والله انت عشرة على عشرة
يا جماعه فعلا .. و الشكله كمان ان فى ناس تشوفك راكب عربيه موديل السنه ولا سنتين فاتو يقولك .. دا معاه قد كدا على قلبه .. و طبعا محدش عارف اللى فيها و انك مديون و عليك احمال كتير .. للأسف الناس هتفضل سطحيه .. اتمنى نتغير كلنا و نقدر اللى عندنا و عند غيرنا ندعيله ربنا يباركله فيه .. و بجد لما شفت الصوره دى حسيت بالأسى ان الواحد يأتمن فلوسه فى ماركه او منتج و يتخان .. ربنا يحفظنا يارب
اجدع حاجه الكلام بس انما نتابع المشكلة واتحلت ولا لا وكان ايه سببها ابدا
حضراتكم لو متابعين العربية من زمان وحكاية الدواسة وبتقروا ما نتج عن التحقيق متهيالى ما كانشى حد فيكم كتب كلمه واحده بس عادى هو ده زمن الكلام وكلنا بنحب نتكلم بس واحد يقولك سمعت ده واحد قاللى ده بيقولوا ده بيقولك.......
مع احترامى للموضوع وصاحبة ياريت انت بنفسك تجيب كل المشاكل ونتيجة التحقيقات بنفسك وتحطها ده اقل اعتذار
واللى عنده مشكله وعنده شكوى من العربية يتفضل يتوجه للتوكيل مباشرة مش لناس متخفيه خلف كى بورد وشاشه
والحمد لله العربية بقالها معايا سنتين وباقول تستاهل كل قرش دفعته فيها ويمكن اكتر كمان والسلبية الوحيده اللى فيها انى لما اجى اغير اعتقد مش حلاقى حاجه بنفس المستوى ممكن اركبه تانى وده مش راى شخصى لوحدى ده راى كثير من الملاك القادرين على دفع مهر العروسة وعامة لو اى حد عنده حساسية من علامة تويوتا يغمض عيه عنها افضل من الافتراء والتهويل
اعتذار ؟
حضرتك قريب عم تويودا صاحب الشركة ؟؟
انا لا هاجمت ولا اشتكيت ولا قلت بم حتى ! انا لقيت صورة لواحد عامل كدة في عربيته في مصر فبسال ياترى ليه و ليه ممكن حد يوصل بيه انه يعمل كدة في عربيته الجديدة ؟
ياريت حضرتك تهدى شوية .. زي مازمن الكلام و خلاص .. ده برده زمن حب الدفاع وخلاص .. ولو حضرتك كنت راكب عربية من ماركة تانية كنت دخلت قلت نكتة على الصورة او تعليق و خلاص .
دي شوية صاج بالكترونيات بتكنولجيا و عجل و محرك ادام و بتمشي علشان توصلك ... مش لازم تتعلق بيها اوي كدة يعني .
وانا لا ادين لاحد باعتذار و لا بفتري ولا بهول ... ياريت حضرتك تراعي الكلام شوية علشان انا اعلم جيدا ان حضرتك اكبر مني سنا .
-----------
لو حنتلكم عن الموضوع ده , اعتقد صاحب العربية الي في الصورة مشكلته كلها مش في الدواسة و لاحاجة و لكنها مشكلة الفتيس الشهيرة الي انسقم عليها شعب مصر :)
وعامة سمعة تويوتا مش محتاجة لتهويل ولا افتراء .. وياريت حضرتك بما انك بتدافع عنها تجيب نتيجة القضاء و الملايين الي اتفدعت تعويضات قضرها 16 مليون دولار للحكومة الامريكية علشان مش وجود عيب ..ماكل العربيات فيها عيب .. و انما "التغاضي" عن هذا العيب و هما عارفين كويس انه موجود و تصليحه يلزم اعادة تصميم مش مجرد الحول البدائية الي حاولوا يعملوها في الاول .
اقتباس:
a transportation department official said the japanese automaker paid the fine after . Toyota had 30 days to pay it. The official was not authorized to speak publicly before an announcement was made.
Toyota faced the maximum penalty allowed under law after it was accused of hiding earlier defects involving gas pedals, a .......ion that toyota rejected even though it agreed to pay the fine.
ومع ذلك انا مكنتش داخل علشان اناقش مشكلة او بقى طلاما بهول ... " فضيحة" تويوتا العالمية .. و انما كنت بنقل صورة فقط و شكرا لك مرة اخرى .
السلام عليكم و رحمة الله و بركاته
حرية الرأى مكفولة بشدة للجميع فى اطار واضح -وضوح الشمس- من الاحترام الشديد جدا بين الأعضاء.
اللى أنا لاحظته, أن كلام الأعضاء ماكنشى عن عربية تويوتا بالذات رغم أن الصورة كان فيها عربية تويوتا, لكن عن أى عربية, صاحبها بيحط فيها شقى عمره و يلاقى فيها عيب, بصرف النظر بأه العيب ده بسيط و لا جسيم و بصرف النظر عن نوع العربية, سواء كان زستافا و لا RR .
و زى ما اللى بيبع العربية سواء كان التوكيل أو شخص, بيعد فلوسه كويس أوى قبل ما يبيع و مابيرضاش يبيع لو الفلوس ناقصة, أنا كعميل, من حقى أنى آخد كل حقوقى, و تاااااااااااااااااااااانى , بصرف النظر عنه نوع العربية.
و بعدين أنا سواء كنت بأمتلك العربية و لا لأ, من حقى أنى أدور و أسأل كويس و لو لقيت فيها عيب, من حقى أنى أتكلم عنه و أناقشه و أحذر غيرى منه لو كان العيب ده فعلا موجود, أنا بدفع فلوس, مش ورق جرايد.
و أنا مايتهيأليش, أن فيه حد بيبقى عنده حساسية من علامة تويوتا, يعنى, أنا ممكن أحقد على واحد راكب Jaguar XJR أو MERCEDES AMG65 مثلا, لكن مش على كورولا, مع عظييييييييييييييييييم احترامى لكل العربيات الكورولا و لراكبى العربيات الكورولا.
وعليكم السلام ورحمة الله وبركاته
عزيزى انا لا اقصد حساسية بمعنى حقد وهذا للتوضيح فقط وغير كده من حقى انى ااقول راى عنها بعد استعمال سنتين وده برده من باب انى اقول الحق وليس مجامله ومتهيالى الموضوع اساسا قديم جدا موضوع الفتيس وزهقنا منه وهو عبارة عن صعوبة استعمال هو برده ده يعد مشكله بس خلاص قديمه وحاليا بقى اوتوماتيك عادى يعنى قضية منتهية والاعتراف بالخطا زا د من احترام بعض الملاك لتويوتا حتى اصحاب المشكله نفسهم وبرده مبيعاتها زادت فى الخارجز
عامة سعيد بكلامك وعذرا لو وصلك مفهوم خاطئ من كلامى ولكن صدقنى الموضوع ده قرفنا كلنا كملاك وقضينا فترة حتى اتاكدنا انه الحمد لله العربية تمام والموضوع قتل بحثا هنا فى الممنتدى ما بين مؤيد ومعارض
وفى الاخر كلنا اخوات فى الاسلام ونعمل على بناء مصر الكبيرة فى وقت قصير
تقبل تحياتى
كان واحد عاملها في نوبيرا قدام سفاره ايطاليا والعربيه واقفه
السلام عليكم و رحمة الله و بركاته
يا باشا, لا اعتذار و لا حاجة, لا سمح الله, كلنا هنا اخوات و مافيش بينا الكلام ده.
أنا بس, كل اللى بيزعلنى, أننا كمصريين, طموحنا فى مستوى الاستهلاك نزل جدا جدا, لدرجة أن ممكن تلاقى ناس, تقولك أن العربية الفلانية هو عربية رااااااااااااااااااااائعة , أنا مابقولش أنها مش رائعة, بس كلمة راااااااااااااااااائعة دى تتقال على أفضل ما أنتجت شركة السيارات, يعنى مثلا, ممكن تقول أن العربية النيسان صنى, عربية حلوة, بصرف النظر عن أى عيوب فيها -اللى الأعضاء قالوها, مش أنا, لأنى ماعنديش نيسان صنى- لكن لو هتقول (رااااااااااااائعة) يبقى مثلا على النيسان مورانو أو حاجة زى كده, ده مش لأننا ممعاناش فلوس نجيب عربيات, لكن, لأننا راضيين بالعربية اللى ممكن تطلع من المصتع معيوبة, لأ و بنمدح فيها و ده -مع جليل احترامى لكل الناس و لكل المصريين- أنا شايفه نوع من الخنوع و الخضوع اللى مش لايق عالمصريين.
لو تتذكر معايا, أن فى أواخر السبعينات و أوائل التمانينات, كانت العربية البيجو ال504 هى عربية الطبقة الوسطى فى مصر, اللى هى دلوقتى تعادل البيجو ال407 أم 250000 جنيه, على فكرة, بره, الطبقة اللى كانت بتشترى البيجو 504 سنة 80, هى اللى برضه بتشترى ال407 سنة 2011, احنا اللى حالتنا اتدهورت و أصبحت العربيات الصينى, هى عربية الطبقة فوق المتوسطة عندنا, شوفت احنا مستوانا نزل أد ايه.
ممكن لمايكون واحد تعبان فالفلوس بتاعها يعمل كدة بس مش مبرر ان التويوتا وحشة يعنى دى طريقته اللى عبر بيها