية الظالمة.

---

تفاصيل لقاء وفد من مجموعة لا للمحاكمات العسكرية للمدنيين مع المجلس العسكري
13 يونيو 2011:

وفد مجموعة لا للمحاكمات العسكرية للمدنيين:المحامية راجية عمران (جبهة الدفاع عن متظاهري مصر) ,المحامي أحمد راغب (المدير التنفيذي لمركزهشام مبارك للقانون),منى سيف (منسق بالمجموعة) . و بمصاحبة الوفد الكاتبة أهداف سويف بالاضافة الى د. ممدوح حمزة, مصطفى اسماعيل و مروة عبدالله (تعرضا لمحاكمة عسكرية و قضيا بضع أيام في السجن) و شريف زهران.






ممثلي القوات المسلحة: اللواء الرويني, قائد المنطقة العسكرية المركزية, و الضابط المصدق على الأحكام, و أيضا عضو في المجلس الأعلى للقوات المسلحة


اللواء مجد الدين بركات: نائب رئيس القضاء العسكري, و رئيس جهة الطعون العسكرية ( اللي هي زي محكمة النقض)
أيضا اللواءات: سعيد عباس, توحيد توفيق, و علي القرشي


الرويني ابتدى بترحيب و بان الاجتماع ده 90% عشان يسمعونا و 10 %يتكلموا.
و كانوا عايزين يبقى ممدوح حمزة في الصدارة و هو اللي يدير الحوار, لكن ممدوح حمزة مشكورا قال ان أحمد راغب أقدر بده و قام و ترك راغب هو اللي في مواجهة الرويني .


في بداية الاجتماع أهداف سويف اتكلمت على ازاي الثوار رحبوا بالجيش و على ازاي المصريين راهنوا على ان جيشهم مختلف عن باقي الجيش, و أنهم أطمأنوا لهم بدون أي ضمانات , و ان احنا عايزن نحافظ على ده...الخ الخ...و ختمت كلامها بان المحاكمات العسكرية فعلا مشكلة, و يوجد تزايد في الغضب الشعبي بسبب الموضوع ده و انها مشكلة لازم تتحل عشان تتزن علاقتنا بجيشنا و القوات المسلحة .


كنا اتفقنا اننا هنبتدي الكلام ب"شباب الثورة ", مش عشان ليهم تفضيل عن باقي المدنيين, لكن عشان دي نقطة بشكل واضح جدا هم أصدروا عنها أكثر من بيان, و تكررت وعودهم بالافراج عنهم و برغم ذلك لسة فيه "شباب ثورة" في السجن.


لما ابتدينا كلام عن ده أنكروا وجود اي حد منهم في السجون, فقدمنالهم الملف و الاسامي, وِأشرنا لكل قضية منهم و ظروفها ( الوعد باعادة محاكمة محمد عادل, وجود شهود نفي لعمرو البحيري, ...)


المسئول عن القضاء العسكري كان بيرد على كل نقطة لينا بانه يذكرلنا الاجراءات اللي لازم نتبعها: تقديم طعون, تقديم بلاغ,..


و المحامين ردوا بشكل واضح ان احنا مش جايين نتعرف على الاجراءات المطلوبة لكن ده أجتماع المفروض ودي للوصول لحل للأزمة اللي احنا فيها.
كل حد اتكلم باستفاضة: راجية اتكلمت عن الاجراءات, و صعوبة وصولهم للمعلومات عن المتهمين, و منعهم من حضور التحقيقات مع موكليهم.


مروة و مصطفى حكوا تجربتهم و رصدوا الاهانات و الانتهاكات اللي اتعرضولها.و رصدوا غياب ضوابط العدالة في المحاكمة: منعهم من الكلام مع المحامي, منعهم من الكلام في التحقيقات, تغير التهم الموجهة ليهم, عدم ابلاغهم بالاحكام التي صدرت ضدهم.


مصطفى أشار لسوء المعاملة, حبس مجموعة كبير في مساحة شديدة الضيق لساعات بدون السماح لهم بالخروج لقضاء حاجاتهم, و بالتالي يضطروا يتصرفوا في ركن من الغرفة او في زجاجات. و أمرهم بعجم الكلام في المحاكمة و ضرب من يخالف الأمر, تركهم في وضع القرفصاء ساعات متتالية و ضرب اي شخص تصدر منه اي حركة.
مروة اشارت للشتائم و الاهانة, و اتكلمت عن سكب الماء في العنبر أكثر من مرة و مسحهم للأرض عشان يعرفوا يقعدوا في العنبر. و شددت على انها بقيت في السجن الى ان اعلنت الاضراب عن الطعام هي و زملاءها ثم اكتشفت انها حصلت على حكم مع ايقاف التنفيذ و برغم ذلك ابقوها في السجن بعد صدور الحكم أكثر من يوم!!






الاجتماع استمر أكثر من 4 ساعات فهاكتفي بالاشارة للحظات المهمة في رأيي


أهم حاجة في الاجتماع في تصوري هي انهم أول مرة يقعدوا مع مجموعة بتقفلهم على الواحدة و جايين محضرين معلومات موثقة, و بالتالي مش بيرموا افتراضات,لكن بيتكلموا على وقائع هم موثقينها و مستعدين لاثباتها.

• لما سألوا مصطفى اذا كان اتعذب و قال لأ بس زمايله في 9 مارس اتعذبوا, و هم أصروا ان ده كلام, و ان التعذيب بيتم عشان الحصول على معلومة او لوجود ثأر و الحالتين دول مش موجودين فليه الجيش هيعذب؟ قمنا و ووريناهم الصور ببيانات الشخص و باستعداده لتقديم شهادة رسمية هو و أخرين.
• اعترف اللواء الرويني بان تم اجراء فحوصات للتأكد من العذرية, ان ده اجراء بيتم بشكل عادي في السجن الحربي العمومي فقط لأنه سجن بيستقبل نساء و رجال و مش عايزين اي واحدة تتهمهم بفض بكارتها

• قالوا احنا بنقلل من التعامل مع المدنيين و ما احالناش مدنيين لمحاكمات عسكرية الفترة اللي فاتت , اتكلمنا على عمال بتروجيت, اصروا ان العمال مش بيتحاكموا عسكري, قمنا مديينهم الاسم و رقم القضية و ميعاد الجلس القادمة.

• أدعوا انهم ما استخدموش رصاص حي: سألناهم عن عاطف يحيى و الناس التانية اللي اتصابت برصاص حي امام السفارة الاسرائيلية.

• قالوا انهم ما يقدروش يحققوا في مزاعم انتهاكات من غير بلاغ, قلنا ان في بلاغات متقدمة بالفعل و أرقامها في الملف اللي معاهم, و هنقدم بلاغات تانية, و أكدنا على ضرورة انهم يفتحوا التحقيقات في الانتهاكات بدون ما المجني عليه يقدم بلاغ لان ده حق المواطنين عليهم

• وضحنالهم اننا في المجموعة كنا مترددين في قبول اللقاء و شاكين في جدواه لكن أملنا يخيبوا ظننا و يطلع فيه فائدة حقيقية منه

• لما حاولوا بيحبطوا محاولاتنا لاقتراح حلول عملية و بيذكرولنا اجراءات عقيمة لابد من عملها, كان المحامين بيردوا بذكر القوانين اللي تديهم الصلاحيات و السماحات للتغلب على الاجراءات دي لو هم جادين في رغبتهم في حل المشكلة.

• لما نائب رئيس القضاء العسكري كان بيوصف العملية القضائية بتتم ازاي في المحاكمات العسكرية و ضمانات العدالة اللي فيها, المحامين كانوا بيردوا من واقع خبرتهم العملية في الشهور السابقة مع المحاكمات العسكرية, و بيرصدوا انتهاكات واضحة لتحقيق العدالة.

الوعود المقدمة من اللواء حسن الرويني:
1- وعدوا بالنظر في قضايا ال 4 شباب الثورة, و قابلنا عقيد مسئول عن الشئون القانونية عندهم و سلمناه كل الملفات : شباب الثورة, عمال بتروجيت, اسماء مدنيين, مي متولي و هنكلمه يوم الخميس و نتابع معاه


2- وعد بالتحقيق الجدي في بلاغات الانتهاكات و بناءا عليه هنتوجه الأسبوع القادم بوفد من مواطنين تعرضوا لانتهاكات على يد الجيش و هنقدم سلسلة من البلاغات و هنعلن ده في مساحات الاعلام المختلفة و نفكرهم بوعد اللواء الرويني


3- أقترحنا احالة ملف المحاكمات العسكرية كله (كل قضايا المدنيين اللي اتحاكموا عسكريا من بداية الثورة لوقتنا هذا) على قاضي تحقيقات ينظر فيه و يكتب تقرير للمجلس الأعلى للقوات المسلحة.اللواء الرويني وعد بعرض الاقتراح ده على المجلس الأعلى للقوات المسلحة و البت فيه.




فيديو المؤتمر اللي اتعمل بعد اللقاء و فيديوهات مجموعة "لا للمحاكمات العسكرية للمدنيين" هتلاقوهم هنا

دة مش المجلس العسكري ...... دة الجناح العسكري للحزب الوطني


ليه مش الإخوان و غيرهم كانو بيتحاكموا عسكرياً قدام نفس الشخصيات دي ....... إيه إلي اتغير ؟؟؟؟؟


حسبي الله و نعم الوكيل

انا شايف إن فى إيجيابية ... إن هما بيعرضوا الحوار و يقابلوا و سمعوا ...

فى تطور عن الماضي إن مكنش حد بيعبر الشعب ....

اتلموا بقوا وسيبوا الناس تشتغل بلاش فضى يعنى عاوزين الحرامية والبلطجية وقطاع الطرق يطبق عليهم محاكمات عادلة؟ واضح انكم طمعانين فى مناصب اتهدوا بقى الناس قرفت منكم والله قرفت منكم ومش طايقاكم ونتيجة الأستفتاء قالت لكم ده وانتو مفيش احساس

اقتباس:

---

المشاركة الأصلية كتبت بواسطة youssef1967

اتلموا بقوا وسيبوا الناس تشتغل بلاش فضى يعنى عاوزين الحرامية والبلطجية وقطاع الطرق يطبق عليهم محاكمات عادلة؟ واضح انكم طمعانين فى مناصب اتهدوا بقى الناس قرفت منكم والله قرفت منكم ومش طايقاكم ونتيجة الأستفتاء قالت لكم ده وانتو مفيش احساس

---

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!
:majd(4)::majd(4)::waaaht::waaaht::ops::ops::8954[1]::8954[1]:

اقتباس:

---

المشاركة الأصلية كتبت بواسطة تامر.محمد

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!
:majd(4)::majd(4)::waaaht::waaaht::ops::ops::8954[1]::8954[1]:

---

يا تامر فين توقيعك القديم ؟؟؟؟؟ هي دي الناس إلي كان التوقيع بيكلم عليها

اقتباس:

---

المشاركة الأصلية كتبت بواسطة youssef1967

اتلموا بقوا وسيبوا الناس تشتغل بلاش فضى يعنى عاوزين الحرامية والبلطجية وقطاع الطرق يطبق عليهم محاكمات عادلة؟ واضح انكم طمعانين فى مناصب اتهدوا بقى الناس قرفت منكم والله قرفت منكم ومش طايقاكم ونتيجة الأستفتاء قالت لكم ده وانتو مفيش احساس

---

المحاكمة العادلة من حق أى حد يا أستاذى

حضرتك لخبطت كذا موضوع فى بعض فى ردك ... ايه اللى جاب نتيجة الإستفتاء للوفد ده اللى راح يقابل المجلس العسكرى ...
اوعى حضرتك تكون فاكر إن مصر تم تقسيمها لشباب ثورة قالوا لأ فى الإستفتاء و شعب قال نعم ... لو حضرتك فاهم كده تبقى غلطان جداً ... مينفعش أساساً يتم تقسيم الناس على الأساس ده.


(الله يخرب بيتك ياللى فى بالى ياللى وصلتنا للحالة دى!)

الجيش المصرى عايش فى مييييغة وانا شايف ان الجيش وطنطاوى مابيعملوش حاجة اصلاااااا ووظيفة ضابط الجيش ماهى الا مرتب كبير جداااااا وشغل مافييييييش ومميزات بالعبيططططط ونوادى ومصايف بلاااااش ومعاش كبير جدااااااا ومكفائة نهاية خدمة كبيرة جداااااااا على ايه انا مش عارف وهما مش بيشتغلوااا ولا بيعملو حاجة اصلاااا

عندنا واحدة جارتنا خارجة معاش رتبة ملازم اول هههههههههوخارجة عندها ٣٠ سنة بتقولى كل ظمايلها الدفعة دى خرجوهم معاااااش..واخدوا كل مستحقاتهم كاااااملة وكافئة ٦٠ الف جنيه ...ومعاشها ٢٠٠٠ ولسة زايدة ١٥ % كمااان غير كلفترة بيصفولهم شهر كمان ليه انا مش عارف واحدة قاعدة فى بيتها ولا بتعمل اى حاجة وبتاخد كل دة واحنا اللى اتعلمنا وطلع عين اهالينا مابناخدش نص الفلوس دى ازاااااااااى وليه حد يرد عليا ..

اقتباس:

---

المشاركة الأصلية كتبت بواسطة hobiko

يا تامر فين توقيعك القديم ؟؟؟؟؟ هي دي الناس إلي كان التوقيع بيكلم عليها

---

انا صعقت يا جدع

اقتباس:

---

المشاركة الأصلية كتبت بواسطة i_am_legend

الجيش المصرى عايش فى مييييغة وانا شايف ان الجيش وطنطاوى مابيعملوش حاجة اصلاااااا ووظيفة ضابط الجيش ماهى الا مرتب كبير جداااااا وشغل مافييييييش ومميزات بالعبيططططط ونوادى ومصايف بلاااااش ومعاش كبير جدااااااا ومكفائة نهاية خدمة كبيرة جداااااااا على ايه انا مش عارف وهما مش بيشتغلوااا ولا بيعملو حاجة اصلاااا

---

هو أنت تعرف مرتبات ضباط الجيش

لو واحد بيشتغل فى مكان والنهارده فى 2011 بيقبض 2600 جنيه

عارف بقاله كام سنه ضابط , بقاله 18 سنه ورتبته عقيد

الكلام ده سواء كان حربيه أو مهندس أو طبيب , كلهم نفس المعامله الماديه

لو واحد لسه متخرج وراح أشتغل بياع فى شركة محمول هياخد قد أيه ؟

لو مهندس لسه متخرج ( ومهندسين المنتدى كتير ) هيشتغل بكام فى أى شركه أو مكتب

ممكن تقولى رأيك فى المرتب ده

تعرف أن مكافئة نهاية الخدمه لعقيد بعد 20 سنه خدمه ماتجبش عربيه ثمنها 70 ألف جنيه , يعنى ما يعرفش يركب عربيه زى اللى باباك جايبهالك

طبعا أنت لو بتشتغل أى شغلانه بترجع الساعه 4 لبيتك تتغدى وتاخد دش وتنام فى التكييف وبالليل تروح النادى أو تخرج مع أصحابك

وبتاع الجيش اللى أنت شايفه قاعد فى ميغه , قاعد فى الجبل وبياكل تعيين ميرى وبيشرب ميه بعد ما يقطع كعب زجاجه مياه ويحط فيها قطن علشان يفلتر الميه من الرمل

وكل ده وسايب مراته وعياله لوحدهم فى البيت لمدة 3 أسابيع أو شهر حسب الشغل ويرجعلهم 5 أيام بس

لكن أنت شايف أنه مبيشتغلش ومابيعملش حاجه أصلا

اللى بتقول عليهم بياخدوا مميزات بالعبيط كان ممكن مرتبهم يتضاعف عشر مرات بعد ما نزلوا الشارع فى بداية الثوره ومحدش كان هيقدر يفتح بقه ( زى ما ناس كتير عملوا أعتصامات وزودوا مرتباتهم وقللوا ساعات عملهم ) وأى واحد كان هيقول حقهم ماهم نايمين ليل نهار فى الشارع علشانا , أنما هما ما عملوش كده

مش مكسوف من نفسك وأنت بتقول الكلام ده على واحد شايل الطين وعارف أنه ممكن يموت فى أى مناوره ( مش حرب ) علشان أنت تقعد فى بيتك فى التكييف

بكره لما تتخرج من كليتك وتدخل الجيش هتعرف هما عايشين أزاى

ياعم الحج ايه اللى انت بتقولة دة اولا انا مش طالب ..انا اتخرجت من ٣ سنين!..ثانيا ا.احترم نفسك فى الكلام معايا...ثالثا انت مش هاتعرف اكتر منى عن الجيش واللى فيه..لان نص عليتنا فى الجيش ورتب ..وهما بلسانهم كدة خش اى حاجة جيش الجيش مييييييغة..وياريت تهدى شوية..وانا مهندس على فكرة..وابويا ماجبليش عربيات ولا حاجة.ماشى ياعم.!

اقتباس:

---

المشاركة الأصلية كتبت بواسطة i_am_legend

الجيش المصرى عايش فى مييييغة وانا شايف ان الجيش وطنطاوى مابيعملوش حاجة اصلاااااا ووظيفة ضابط الجيش ماهى الا مرتب كبير جداااااا وشغل مافييييييش ومميزات بالعبيططططط ونوادى ومصايف بلاااااش ومعاش كبير جدااااااا ومكفائة نهاية خدمة كبيرة جداااااااا على ايه انا مش عارف وهما مش بيشتغلوااا ولا بيعملو حاجة اصلاااا

---

اقتباس:

---

المشاركة الأصلية كتبت بواسطة i_am_legend

اولا انا مش طالب ..انا اتخرجت من ٣ سنين!..

ثالثا انت مش هاتعرف اكتر منى عن الجيش واللى فيه..لان نص عليتنا فى الجيش ورتب ..وهما بلسانهم كدة خش اى حاجة جيش الجيش مييييييغة....وانا مهندس على فكرة..!

---

أنا هتكلم بأعتبار أن الكلام ده قيل لك فأذن العهده على الراوى

أنا مقدم مهندس وفاضلى ( أن شاء الله ) 6 شهور وأكون عقيد وده مرتبى فعلا ( أو بالأدق أجمالى دخلى ) ودى فعلا مكافأة نهاية الخدمه لو خرجت معاش.

لو حد فى عيلة حضرتك ضابط وقالك على المرتبات الخياليه حضرتك قولى رتبته وأنا أقولك أجمالى دخله كام بالضبط وممكن حضرتك تطلب منه أستمارة أجمالى المرتب وتتأكد

وبمناسبة أن حضرتك مهندس زى حالاتى ومتخرج من 3 سنين شوف مرتبك كام ( ربنا يباركلك فيه ) وشوف مرتبى وأنا خريج سنة 93

دى مش مقارنه لأن ده رزقى اللى ربنا كاتبهولى من الجيش ( الحمد لله )بس بوضح أن ضباط الجيش مرتباتهم مش خياليه بالعكس - أبسولوتلى - ههههههه

وأنا بتكلم معاك من غير حده ( عكس الحوار من العضو الأخر ) لأن فيه ناس فعلا فاكره أن ضباط الجيش مرتباتهم خياليه وواحد صاحبى ما صدقنيش ألا لما وريته أستمارة أجمالى دخلى

لكن بالنسبه لموضوع الميغه مش هتكلم فيها لأنى مش متقبل يتقال عليا أو على زمايلى كده .

تقبل تحياتى

يا باشمهندس شرف.. بقولك واحدة ممرضةةةةةةةة من بتوع مستشفى المعادى دول..بقول لحضرتك معاشاها ٢٠٠٠ جنيه تقدر تقولى ازاى..وبقولك خرجوها هى والدفعة بتاعتها كلهاااااا واخدوا نمكافئة نهاية الخدمة كااااملة وهى سنها اصلا ماوصلش ل٣٥ سنة يبقى تقول ايه بقى..هى نفسها بتقعد تضحك ومستغربة مع حبى واحترامى الشديد لكل افراد القوات المسلحة...

على فكرة كلام استاذ شرف صحيح

انا جالي اكتئاب من حالات الخطف و الاغتصاب اللي بتحصل كل يوم قدام الناس وفي عز الضهر

دول نحاكمهم محاكمات عسكرية و يتعدموا في 24 ساعة قدام الناس كلها ليكونوا عبرة للكلاب امثالهم

و لا نسيب عمو شرف يطبطب عليهم ؟

اذا ما كانتش احكام قانون الطوارىء تطبق الان فمتي اذن ؟

انا مش عارف ليه فيه ناس عايشة في برج عالي مش حاسسه بالغلابة و الفقراء و الناس اللي مش عايشف في امان و مش عا رفة تخرج من بيوتها في امان الله ؟

و لا لازم يكون فيه ضحايا لكل ثورة طالما احنا مش من ضمن الضحايا ؟


اتقوا الله في الشعب و لا تحكموا بأهواثكم :

الاعدام للقتلو و المغتصبين لنعش في امان

كفاية دلع خايب و لتذهب حكومه (نانسي) الي الجحيم - ربنا حيحاسبهم علي كل واحد بيتهان و بيتعرض للبلطجه و الترويع

ربنا اللي حيحاسي مش شباب التحرير !!!!

ربنا اللي حيحاسب

و الله الذي لا اله الا هو لنا لو مكان حد من الضحايا او من اهاليهم كنت ولعت في الكلاب دول مش حاكمتهم محاكمات عسكرية هما و اللي يتشددلهم

هما اعضاء حكومه نانسي و شباب الفيس بوك عليهم حراسة 24 ساعة و لا مش حاسين بالشعب الغلبان و لا ما بيقروش صفحة الحوادث

و بعدين يتقال عليهم نشطاء سياسيين !!!!!

اعذروني لانفعالي بس والله انا قرفت من كمية البلطجة في كل متر في مصر و اولي الامر ايدهم في تلاجة من اول عصام شرف الي وزارة الداخلية الي الناس اللي عمالة تهبل في الشوارع و كاه بالدراع

يا جماعه احنا مش حنخترع العجله

حريتك محدوده بحقوق الاخرين و بالدين و العرف و القانون وليس يالاراء الشخصية لرئيس الوزرا (ان الشعب تعبان و سيبه يعبر )

فيه حقوق و واجبات مش حقوق بس او حرية بلا ضوابط

مش يبقي البلطجي يبلطج و (النشطاء ) يدافعوا عن حقوقه و الضحايا يولعوا بجاز !!!!

اقتباس:

---

المشاركة الأصلية كتبت بواسطة د.اشرف هنداوى

ربنا اللي حيحاسب

---

اقتباس:

---

المشاركة الأصلية كتبت بواسطة د.اشرف هنداوى

و الله الذي لا اله الا هو لنا لو مكان حد من الضحايا او من اهاليهم كنت ولعت في الكلاب دول مش حاكمتهم محاكمات عسكرية هما و اللي يتشددلهم
هما اعضاء حكومه نانسي و شباب الفيس بوك عليهم حراسة 24 ساعة و لا مش حاسين بالشعب الغلبان و لا ما بيقروش صفحة الحوادث
و بعدين يتقال عليهم نشطاء سياسيين !!!!!
اعذروني لانفعالي بس والله انا قرفت من كمية البلطجة في كل متر في مصر و اولي الامر ايدهم في تلاجة من اول عصام شرف الي وزارة الداخلية الي الناس اللي عمالة تهبل في الشوارع و كاه بالدراع
يا جماعه احنا مش حنخترع العجله
حريتك محدوده بحقوق الاخرين و بالدين و العرف و القانون وليس يالاراء الشخصية لرئيس الوزرا (ان الشعب تعبان و سيبه يعبر )
فيه حقوق و واجبات مش حقوق بس او حرية بلا ضوابط
مش يبقي البلطجي يبلطج و (النشطاء ) يدافعوا عن حقوقه و الضحايا يولعوا بجاز !!!!

---

النظرية مش كده
النظرية ان اللي عمل يتحاسب قدام القاضي الطبيعي و اكيد هاياخد جزاته

فيه ابرياء كتير اوي راحوا في موضوع المحاكمات العسكرية ده, فبرده حرام , زي ما احنا خايفين على نفسنا ما ينفعش نضحي بواحد اتاخد ظلم

هناك قول قد يصح أو قد يخطىء لكنى مقتنع به ... خير أن يبريء مسيء من أن يدان بريء.

اقتباس:

---

المشاركة الأصلية كتبت بواسطة i_am_legend

يا باشمهندس شرف.. بقولك واحدة ممرضةةةةةةةة من بتوع مستشفى المعادى دول..بقول لحضرتك معاشاها ٢٠٠٠ جنيه تقدر تقولى ازاى..وبقولك خرجوها هى والدفعة بتاعتها كلهاااااا واخدوا نمكافئة نهاية الخدمة كااااملة وهى سنها اصلا ماوصلش ل٣٥ سنة يبقى تقول ايه بقى..هى نفسها بتقعد تضحك ومستغربة مع حبى واحترامى الشديد لكل افراد القوات المسلحة...

---

الموضوع بسيط

الممرضات دخلوا الجيش وهما عندهم حوالى 15 سنه

وفضلوا يترقوا من عريف لشاويش لصول وعند الترقى لضابط بيخرجوا معاش لأنهم بيمضوا أقرار عند الدخول بعدم الترقى لضابط

وسبب الأقرار لأن فيه معهد تانى بيخرج ممرضات برتبة ضباط , زى اللى بيتطوع فى الجيش واللى بيدخل كليه عسكريه

يعنى هى خرجت معاش عادى بعد حوالى عشرين سنه خدمه فى الجيش , تفتكر 2000 جنيه معاش بعد عشرين سنه خدمه مبلغ خيالى ولا بسيط

أعتقد أنى وضحت الأمور بالنسبه لموضوع الممرضه

بالنسبه للضباط زى حالاتى مستنى ردك بخصوص الدخل الخاص بهم بعد سؤالك لقرايبك الضباط زى ما أتفقنا

مع تحياتى