يا ترى بتلاقوا وقت للقراءة؟ لو آه طيب بتقروا ايه؟

وحشتني القراءة :rolleyes:

بقالي فترة مش بافتح كتاب.. حاسة ان مخي صدى.. خصوصا في الفترة الأخيرة دي من ساعة ما اشتريت العربية و انشغلت بموضوع السواقة.. طبعا ده غير طبعا اني اشتركت في نايل موتورز.. النت عموما بياخد كتير من وقتي.. انما قبل ما انشغل كنت باقرا كتير لمصطفى محمود اللي بدأت أقرا له أصلا من سن إعدادي و عبد الوهاب مطاوع اللي بافكر جديا أنقل مقالاته اللي عجبتني و أثرت فية هنا في المنتدى.. طبعا انا أقصد المقالات اللي من كتابته هو، مش قصص الحياة و المشاكل اللي هو كان بيحلها رحمة الله عليه.

فاروق جويدة برضه من الناس اللي باحب اقرا له و متابعة عموده الأسبوعي في أهرام الجمعة.. مهموم هو جدا بهموم البلد دي :o

مين تاني هنا بيقرا؟ و بيقرا ايه و لمين؟ ممكن نستفيد من بعض بنوعية الكتاب و الكتب اللي ممكن نقراها و نشجع بعض كمان على العودة للقراءة :)

انا الصراحه بقرا
اخر كتاب قريته كان مليونير فى دقيقه
كتاب اجنبى مترجم
كان تمنه 249دولار

........................No No No

بصى يا علا الواحد بعد ما خلص دراسه حاس ان مخه صدا بجد لاننا مش بنمسك كتب طبعا مفيش وقت عند الكثير منا

بس وقت ما تحسى انك مضايقه لو عاوزه الحل امسكى لك كتاب واقرائى هتنسى الحاله النفسيه اللى انتى فيها

طبعا وخير الكتب كتاب الله و اكثر الكتاب اللى بدفع فيها فلوس وانا مبسوطه انى بشتريها كلها كتب بتخص الدين بكل ما يحتوى
اغلبها كتب اسلاميه
وبعدها كتب تخص علم النفس
واكثر شخص اقرء له الدكتور ابراهيم الفقى

طبعا الروايات والقصص بصراحه بستخسر اشتريها بحسها مضيع للوقت والتفكير والفلوس كمان فى شى تافهه

انا فاكر اخر كتاب قريته تقريبا كان ميكي جيب :d :d

أنا اقرا أي حاجة لأي حد في أي فرع من فروع العلم!! بس برضه بقالي كتير ماقريتش ومخي ابتدى يعطل :(

آخر كتاب فرأته وعجبني جدا جدا كتاب "خديعة التطور" للدكتور "هارون يحيى" -اسم حركي أو اسم شهرة لعالمٍ تركي- كتاب ممتاز في الجزء العلمي، آخر فصلين زنق نفسه في الفلسفة وانا مافهمتش اي حاجة- الكتاب حوالي 500 صفحة خلصوا كلهم في يومين من فرط السلاسة والاختصار.

من يومين طلعت كتاب "فجر الإسلام" للدكتور أحمد أمين -بصراحة هو اللي طلعلي مش انا اللي طلعته- انتقيت كام فصل قريتهم ونويت ابتدي اقراه كاملاً، أعيد قراءته بمعنى أصح.

عاوز اقرا الجزء التالت من السيرة الهلالية لـ "عَبرُحمان الأبنودي" بس هأجله شوية.

عاوز اعيد قراءة الدواوين الكبيرة لجرير (حبيب قلبي) والفرزدق، والأشعار الجاهلية بس مش فاضي والحاجت دي قريتها ايام ماكنت عضو في مكتبة مبارك، مش موجودة في البيت، بافكر جدياً في إعادة الاشتراك عشان ارجع اقرا إجباري.

موضوع نكسة يونيو فكرني بكتاب الانفجار اللي عاوز اقراه تاني (اللي قريته قبل امتحان الاحتمالات زمان أيام الكلية)

ضاعت مني نسخة كتاب "ثلاثة رجال في قارب" النسخة العربية لـ "جيروم ك. جيروم" كتاب آخر مسخرة وباحبه جدا، بجد لو حد بيحب القصص يقرا القصة دي، تفطس من الضحك وبتستعرض نماذج غريبة من البشر وبنلاقيهم كلهم في حياتنا. نفسي الاقي الكتاب تاني او اشتري نسخة جديدة.

طبعا التسالي الصغيرة باقزقزها في السريع زي -إحم إحم- "رجل المستحيل" و "ملف المستقبل" و "ما وراء الطبيعة" لو كنت زهقان باسحب واحدة في السريع ونص ساعة زمن تكون خلصانة.

السلام عليكم
فعلا بقى عشان الواحد يلاقى وقت للقرأة بقى صعب جدا
بس الحمدلله بحاول على قد مقدر أبقى مخصص ساعة على الاقل فى اليوم.
بحب أقرا لهيكل و بشكل عام بحب اقراء فى التاريخ و السياسة.

موضوع هايل يا علا ...سبقتيني :o... كان نفسي أعمل موضوع عن الكتب يلخص فيه كل مشارك كتاب عجبه
القراءة مهم جدا بالنسبة لي.. بس للاسف وقتي مضغوط جدا ...نفسي ألاقي وقت أكتر ....حاليا مشتبك مع ٣ كتب نفسي أخلصهم..... الأول كتاب الفتنة الكبرى لطه حسين (لسة في الجزء الاول الخاص بسيدنا عثمان ) المشكلة إن الواحد لازم يركز أوي و هو بيقرأ لطه حسين ....الأسلوب أكتر من رائع بس عايز دماغ مصحصحة
التاني قصة فلسفية لكاتب برازيلي اسمها "The Alchemist" إسم الكاتب باولو كويليو... بتتكلم عن قصة رمزية تصف مطاردة الانسان لأحلامه و تتطرق لمعني الحياه و الحب و السفر بطريقة في منتهى البساطة و العمق في نفس الوقت
التالت مصيبة اسمها "Guns، Germs & Steel" لكاتب أمريكي إسمه جاريد ديموند عن تاريخ الحضارة الانسانية و تطورها من قديم الأزل للوقت الحالي لسة بأقول يا هادي فيه
أخر كتاب خلصته كان " History of God لكارين ارمسترنج و ديه كاتبة متخصصة في دراسة الاديان و بتتبع تاريخ الأديان السماوية التلاتة بطريقة أكاديمية بحتة

نعم القراءة شىء هام فى حياة كل انسان والقراءة غذاء للعقل والروح 000 ونعم الراى للاخت علا بأن اختارت القراءة للاساتذة الكرام عبد الوهاب مطاوع رحمه الله ، والذى كان منارة للحق والصدق وكانت صفحتة وردودة عظيمة بمقدار خلقة وطيبتة ، وان كان خيرى رمضان لم يستطع ملء الفراغ الكبير الذى تركة وان كان يحاول ، وايضا فاروق جويدة ( جويدة بعد مشكلتة وازمتة مع القضاء غير فاروق جويدة قبل ذلك ) حيث انه اصبح مهموم بمشاكل البسطاء وهموم البلد كل اسبوع قصة وحكاية جديدة للفساد ، وايضا من الافاضل والاستاتذة الكبار الذين تعلمت منهم الكثير استاذنا محمد حسنين هيكل ( ميزان الذهب ) والاساتذة رحمه الله عليهم محمد الغزالى وخالد محمد خالد من العباقرة
ولى قرات فى السياسة والتاريخ والدين لكتاب كبار جزاهم الله كل خير لما افادونا به

مواضيعك في الصميم يا علا
انا دودة كتب بقى
من النوع اللي لو مسكت كتاب وشدني ممكن افضل قاعد بال 10 ساعات بدون مبالغة اقراه
ومن زمان قوي كنت بروح معرض الكتاب بميزانية محترمة افضل احوش فيها طول السنة
اليومين دول وقعت على مكتبة سوفت كوبي اكثر من رائعة وبقرى دلوقتي كتاب اثار ضجة رهيبة ولقيت فيه حقايق غريبة

أعتماد خورشيد شاهدة على انحرافات صلاح نصر
اعتماد خورشيد دي للي ما يعرفهاش ام شريهان ومرات احمد خورشيد
والكتاب اتطبع من 6 طبعات في 3 شهور فقط سنة 88 وبعد كدة اختفي من الاسواق وانا لقيت نسخة سوفت كوبي

وكمان بقاللي فترة بحاول اقرى روجيه جارودى..الاساطير المؤسسة للسياسة الاسرائيلة
بس مش لاقيلة وقت عشان محتاج تركيز
بحب كتابات هيكل قوي وقصص ارنست هيمنجواي بس مترجمة عشان لغتي مش قوية قوي كدة
وفي ادب الرعب بمووت في ستيفن كينج بس ساعات في كلاكيع كتير قوي وبعشق قصة ميزري قوي
مصطفي محمود قريت معظم كتبة تقريبا
بحب قصص على احمد بكثير وجمال الغيطاني ويحي حقي باسلوبة الغريب ومحمد حسين هيكل
وطبعا في ناس كتير قوي بتتلخبط بين محمد حسين هيكل وحسنين هيكل
ومحمد عبد الحليم عبد الله
العقاد بتعب منه قوي
ونجيب محفوظ كمان مش كل كتاباتة بتعجبني

فى الحقيقة انا مطحون قراءة بس للاسف فى مجال عملى بس

اقتباس:

---

المشاركة الأصلية كتبت بواسطة karim_monir

أعتماد خورشيد شاهدة على انحرافات صلاح نصر
اعتماد خورشيد دي للي ما يعرفهاش ام شريهان ومرات احمد خورشيد
والكتاب اتطبع من 6 طبعات في 3 شهور فقط سنة 88 وبعد كدة اختفي من الاسواق وانا لقيت نسخة سوفت كوبي


وفي ادب الرعب بمووت في ستيفن كينج بس ساعات في كلاكيع كتير قوي وبعشق قصة ميزري قوي
مصطفي محمود قريت معظم كتبة تقريبا

---

بالنسبه لكتاب انحرافات صلاح نصر انا قريته من حوالى 3 سنين ونص وفعلا اللى فيه حاجات غريبه ومفاجأت لكتير من الحاجات اللى مكنتش تتخيل انها مصر وبيمس بعض الفنانين ... وانا بقرأه حسيت بالحقاره فى الكتاب ده لو الكلام ده صحيح .. حقاره من اللى حصل مش بيخللى الواحد يحتقر نفسه !!

ستيفن كينج الكاتب المشوه نفسياً قريت له بعض القصص وشفت له افلام وبقيت وانا باتفرج على جزء من فيلم اقول ده ستيفن كينج .. الراجل ده مشوهه نفسيا جدا وعنده كذا تيمه بيلعب عليها منها الرعب المجهول او الرعب الخرافى زى فيلم IT او رعب رجوع الموتى زى Pet cemetery الاول والتانى

نصيحه جرب قصص Poe لو مكنتش قريتها
بالنسبه للقراءه انا من متابعى بشده كتابات انيس منصور بغض النظر عن اى شئ او تحفظ بس الراجل ده بيشدنى بتجاربه ورحلاته وقصصه التى لاتنتهى ... وقت قراءتها هو وقت تفضيه دماغى من مشاكل اليوم المختلفه

اقتباس:

---

المشاركة الأصلية كتبت بواسطة M_HaFeZ

بالنسبه لكتاب انحرافات صلاح نصر انا قريته من حوالى 3 سنين ونص وفعلا اللى فيه حاجات غريبه ومفاجأت لكتير من الحاجات اللى مكنتش تتخيل انها مصر وبيمس بعض الفنانين ... وانا بقرأه حسيت بالحقاره فى الكتاب ده لو الكلام ده صحيح .. حقاره من اللى حصل مش بيخللى الواحد يحتقر نفسه !!

ستيفن كينج الكاتب المشوه نفسياً قريت له بعض القصص وشفت له افلام وبقيت وانا باتفرج على جزء من فيلم اقول ده ستيفن كينج .. الراجل ده مشوهه نفسيا جدا وعنده كذا تيمه بيلعب عليها منها الرعب المجهول او الرعب الخرافى زى فيلم IT او رعب رجوع الموتى زى Pet cemetery الاول والتانى

نصيحه جرب قصص Poe لو مكنتش قريتها
بالنسبه للقراءه انا من متابعى بشده كتابات انيس منصور بغض النظر عن اى شئ او تحفظ بس الراجل ده بيشدنى بتجاربه ورحلاته وقصصه التى لاتنتهى ... وقت قراءتها هو وقت تفضيه دماغى من مشاكل اليوم المختلفه

---

فعلا حسيت ان في ناس احقر بكتير من الواحد كان متخيلهم علية ولومت عبد الناصر كتير قوي ان سمح لهؤلاء انهم يتحكموا في مصير شعب كامل زينا وانهم كانو السبب الرئيسي للنكسة وتوابعها
-------
ستيفن كينج بيعرف يمس وتر الرعب الانساني بج وتر الرعب من المجهول
هو ده الرعب اللي انا بحبة اللي تبقي مش عارف مصدرة مش زي افلام اليان المقرفة و سكريم شوية دم ومواد لزجة ونس بتصرخ وخلاص
الرعب الداخلي الدفين
عينة رينج والاخرون وكدة
-------
ادجار الان بو طبعا تحفة بس بحب الحاجات القصير بتاعتة

لو بتحب كتابات ما وراء الطبيعة عندي ليك هدية وسوفت كوبي كمان انما ايه
جامد جامد يعني

اقتباس:

---

المشاركة الأصلية كتبت بواسطة karim_monir

فعلا حسيت ان في ناس احقر بكتير من الواحد كان متخيلهم علية ولومت عبد الناصر كتير قوي ان سمح لهؤلاء انهم يتحكموا في مصير شعب كامل زينا وانهم كانو السبب الرئيسي للنكسة وتوابعها
-------
ستيفن كينج بيعرف يمس وتر الرعب الانساني بج وتر الرعب من المجهول
هو ده الرعب اللي انا بحبة اللي تبقي مش عارف مصدرة مش زي افلام اليان المقرفة و سكريم شوية دم ومواد لزجة ونس بتصرخ وخلاص
الرعب الداخلي الدفين
عينة رينج والاخرون وكدة
-------
ادجار الان بو طبعا تحفة بس بحب الحاجات القصير بتاعتة

لو بتحب كتابات ما وراء الطبيعة عندي ليك هدية وسوفت كوبي كمان انما ايه
جامد جامد يعني

---

حبيبى يابو كريم ... فعلا انا من عشاق كتابات احمد خالد توفيق الكاتب العبقرى
بالنسبه لما وراء الطبيعه انا من اكتر القارئين لها بصوره مش طبيعيه وكان عندى كل القصص كذا مره (لظروف التسليف والحاجات اللى بتترمى مع التنضيف) وبالنسبه للمكتبه السوفت كوبى انا تقريبا عندى كلها وجزاك الله كل خير ياكريم

بالنسبه برضه لافلام الرعب ياكريم ..
ممكن تجرب تتفرج على مسلسل supernatural هو نزل منه موسمين ودلوقتى فى الثالث
هو رعب متنوع وبيحكى عن اخين بيدورا على والدهم اللى هو كمان من مطاردى الظواهر الغريبه او supernatural هتلاقى زى ماقلتلك تنوع فى القصص وكله قصص منفصله مش مترابطه زى معظم المسلسلات

حبيبي انا مش قصدي على روايا احمد خالد توفيق
انا قصدي على كتاب خلف اسوار العلم لعبد الوهاب السيد وسند راشد
كتاب رائع وموثق
----
المسلسلات ماليش تقل عليها
ده انا لما بدخل فيلم في السينما ببقي متذنب ساعتين
ماليش تقل على الفرجة خالص
حتى في البيت ممكن ابقي متجنن على الفيلم واول ما انزل يفضل بالشهور لحد مالاقيلة وقت

ان بحب اقرا ميكي اوى !!

اقتباس:

---

المشاركة الأصلية كتبت بواسطة onna

ان بحب اقرا ميكي اوى !!

---

انتي دلوقت كبرتي وبتشتغلي ... وبكرة تبقي مديرة
اظن مش من اللائق انك تقرأي ميكي
افرضي ان أحد الموظفين شافك بتقرأي ميكي .... تفتكري ح يكون انطباعة ايه عنك ؟؟؟
وبعدين الناس بيقولو احمد خالد توفيق و العقاد وعبد الوهاب السيد وسند راشد ستيفن كينج
وانتي بتقرأي ميكي ...... المفروض انك بعد كل الاسماء الرنانة اللي الزملاء بيقولوها .... وانت دلوقت موظفة قد الدنيا وفي شركة جاز محترمة
.....
....
....
...
....
...
... يبقي المفروض تقرأي سوبر ميكي ... او ميكي جيب ... او كابتن ماجد :D
آل ميكي آل :rolleyes:

ميكي دايما فى الحمام:d:d

و لكن الجد طبعا في Pc-mag و اي شيء لأنيس منصور
و كارل ماركس و فرويد
و تشارز داروين

و طبعا اي حاجة اون لاين عن الصوت;)

أنا بقرأ أي حاجة في أي حاجة المهم تكون مفيدة أو حقيقية.يعني الميكي ورجل المستحيل والحاجات ده مليش فيها خالص.
الكتاب اللي قرأته مرتين بجد ونفسي أعرف الكلام اللي فيه صح ولا غلط وكان أول كتاب أشتريه بفلوسي أنا هو (قصة الخلق من العرش إلى الفرش)بتاع واحد إسمه عيد ورداني.بجد مش عارف ليه الكتاب ده عاملي قلق في دماغي؟؟؟؟؟؟!!!!يمكن علشان المكتوب فيه أنا كنت مصدقه وبفكر فيه من قبل ما أقرأ الكتاب بس لما قريته إتخضيت إني لقيت حد مصدق اللي أنا مصدقه:)
على فكرة يا كريم بالصدفة البحتة والله لقيت كتاب إعتماد خورشيد حالا سوفت كوبي:d

اقتباس:

---

المشاركة الأصلية كتبت بواسطة karim_monir

وكمان بقاللي فترة بحاول اقرى روجيه جارودى..الاساطير المؤسسة للسياسة الاسرائيلة

---

الكتاب ده رائع بس صعب شوية و مليان نصوص من العهد القديم

مش هو اسلم و بقى اسمه رجاء جارودى بعد نا طلع من السجن فى فرنسا على ما اذكر

انا كنت ناوى اقرا للعقاد انت ايه رايك فيه ؟

العقاد عايز جو رايق ودماغ رايقة قوي
وتقرى مرة تلييين وتقرى التانية تفهم حبة
وتقري التالتة عشان تحاول تفهم

ها ها
مش عارف العيب فينا ولا فيه
الراجل ده لما جم يقولوة احنا هانديلك دكتوراة فخرية قالوهم ومين اللي هايدي الدكتوراة للعقاد

For me no time at all I work every day 12-16 hours per day if I had free time I will read engineering book or any thing related to my work

اقتباس:

---

المشاركة الأصلية كتبت بواسطة aif

انتي دلوقت كبرتي وبتشتغلي ... وبكرة تبقي مديرة
اظن مش من اللائق انك تقرأي ميكي
افرضي ان أحد الموظفين شافك بتقرأي ميكي .... تفتكري ح يكون انطباعة ايه عنك ؟؟؟
وبعدين الناس بيقولو احمد خالد توفيق و العقاد وعبد الوهاب السيد وسند راشد ستيفن كينج
وانتي بتقرأي ميكي ...... المفروض انك بعد كل الاسماء الرنانة اللي الزملاء بيقولوها .... وانت دلوقت موظفة قد الدنيا وفي شركة جاز محترمة
.....
....
....
...
....
...
... يبقي المفروض تقرأي سوبر ميكي ... او ميكي جيب ... او كابتن ماجد :D
آل ميكي آل :rolleyes:

---

هههههههههههههههه

متفكرنيش بماجد دة خد منى رءااااات :p:p:p

كنت اقف كدة و البس البتاعة اللى بتتلبس فى ال wrest دة و الراس و البس ترينك العيد :Dو امسك المقشة و افضل اقووول: " مرحى مرحى فريق المجد ... مرحى مرحى فريق المجد ":D:D:D:D:D

انا والله يا ابراهيم اجدعها مجلد من مجدلات ميكي دة والله ما ياخد معايا اكتر من يوم .. انا عايزة اقلك انى كل ما اروح لاختى اسلكلى مجلتين ميكي من عيالها بدل ما اشتريها و منظري يكسف كدة قدام البياع :D

اقتباس:

---

المشاركة الأصلية كتبت بواسطة onna

هههههههههههههههه

متفكرنيش بماجد دة خد منى رءااااات :p:p:p

كنت اقف كدة و البس البتاعة اللى بتتلبس فى ال wrest دة و الراس و البس ترينك العيد :Dو امسك المقشة و افضل اقووول: " مرحى مرحى فريق المجد ... مرحى مرحى فريق المجد ":D:D:D:D:D

انا والله يا ابراهيم اجدعها مجلد من مجدلات ميكي دة والله ما ياخد معايا اكتر من يوم .. انا عايزة اقلك انى كل ما اروح لاختى اسلكلى مجلتين ميكي من عيالها بدل ما اشتريها و منظري يكسف كدة قدام البياع :D

---

اعتقد إبراهيم كان قصده على "ماجد" المجلة الإماراتيةـ دي كنا بنجيبها زمان وندور على واحد اسمه فضولي موجود في صفحة في المجلة، كانت ظريفة بس جزء كبير منها موجه للثقافة الخليجي.
وسمير برضه (من سن 8 لـ 88) كان ظريف جدا ومصري جدا جدا وفاكر شخصياته أظرفها كان "زيكو زكي زكريا زتون" و"مذكرات عصام"
إنما ميكي بقى هو الكينج :) ، أنا حتى الآن لا أجد غضاضة في إني اروح لبائع الصحف واقوله -وانا طول بعرض كدة- "هو ده آخر عدد؟" واشتريه على طول، واللي شجعني إن المودام كمان من مشجعي المجلة (وبصراحة لما الواد ميدو جه بالسلامة عملناه حجة عشان نشتريها هو آه عمره 10 شهور بس الأمر مايسلمش ممكن يحتاج يتسلى ولا حاجة، مش كدة ولا ايه؟! :) )

وقت القراءة للأسف تقلص وخصوصا بعد تعرفى انضمامى ل nile motors انا طبعا عديت مرحلة ميكى وسمير وماجد والشياطين ال13 والمغامرين الخمسة والتلاته والاربعة من عهود سحيقة ... مرحلة ملف المستقبل ورجل المستحيل انتهت من حوالى 10 سنين ... ماوراء الطبيعة انتهت من حوالى سنتين نفسى اتدت منها بس ممكن ارجعلها تانى ...
انا دلوقتى فى مرحلة القراءة الدينية ...انصح الجميع بكتب الشيخ الراحل محمد الغزالى ... كتب قيمة ورائعة ومشوقة لانها مكتوبة باسلوب ادبى رائق وسهل ... ايضا كتب الشيخ يوسف القرضاوى ..
الكتب التقيلة بتاعة الناس القدام ... طبعا مهمة بس انا شايف ان الأنسان مايبتديش بيها

اقتباس:

---

المشاركة الأصلية كتبت بواسطة karim_monir

حبيبي انا مش قصدي على روايا احمد خالد توفيق
انا قصدي على كتاب خلف اسوار العلم لعبد الوهاب السيد وسند راشد
كتاب رائع وموثق
----

---

اسف مفهمتش قصدك ياكريم ... حصل خير
طيب ياريت لو ترفع الكتاب ده او تديلى اللينك بتاعه وجزاك الله كل خير

اقتباس:

---

المشاركة الأصلية كتبت بواسطة ows212

وقت القراءة للأسف تقلص وخصوصا بعد تعرفى انضمامى ل nile motors انا طبعا عديت مرحلة ميكى وسمير وماجد والشياطين ال13 والمغامرين الخمسة والتلاته والاربعة من عهود سحيقة ... مرحلة ملف المستقبل ورجل المستحيل انتهت من حوالى 10 سنين ... ماوراء الطبيعة انتهت من حوالى سنتين نفسى اتدت منها بس ممكن ارجعلها تانى ...
انا دلوقتى فى مرحلة القراءة الدينية ...انصح الجميع بكتب الشيخ الراحل محمد الغزالى ... كتب قيمة ورائعة ومشوقة لانها مكتوبة باسلوب ادبى رائق وسهل ... ايضا كتب الشيخ يوسف القرضاوى ..
الكتب التقيلة بتاعة الناس القدام ... طبعا مهمة بس انا شايف ان الأنسان مايبتديش بيها

---

عاجبنى جدا الترتيب اللى انت كتبته فعلا
المغامرون - والشياطين
رجل المستحيل - ملف المستقبل
ماوراء الطبيعه وده انضجهم

بجد يا جماعة .. فى كتاب حلو جداً وساعات " مش قليل " بيبقى الواحد محتاجه

وهو عبارة عن مجموعة أفكار وخواطر تساعدك على تحقيق السعادة بمعناها الشامل فى روتين الحياة ، فى العمل ، فى البيت ، حتى لوحدك ..

اسم الكتاب " لا تحزن "

وهذا الكتاب حقق اعلى مبيعات فى العالم العربى

ده طبعاً لظروف الانسان العربى " السعيدة على طوووووول "

تقصد كتاب عائض القرنى
الحقيقه الكتاب اهديته لشخص عزيز وان مكنتش قريت فيه

فى موقع كويس للناس الى بتحب رويات مصرية للجيب وميكى والحركات ده :D

http://looloo3h.com/index.html

نسيت اقول ان ممكن تحمل منه اكتر من 1000 قصة

الحقيقه مش بلاقى وقت لقراءه كتب كامله انا متابع مقالت كتير لكبار الكتاب عبد الوهاب مطاوع رحمه الله عليه الراجل ده كان انسان بجد اول ماتقرا له تحبه وتحس انه قريب منك ..والكاتب الساخر احمد رجب ...والكاتب محمود عوض ..معظم مقالاتهم بتبقى فى مجله الشباب
بس انا بفضل الكتب والمقالات ذات الطابع الاستراتيجى او السياسى ...ده غير طبعا الكتب الدينيه التفسير والسيره

..mokhtar..

آخر كتاب " علشان ماتنضربش على قفاك" يستحق القراءة خصوصا الايام دي
- الثقافة - تفسير انثروبولوجي - آخر اصدار لعالم المعرفة
- فقه اللغة وسر العربية - الثعالبي - كتاب لازم اقرا فيه من فترة لفترة

وطبعا في كا الحالات لازم نقرا
انا شفت في امريكا الناس بتقرا في كل مكان ---كان اغرب موقف صديق وصديقته الاتنين قاعدين في مكان رومانسي وبشكل رومانسي وكل واحد بيقرا في كتاب
احنا باللي احنا فيه لاننا ما بنقراش
همه بقوا كده لانهم بيقروا
وبس

انا بقرا لعبد الوهاب مطاوع وعمرو طاهر واى كتاب يشد انتباهى

موضوع مفيد

قرايتي كلها حاجات ليها علاقه بالبرمجه وكنت متعود اقرا كتابين علي الأقل كل شهر بس دلوقتي بالعافيه 4 او 5 كتب في السنه وبحاول ارجع تاني الاقي وقت ونفسي اقرا في حاجات تانيه غير شغلي