اليوم 19-6-2011 كان من سوء حظى انى اوصل صديق ليا رايح يستلم عربيته اللوجان من توكيل العبور بعد حادثة واضرار كسر فى الزجاج الخلفى وتغيير شنطة ورشها والفاتورة اتكلفت 3075ج منهم 900ج مصنعيات وخامات وخلافه طبعا غير ال10% ضريبة ما علينا !!!!!
المهم العربية كانت بايتة من الخميس والشغل ما ياخدش ساعتين زمن لو ناس محترفة وفعلا تستاهل انها تشتغل فى توكيل عريق زى رينو
بس نقول ايه توكيل مصرى بخيل بيبيع الاف العربيات وبيكسب مليارات ومستخسر يشغل ناس فاهمين صنعتهم مش بيبوظوا الشغل
من خبرتى القليلة فى التعامل مع التوكيلات عن قرب
تقييمى لمركز خدمة العبور .... من خمس نجمات
المهم صديقى ما استلمش العربية لأنه لقى رش الشنطة اى كلام ومش نضيف خاصة من جوة
وقعد جنبهم كمان ساعتين عقبال ما رشوها تانى كده والله كأننا كنا رايحين نرشها فى الشارع عن دوكو الاسطى حودة مش توكيل العبور !!!!!!!!!!
المصيبة الاكبر انه لما روح وباكلمه اطمن عليه لقيته بيصوت وبيسب ويلعن فى التوكيل والمهندس والفلوس وبيدعى عليهم
بيفتح الشنطة مش بتفتح
بعد يمين وشمال وفك للكنبة والواد بلية نط فى الشنطة من جوة وطفش الكالون وفتح الشنطة
لقى البهوات مركبين الكالون بالمقلوب
اه والله بالمقلوووووووووووووووب !!!!!!!!!!!!!!
حسبى الله ونعم الوكيل فى كل قرش خادوه
طبعا دمه اتحرق وانا اتأكدت مليون فى المية ان رينو اسوأ توكيل فى مصر والحمد لله
وسبحان الله اكتر توكيل بيبيع فى مصر برضه
ناهيك بقى عن الهزار وعدم الاهتمام بالعملاء والمكان المفتوح كله على بعضه صالة عرض ومكان صيانة واستراحات غير كافية للعدد المتواجد
صحيح نسيت اقولكم العربية كان فاضلها 700 كم وتكمل ال10000 كم والباشمهندس ما رضيش يعمل الصيانة بدون حجز ويوم تانى بقى من حرقة الدم اللا متناهية
طبعا ده كان قبل اللى حصل
انما دلوقت والله لو ما فيش غير التوكيل مش هاخليه يعمل فيه اى حاجة بعد كده باذن الله

اخيرا طبيعى جدا انك تنفعهم فلوس ويعاملوك اسوأ معاملة
وطبيعى ان الحاجة السليمة تبوظ وخد من ده كتيييييييييييير طالما قبلت انك تروح اى توكيل من بتوع رينو وماحدش يقولى عشان الزحمة
مش قد التصليح والصيانة ما يستوردوش عربيات ويبيعوها لنا ويقبضوا دم قلبنا
حسبى الله ونعم الوكيل