الموضوع: لغز اسمة اسبلندور

حضرتك انا معايا بريليانس سبلندور من 2008 و العربيه الصراحه ممتازه مفيهاش اي مشاكل تكييف تلج ماشاء الله , الفرامل بتاعتها تحفه , صاجها محترم , عفشتها كويسه هو عيبها ان العربيه تقيله علي الموتور ال 1600 و ده يعتبر مش عيب بالنسبه ليا لان انا مش بشد بيها لكن علي الطرق السريعه ماشاء الله جميله جدا

لو انت بتتكلم على العربية كمواصفات و تقفيل ..... العربية ممتازة و ليست جيدة او جيدة جداً خاصة الثبات و نظام الفرامل بتاعها و الاضاءة ، و فكرت ابيعها من فترة لكنى استخسرتها خصوصاً انة من الصعب تلاقي عربية تحقق لك الرضاء الشخصي في ظل هيصة العربيات و الدخول فى موال جديدة و لا مستعملة ، عيوبها اية و مميزاتها اية ..... لغاية ما دماغك تسخن و تقول مالها البسكيلاتة الصيني .

بالنسبة للتوكيل و الضمان ..... اعتقد ان ممكن ترجع لموضوعات الملاك مع التوكيل فى كافة المودلات لان المعاملة واحدة .

بالنسبة لقطع الغيار .... متوفرة داخل و خارج التوكيل لكنى مش عارف اسعار و ربنا ما يخلينى نشترى ( ^ _^) ، لكن مشوار صغير لشارع دمشق او محل قطع غيار و اتمشي اسأل على اسعار قطع غيار عااااااادي ما تنكسفش محدش له عندك حاجة و هما متعودين ناس تسأل و تمشي .... مشوار ساعه يريح قلبك و انت هتدفع فلوس مش اى كلام .

اما سر عدم الدعاية عن الاسبلندور او الكلام الكتير عنها : دة يرجع للتوكيل اللى بيهتم بالدعاية للموديلات الاكثر شبابية باعتبارها الاكتر طلباً في الشراء ( و الكلام دة من ناس فى التوكيل ) و اعتقادي الشخصي انها لو اتعمل لها دعاية كافية ها تعمل شغل جامد قوووى ، و اعتقد انها بقيت موجودة على الساحة باثباتها لنفسها بدليل سؤالك عنها و سؤال العديد من الافراد عنها فى المنتديات الاخري و كذا واحد و انا سايق يسألنى اخبارها اية معاك

عموما ً : اعمل بحثك كويس ، أسأل الناس عنها ، شوف قطع الغيار ، و انا امكن جربها ( ناس كتير بيفرق معاهم التجربة فى القرار ) ..... و ربنا يوفقك للى فية الخير لك

تحياتي

أستاذنا / هاني

شكراً لردك الكريم .... و عذراً انا مسافر برجع بعد 5 ايام بطلع لك الفواتير و انقلك قيمة الصيانة منها بالتفصيل

فعذراً علي التأخير .... انا عارف ان الواحد لما بيدور على معلومات بيكون عاوزها فوراً