الموضوع: الدليل الموقر فى عمل المفتاح المشفر

ايوا هما, فى ضهر السلاب اللى فى جوزيف تيتو

انا من اسكندريه
واللى اعرفهم بيعملوا المفاتيح المشفره اتنين واحد اسمه عباس فى رشدى على شارع ابو قير والتانى اسمه صلاح فى ماركت زهران بتاع سموحه رحت عند عباس الاول علشان على سكتى وكان لوحده فى المحل فقاللى تعالى بكره قلت ماشى سهله مع العلم ان الركنه هناك صعبه جدا ورحت له تانى يوم لقيته فاضى خالص ومعاه اتنين قلت حلو كده هخلص على السريع ولسه بكلمه قالى لا تعالى بكره
ليه بس يا عم
هو انت عربيتك موديل كام
فيكترا 96 بس انا حاطط موتور 2000
يبقى لازم تجيبلى السيكيورتى كود من التوكيل
ازاى
تروح بالرخصه علشان تثبت الملكيه وتخليهم ياخدوا رقم الموتور مش الشاسيه ويطلعوا السيكيورتى بتاع المكنه وتجيبهولى انا اعملك مفتاح
طيب انا عاوز اطلع الشفره من الكونتاك لان المفتاح اللى معايا شفرته ملزوقه على الكونتاك
لا ممكن تتكسر معايا وانا بطلعها والعربيه تقف خالص لانها ملزوقه بأمير
حسيت انه مش عاوز يشتغل
وسالت واحد صاحبى قالى برضه فى التوكيل هيقرفوك
قلت اطلع على صلاح اللى فى زهران سموحه والركنه طبعا اسهل مع كميه السيارات الكبيره لزهران
دخلت زهران على اليمين زى ما اتوصفلى لقيته شاب محترم واخد بارتيشن صغير جنب الكاشيرات
قلتله انا عايز ايه بسرعه
رد بان الموضوع سهل هياخد ربع ساعه وهيتكلف 200 جنيه
قلتله بس انا اعرف ان المفتاح بيتكلف 150 بس قالى 150 مفتاح و50 استخراج الشفره من الكونتاك ووضعها فى المفتاح تانى فعرفت انها تسعيره لان عباس قاللى نفس الكلام تقريبا
قلتله تمام اشتغل جابلى كرسى والراجل بتاعه راح حل الايموبليزر من على الكونتاك لقيت الموضوع سهل جدا والشفره ملزوقه بحتة شيكرتون
فبصراحه رحت مفاصل معاه ونزلت 25 جنيه المهم بعدها حط الشفره على جهاز طلع على الشاشه رقم كبير جدا وهو ده الكود بتاع الشفره او الفحمايه زى ما بيقولوا
بعدها راح بجهاز تانى صغير على العربيه لمدة خمس دقايق تقريبا و رجع قاللى خلاص هنقفل بس وفعلا بعد التقفيل جربت الاتنين لقيت كله تمام
قلتله الله ينور ولازم اعملك دعايه علشان فيه ناس كتير على المنتدى عاوزين حد يعمل المفتاح المشفر فى اسكندريه ومش عارفين فين ونسيت اقولكم انا سالته هو لازم العربيه تكون معايا وانا بعمل المفتاح المشفر رد بان مش كل الانواع
وكمان قاللى ممكن اجيبلك السيكيورتى كود من جهاز عنده ( توكن ) بس هيبقى فيه تكلفه 100 جنيه وهيبقى فى التوكيل ارخص من كده
احترمت صراحته معايا وعجبتنى المعامله معاه وقلتله على المنتدى رد بانه هيدخل يشوفه واستغربت انه ما دخلهوش قبل كده
ودى كانت تجربتى ارجو ان تفيد احد من الاعضاء واسف على الاطاله

لو ممكن يا جماعة حد يفيدني في كارت رينو فلوانس ضاع من السايس بتاع الجراج و مش لاقي حد بيعمله في القاهرة و التوكيل بيطلب ارقام خزعبلية و الأستلام بعد شهر و بصراحة انا خايف العربية تتسرق

برجاء تحديد محل لاصلاح ريموت السيارة فى الاسكندرية

المشاركة الأصلية كتبت بواسطة mahmoudysf

موجود في اول صفحة مفتاح النوبيرا ب 100 جنية
ده العادي ولا اللي فيه ريموت

الكلام هنا غلى المفتاح المشفر طالما مقالش مفتاح بريموت
وبالنسبة للمفتاح العادي بتاع النوبيرا القصد هنا على المفتاح المشفر
النوبيرا الي بتيجي معاقين بتنزل فيها ايموبلايزر
ودا بيكون غالبا فيه تشفير حاجة اسمها
t5
ودي غالبا بتتنسخ بسهوله علشان كده سعرها رخيص