-
موضوع عاملي أزمة شديدة
أنا مش عارف أبدأ منين...
الموضوع وما فيه.أنا مرتبط ببنت إرتباط قوي جدا بقالي 7 سنين.وطول الـ 7 سنين دول كنت في مشاكل لا حصر لها مع أهلي عشانها.كان والدي ووالدتي مش راضيين عن الموضوع ولا موافقين.وبدون أسباب مقنعة.وده راجع لإصرار والدتي علي زواجي من بنت صاحبتها اللي أنا مبطيقهاش أساسا.
المهم بعد ما إنتهينا من موضوع بنت صاحبتها ده.الحمد لله قدرت أقنع والدي بالبنت اللي أنا عاوزها .وكان واقف في صفي في الموضوع ده من حوالي 6 شهور لحد إمبارح.
وهو قال لوالدتي أنا هروح أقابل الناس مع إبني عشان مصغروش وعشان أحكم علي البنت بما يرضي الله.ولو عاوزة تيجي المقابلة دي أهلا وسهلا مش عاوزة براحتك.وبالفعل يوم التلات اللي فات والدي طلب مني أكلم البنت وأحدد معاها معاد المقابلة دي تكون يوم الجمعة اللي هو إمبارح.وكنت في غاية السعادة إن بعد عذاب دام 7 سنين وصراعات نفسية ومعنوية ربنا أكرمني بموافقة والدي علي الزيارة دي وبدأت أتفائل.
المهم روحت أنا ووالدي وخالي الكبير وأخويا الأصغر مني وطبعا والدتي أصرت علي موقفها بعند شديد ومستفز في نفس الوقت.وكأن للأسف شغلها الشاغل خراب الموضوع بصرف النظر عن الخسائر النفسية مهما كانت شدتها.
المهم روحنا وقابلنا البنت وكان معاها والدتها وأخوتها الكبار وزوج أختها وخالها.وتمت المقابلة برة البيت منعا للإحراج من ناحية عدم موافقة والدتي علي المقابلة دي.
وبدأت القاعدة ومتكلمناش في تفاصيل ولكن كان في هات وخد في الكلام وبنحكي في أي حاجة وكان باين علي وجه والدي الإرتياح النفسي من ناحية الناس دول.وأنا كنت في غاية السعادة وقولت يا رب تمم علي خير.وإنتهت المقابلة علي خير ووالدة البنت قالت المرة اللي جاية إن شاء الله عندنا في البيت.ورد والدي قالها إن شاء الله.
لحد كده تمام....
سلمنا علي الناس وركبنا العربية.والدي سأل خالي إيه رأيك.رد عليه وقال عادي معنديش أي تحفظ عليهم.إنت رأيك إيه..رد والدي وقال إنهم ناس بسطاء ومش متكلفين وطيبين.وبصلي كده قاللي بس إنت مش واخد بالك إنهم تجاهلوا أمك.ومجبوش سيرتها..
أنا سمعت الكلمتين دول وإتصدمت.ورديت قولت إني مفهم الناس إن والدتي مش جاية عشان كده مسألوش.قالي بس كان المفروض حتي يسألوا يقولوا المدام عاملة إيه....أنا قولت بسسسسسسسسس دي كده تلكيكة بقي.وواضح إن فيه إتفاق مسبق علي تخريب الموضوع بأي تلكيكة.
طبعا أنا صعقت من الكلام اللي بسمعه خاصة إن كنت فاكر موقف والدي إتغير وبقي معايا وفجأة إتقلب ضدي لأسباب شكلية ليس إلا.ومش لاقي تعبير ينفع غير كده.المهم روحنا البيت.وفجأة أسمعه بيقول لأمي دول مسألوش عليكي...بسسسسس أمي مسكت في الكلمة دي ودب دب دب دب دب ......
ولقيت أبويا بيقولي أمك لازم ترضيها وتنفذ رغبتها مهما كان ومهما كنت هتخسر. ( كلام تقفيل )
النقطة اللي أنا مقولتهاش لأبويا وعاوز أخد رأيكم أقولها ولا لا...إن والدة البنت قبل ما ينزلوا من بيتهم قالت لها مش هنجيب سيرة والدته خالص عشان منسببش إحراج لوالده..يعني نيتهم مش تجاهل زي ما والدي تكرم ووصف الصورة كده.لا ده نيتهم عدم إحراجه بالسؤال عنها لأنهم عارفين موقفها.ووالدة البنت رغم ذلك مرحبة بيا ومقدرة إني شاري بنتها ورأيها إن والدتي مسيرها تغير فكرة الكره البين ده بعد ما تعرف الناس علي حقيقتهم.
ده كل اللي حصل.وآخر حاجة قولتها لأمي وأبويا إني مش قادر أتكلم في حاجة دلوقتي ومحتاج وقت أرتب فيه الكلام اللي عاوز أقوله.
أنا اللي مجنني موقف أبويا لما كان جنبي وبيفكر ويخطط معايا.وكمان مقابلته الكويسة جدا للناس ورأيه فيهم إنهم كويسين.وفجأة يتلكك كده بحجة التجاهل اللي هي مش صحيحة أصلا.
أنا مش عارف أعمل إيه.والموضوع ده أنا مش هتكسف منكم وأقول إنه يساوي حياتي.يعني من الآخر البنت دي هي نهاية المطاف بالنسبة لي...
أرجوكم ساعدوني مساعدة مجزية ربنا يجازيكم خير مقدما..أخوكم أحمد...
آسف علي الإطاله وشكرا
-
انا مليش خبره خالص فى الامور دى بس لو انا مكانك هاخد والدتى فى مكان بره البيت واضح انك من الجيزه فروح معاها كافيه هادى على النيل او اى حته هى بتحبها و بترتاح فيها نفسيا و خليك كريم معاها شويه يعنى حتى لو اتغديتوا بره و بعد ما تخلص كل حاجه ابتدى اتكلم معاها فى الموضوع و هما حلين هتكون اسبابك قويه و هتقتدر تقنعها بحبك للبنت دى و انها كويسه و سعادتك هتكون معاها هى بس- و حاول تركز اوى على الحته دى- او هتكون اسباب والدتك الاقوى و ساعتها مش هقولك غير : " وقضى ربك ألا تعبدوا إلا اياه وبالوالدين احساناً" صدق الله العظيم
-
ها تلعب على اتجاهين يا سيدي الفاضل !! الإتجاه الاول انك تاخد والدك !! وتفهموا اللي حصل والناس كات قايلالك ايه !! وده كان شق والعب على حتة انه والدك ودي رغبتك وانه اكيد يهموا سعادتك ومش ها يدور على سبب لتعاستك !!
الشق الثاني خالك :d :d تأثيره ايه على والدة حضرتك ؟؟ لأنه واضح انه والدك مش ها ينفع مع والدتك ولكن خالك ممكن يكون ليه سيطرة اكبر في انه يقنعها !! شوف والدتك كمان قولها اديني اسباب 1 2 3 كده ليه لأ !! لو مجابتش سيرة بنت صاحبتها احرجها وقولها يعني مش لأ عشان كذى كذى كذى ؟ بس خليك دائما بتلعب على انك تخليهم في صفك في ضدك !!
-
متااااابع لانى تقريبا عندى نفس المشكله
-
بص ان فى كلمة دايما بقولها لوالدتى لما بتبقى مصممة على حاجة : وحياتى عندك!!!!!!!!!!!!
جرب الكلمة دى و ربنا يوفقك ان شاء الله
-
غلطتك انك خبيت علي والدك نقطه انهم مش عاوزين يجيبو سيره والدتك عشان الاحراج ..لانها نقطه تحسب ليهم مش عليهم
فهم والدك الحقيقه
واقنعه و خليه فى صفك تانى ..
بعد كده سيبه يتعامل مع الوالده ..وبلاش تزن ..(عشان متزهقش) ..كلمها اه فى الحوار بس من غير زن ...
ان شاء الله خير
اهم حاجه تعزمنى على الفرح
-
السلام عليكم فى البداية .انا هاقول لحضرتك راْيى .
اعتقد ان عليك انك تتكلم بالعقل مع والدك ومع والدتك .بس كل واحد لوحده .
بس من غير ما تخرج معاها علشان هيه هتحس انك عايز حاجة .وعايز تاْثر عليها .
وده حاليا مش مطلوب انها تحس بيه علشان ما تبقاش هيه رافضة من البداية من قبل ما تكلمها .
اما والد حضرتك كلمه بالعقل زى ما قال الزملاء انه يقول لك سبب الرفض كذا وكذا .مش رفض للرفض فقط
ولازم توضح ليهم هما الاتنين والدك ووالدتك ليها مامتها ما جبتش سيرة والدتك ليه وما ساْلتش عليها ليه .
وان الغرض عدم احراج والدك وليس اهمال منهم .
واعتقد انهم هيحسوا ان هذه السيدة محترمة اد ايه وذوق اد ايه ومقدرة لكل الظروف .
وفى الاخر والاول ربنا مش هيعمل الا اللى فيه الخير .وكل شىْ قسمة ونصيب .
بس خليك محارب لاخر لحظة واعمل كل ما فى استطاعتك علشان ما تحسش انك قصرت فى حاجة .
وربنا يوفقك للخير ان شاء الله .وربنا اعلم بالخير فين .
تقبل تحياتى وان شاء الله نبارك لك قريب
-
والله نفس المشكله اللى كانت عندى بالظبط بس ماما كانت عاوزة تجوزنى وحدة قربتى وانا كنت مرتبط ببنت جرتنا ومعانة سنين والله
وعاوز اقلك ولدتى بعد ما شافت الناس اول مرة وقعدت مع البنت الموضوع اتغير خااااااااااالص وقالت ربنا يسعدك حاول تجمعهم مع بعض
وبلغ ولدتك ان ديه حياتك وان محدش ينفع يدخل فى الموضوع ده ابدا الا انت مهما حصلل متتنزلش ابدااااااااا والا هتندم
اولا يا ريس قول للوالدة انك لو اتجوزت اللى هيا عاوزها والله او مشكله بينكو هتقول ربنا يسمحك يا ماما او يا بابا
انما اختيارك انت مش هتندم ابدا
وربنا يعينك انا عيشة فى المعانه ديه فترة كبيرة والله بس الحمد لله دلوقتى انا خاطب البنت والحمد لله ربنا مسهلها الحمد لله
بس متتنزلش ابدا مهما حصل
-
متشكر جدا يا جماعة...أنا بعت رسالة لوالدي علي تليفونه وطلبت منه إني أقعد معاه بكرة إن شاء الله في مكتبه.إدعولي أمانة عليكم.
-
أولا كان لازم تعرف باباك النققطة دى من الأول ..حاول تفهمه الحقيقة
بالنسبة للوالدة كان عندى مشكلة قريبة من كده فى الأول بس بعد ما شافتها الفكرة اتغيرت ومع المعاملة والعشرة بقت بتحبها اكتر منى اصلا :)
Content Relevant URLs by
vBSEO 3.6.0 PL2