قطع الغيار الاصلية فى السوق

**aymanmaly** · 19-06-2011 12:25 PM

سلام على جميع الفرسان
من اسبوع كدة كنت داخل على صيانة ال 85000 كم
و قلت الم الحاجات الى محتاجها فى الصيانة
لقيت الحمد للة بسيطة
محتاج زيت و تيلفرامل امامى
قلت لسة فية وقت قلت اعمل تجربة

و طبعا التجربة فى تيل الفرامل

انا بقالى فترة بستعمل تيل نوعة رمسا اسبانى و حتى الطنابير لما غيرتها جبتها نفس النوع

المهم نزلت شارع دمشق فى مصر الجديدة و لفيت
ولفيت
و دورت
مالقتش غير محل واحد عندة التيل
بكام يا سيدى الفاضل ؟
قالى 190 ج
قلتلة لية دة انا اخر مرة شارية كان ب 145 ج
قالى دة كدة انا عامل معاك واجب
قلت لة شكرا
اجيب الاصلى احسن الفرق مش كبير
المهم
لقست محل و انا بدور قالى انا عندى الاصلى
قلت لية يا راجل طيب بكام
قالى 175 ج
قلتلة بس دة استيراد مين ؟
قالى منصور ( بمنتهى الثقة )
قلتلة والله سعرة كويس بس خلى بالك انا هاركب فى التوكيل و لو طلع مش استيرادة هارجعهولك
قال لى ولا يهمك اما واثق من قطع الغيار عندى دى اصلى اصلى على ابوها استيراد منصور يا باشا

قلت لية توكل على الله بس على اتفاقنا
قال تمام

طبعا العلبة اصلى و العلامة المائية اصلى و التيل شكلة تمام

لسة بدفع الفلوس نطلى واحد و قالى هات اركبهولك
قلتلة انا هاركب فى التوكيل
قالى يا باشا هنا زي التوكيل انا تبع المحل و انت شارى من عندنا و الى هاتدفعة و خد التيل من ايدى
طبعا شكيت فى الموضوع و المفتش كورومبو طلع
رحت اتكلمت بعصبية و قلتلة هات التيل
و بصيت لصاحب المحل و قلتلة اصلى
قالى اصلى يا باشا
طبعا شكيت
جريت على منصور فرع الطيران
و دخلت قطع الغيار و قلتلهم الشركة جابتلى التيل دة من عندكم غلط و عايز اغيرة بتيل خلفى
قعد يبص على العلبة و خدها لمدير قطع الغيار لقيت الراجل جيلى و قالى انا عارف ان حضرتك بتتعامل معانة من فترة طويلة
بس سؤال انت جايب التيل دة منين ؟
قلتلة الشركة جايباهولى
قالى التيل دة هاي كوبى
قلتلة ازاي؟
قالى تلاقى بتاع المشتريات بيعمل بزنس
طبعا خرجت من عندة على بتوع الصيانة
قابلت فنى و نفس السؤال منى
و قالى يا باشا دة مضروب و ورانى علبة بتاعة و احد بيغير تيل و فتح و طلع التيل لقيت خامة التيل مختلفة فعلا
رحت راجع تانى يوم على المحل الى اشتريت منة
و قلتلة عايز 1000 ج قالى نعم؟
قلتلة انا اخذت التيل دة امبارح و انت اكدت انة اصلى استيراد منصور
قالى طبعا
قلتلة التوكيل بيقول دة هاي كوبى
قالى ازاي ؟ دول اكيد بيشككوك فى التيل علشان تشترى منهم
قلتلة بجد طيب انا طلعت الاصلى و قارنتة ببتاعك لقيت فرق فى الخامة
و بعد كدة قلت كلام جميل و اشعار فية و فى المحل :-)
راح مرجعلى فلوسي و هو فى حالة زهول طبعا 175 ج مش 1000 :-)
الظاهر ان الكل بيعمل نفسة ناصح زى ما انا عملت بس ما بيكملش و يتأكد من التوكيل و بالتالى بتعدى

خلى بالكم من الهاي كوبي

يجعلة عامر

**abou-yahia** · 19-06-2011 01:52 PM

متشكرين يا عمدتنا

كده بتعمل صيانه لوحدك ماشي

طبعا نصيجه غاليه اللي عايز يشتر قطعه غيار اصليه عليه وعلي التوكيل ويركبها في اي حته بعد كده
في الاغلب بتتساوي
عشان المضروب في السوق كتير
وشكرا

**Bassem Raafat** · 19-06-2011 02:08 PM

المشاركة الأصلية كتبت بواسطة afrtow

متشكرين يا عمدتنا

كده بتعمل صيانه لوحدك ماشي

لأ والمشكله الأكبر إن العمده نزل شارع دمشق ( منطقتى ) من غير ما يقولى ، مااااااااااااااشى يا عمده : ))

وفعلاً يا فرسان فى ناس كتير بتشتغل فى الهاى كوبى ، وجربت منهم كتيييييييييييييير أيام الهيونداى ، وكله يأكدلك إن التيل أحسن كمان من الأصلى وأول لما تركبه تسمع مزيكة حسب الله .

شكراً يا عمدتنا على نقل التجربه ويا ريت الناس تاخد بالها من القصه دى ، وخصوصا لو السعر مش حيفرق كتير يبقى نخلينا فى الأصلى .

**aymanmaly** · 19-06-2011 02:27 PM

المشاركة الأصلية كتبت بواسطة Bassem Raafat

لأ والمشكله الأكبر إن العمده نزل شارع دمشق ( منطقتى ) من غير ما يقولى ، مااااااااااااااشى يا عمده : ))

وفعلاً يا فرسان فى ناس كتير بتشتغل فى الهاى كوبى ، وجربت منهم كتيييييييييييييير أيام الهيونداى ، وكله يأكدلك إن التيل أحسن كمان من الأصلى وأول لما تركبه تسمع مزيكة حسب الله .

شكراً يا عمدتنا على نقل التجربه ويا ريت الناس تاخد بالها من القصه دى ، وخصوصا لو السعر مش حيفرق كتير يبقى نخلينا فى الأصلى .

يا باسم باشا انا علشان انزل مصر الجديدة اصلا كان لازم اقلهم اني تبعك
بس الغريبة قالولى قصدك باسم الى ام اشرف علمت على عربيتة
قلت اينعم
قالوا خلاص عدى

يجعلة عامر

**hpxp** · 19-06-2011 02:37 PM

والله يا عمده انا كنت مركب تيل كوري هو بيصفر في الاول بس خد فرمله جامده عليه علي140 كده ومش هيصفر الا اما يبقي عايز يتنضف

**aymanmaly** · 19-06-2011 03:57 PM

المشاركة الأصلية كتبت بواسطة hpxp

والله يا عمده انا كنت مركب تيل كوري هو بيصفر في الاول بس خد فرمله جامده عليه علي140 كده ومش هيصفر الا اما يبقي عايز يتنضف

احمد الحمد لله على السلامة
كدة ماتستعملش العضوية التانية علشان لو استعملت عضويتين فيها وقف يا باشا
وبعد كدة انت داخل لية روح ذاكر

**ahmedaglan** · 19-06-2011 04:15 PM

ياعمدة انت اكتر واحد عارف ان الناس دى اهم حاجة عندهم المكسب وبس
وعلي راي المثل
اجري يابن ادم جري الوحش
ان كبر ابنك خوية
ههههههههههه

**hpxp** · 19-06-2011 04:21 PM

لاخلاص هديها للحج ويبقي معانا هنا ولا ايه؟
والله لسه مخلص الدرس وامتحان الانجليزي جي رخم بس حليت حلو الحمد لله هو العك كله في الاختياري وغلطه في الفيند ذا مستيك

**Usama Nagi** · 19-06-2011 06:48 PM

ايه يا عمدة الأرقام الفلكية دي 85000 ربنا يباركلك في العربية

بس انت ما قولتلناش جبت التيل ولا لسه

و يجعله عامر

-

الموضوع: قطع الغيار الاصلية فى السوق

LinkBack

أدوات الموضوع

عرض

قطع الغيار الاصلية فى السوق - انشر الموضوع فى :

-

-

-

-

-

-

-

المواضيع المتشابهه

خبر عاجل - تويوتا تقرر خفض اسعار قطع الغيار الاصلية في مصر ♥ิ

قطع الغيار الاصلية للبومة

قطع الغيار الاصلية بالاسكندرية

اين اماكن محلات قطع الغيار الاصلية ؟؟

اين اماكن محلات قطع الغيار الاصلية ؟؟

الكلمات الدلالية لهذا الموضوع

المفضلات

المفضلات

ضوابط المشاركة