أوبترا ولا سيراتوا ولا النترا 2011

**abazax** · 22-06-2011 10:58 AM

طبعاً انا عارف أنه المقارنة ديه معتادة.. وبيدخل فيها كمان الكروز بس أنا أستبعدتها عشان السعر.. أنا شفت كذا مقارنة على المنتدى بس حابب أسمع رأيكم بالنسبة للى وصلتلوا.. خصوصاً انه ملاحظ أنه ما شاء الله الناس هنا كلهم محترمين وخدومين جداً..

أنا ان شاء الله ناوى أجيب عربية أوتوماتيك اليومين دول ومحتار بين الثلاثة دول..

السيراتو..
شكل أحلى وموتور أقوى.. بس فيه ناس كتير بتخوفنى من أنه العربية منظر وأوبشنز أكتر منها إعتمادية.. غير موضوع العفشة الناشفة، فيه ناس بتقولى أنه الأستمرارية بتاعة أداء العربية على المدة البعيد (Durability) مش عالية قوى.. وأنه عشان أحس أنى راكب سيراتو لازم مقلش عن ال(EX) وديه الصراحة برة الميزانية بتاعتى عشان لو قدرت أعدى 100 ألف حيبقى بحاجة بسيطة قوى.. يعنى أخرى ال(SX) ويمكن خليجى كمان :)

الإلنترا..
من حيث الشكل والموتور هى بالنسبالى فى النص بين السيراتو والأوبترا.. أنا بس خايف من حاجتين:
أولا: موضوع الباور الكهربا اللى مش بيفصل بعد ال100 ده
ثانياً: فكرة أنه الواحد يجيب عربية وبعديها ب 3-4 شهور الشكل الجديد ينزل والواحد يبقى أسمه راكب الشكل القديم :)

الأوبترا..
من حيث السعر هى أحسنهم بالنسبالى.. هى أقلهم فى الشكل الصراحة.. وعيبها إنها لا فيها (ABS) ولا أير باجز ولا تارة ملتى... لكن بشكل عام هى عربية منتشرة وقوية وسمعتها حلوة من حيث الأداء والثبات..

موضوع الوكيل مش فارق معايا قوى الصراحة عشان التلاتة توكيلهم مش قد كدة قوى.. هو يمكن بس منصور أفضلهم من حيث القرب عشان أنا ساكن فى مصر الجديدة..

الفكرة هل الواحد يزود فى المبلغ مقابل أنه يأخد حاجة أحدث وشكلها أحسن؟ ولا الموضوع مش مستاهل قوى والواحد يأخد الأوبترا.. أنا يهمنى برضه قوى كفاءة العربية، يعنى متبقاش فى الأول كويسة وتييجى بعد فترة تبدأ تعمل مشاكل.. يعنى مش عايز أنحاز للشكل على حساب الكفاءة.. بس هل بقى الأوبترا مثلا أحسن من حيث الكفاءة على المدى الطويل؟؟؟ أو مثلا فرق السعر مش حيدينى غير شكل وشوية أوبشنز مش ضرورية قوى؟؟

مع العلم أنه انا مش ناوى أغير غير بعد فترة طويلة إن شاء الله.. يعنى بإذن الله ديه حتكون عربية العمر...

ياريت أعرف آرائكم بحيادية وشكراً مقدماً :)

**Abdm** · 22-06-2011 03:06 PM

يا ريت حضرتك تدخل فى المقارنة دية كمان النيسان صنى واللانسر . وشكر

**elkammash007** · 22-06-2011 03:23 PM

مفيش لانسر فى السوق اصلا يا باشا التوكيل نفسه فاضى

**Bassem Raafat** · 22-06-2011 04:13 PM

يا باشا فى شرحك من أول الموضوع شكلك كده راسى على الأوبترا ، وفعلاً ممكن تكون هى المناسبه ليك ولإمكانياتك ، ويا ريت تشرفنا فى قسم شيفروليه وتقرا مواضيع الأوبترا ، وإحنا معاك ...... وبالتوفيق إن شاء الله .

**shahen** · 22-06-2011 05:16 PM

اقول لحضرتك دى نفس الحيرة التى مريت بيها بس كان معاهم النيسان صنى وفى الاخر استقريت على شيفورلية اوبترا لعدة عوامل منها الاعتمادية والسعر المناسب وحجم الصالون النيسان فيها اوبشنز اكتر بس شكل بصراحة مش عجبنى ودى اذواق غير ضيق السيارة الالنترا غبور بيموت الشكل القديم غير العفشة الضعيفة لو معاك اوزان فى الكنبة الخلفية السيراتو لم اتعمق فيها كتير وواضح انت مش حتغير على المدى القريب وعايز عربية تتحمل فاعتقد انك وصلت للقرار بس عايز راحة نفسية وادخل على قسم شيفورلية وحستفاد كتير ان شاء الله وبالتوفيق باذن الله

**ahmed_hanafi** · 22-06-2011 06:04 PM

انصحك بنيسان سوبر صالون للاسباب الاتية:

1- السعر قريب من امكانياتك (102 الف)
2- اوبشنز اكتر بكتيير اوي من الاوبترا
3- توكيل محترم اوي
4- موتور قوي جدا
5- ثبات عالي
6- اعتمادية عالية
7-تكييف ثلاجة
اما لو مش فارق السعر يبقي السيراتو

**abazax** · 22-06-2011 06:06 PM

المشاركة الأصلية كتبت بواسطة abdm

يا ريت حضرتك تدخل فى المقارنة دية كمان النيسان صنى واللانسر . وشكر

الانسر فعلاً مش موجودة.. غير كدة توكيلها مش مستقر قوى ومحدش عارف حترسى على أيه

المشاركة الأصلية كتبت بواسطة bassem raafat

يا باشا فى شرحك من أول الموضوع شكلك كده راسى على الأوبترا ، وفعلاً ممكن تكون هى المناسبه ليك ولإمكانياتك ، ويا ريت تشرفنا فى قسم شيفروليه وتقرا مواضيع الأوبترا ، وإحنا معاك ...... وبالتوفيق إن شاء الله .

أنا فعلاً ميال للأوبترا.. بس ممكن أطلع للإلنترا.. لو الفرق فعلاً يستاهل.. وبرضه السيراتو الخليجى مش بعيد عنهم قوى.. عشان كدة حابب أسمع لو حد عنده رأى أو ترشيح تانى..

المشاركة الأصلية كتبت بواسطة shahen

اقول لحضرتك دى نفس الحيرة التى مريت بيها بس كان معاهم النيسان صنى وفى الاخر استقريت على شيفورلية اوبترا لعدة عوامل منها الاعتمادية والسعر المناسب وحجم الصالون النيسان فيها اوبشنز اكتر بس شكل بصراحة مش عجبنى ودى اذواق غير ضيق السيارة الالنترا غبور بيموت الشكل القديم غير العفشة الضعيفة لو معاك اوزان فى الكنبة الخلفية السيراتو لم اتعمق فيها كتير وواضح انت مش حتغير على المدى القريب وعايز عربية تتحمل فاعتقد انك وصلت للقرار بس عايز راحة نفسية وادخل على قسم شيفورلية وحستفاد كتير ان شاء الله وبالتوفيق باذن الله

أنا برضه مش بحب الصنى.. ضيقة من ورا وتحسها بتاعة الناس الكبيرة أكتر.. ده غير أنه فوانسها اللى ورا ديه بتفكرنى بعيون الكائن الفضئى.. شبه e.t :)) عموماً ديه أزواق فى الآخر...

وأنا فعلاً دخلت على قسم شيفورليه ولقيت الناس ما شاء الله عاملة مجهود ومواضيع ممتازة..

**Bassem Raafat** · 22-06-2011 06:50 PM

المشاركة الأصلية كتبت بواسطة ahmed_hanafi

انصحك بنيسان سوبر صالون للاسباب الاتية:

1- السعر قريب من امكانياتك (102 الف)
2- اوبشنز اكتر بكتيير اوي من الاوبترا
3- توكيل محترم اوي
4- موتور قوي جدا
5- ثبات عالي
6- اعتمادية عالية
7-تكييف ثلاجة
اما لو مش فارق السعر يبقي السيراتو

ماشى يا باشمهندس ، كده بتقطع على الأوبترا ، ده حتى إحنا لسه واكلين مع بعض عيش وتورته فى مقابلة نيسان ..... ماشى ماشى ... ليك منسق يترد عليه : ))))

بجد كلام الباشمهندس / أحمد حنفى مظبوط فى موضوع النيسان ، وبرضه الرأى الأول والأخير ليك وبالتوفيق .

المشاركة الأصلية كتبت بواسطة abazax

أنا فعلاً ميال للأوبترا.. بس ممكن أطلع للإلنترا.. لو الفرق فعلاً يستاهل.. وبرضه السيراتو الخليجى مش بعيد عنهم قوى.. عشان كدة حابب أسمع لو حد عنده رأى أو ترشيح تانى..

طيب حاول تركب وتسوق الإتنين علشان تشوف إنت مرتاح لأنهى أكتر .

وبصراحه أنا برضه كنت ميال للإلنترا فى كل شيئ ، بس موضوع الباور والثبات ده كان قالقنى ساعتها .

وأنا فعلاً دخلت على قسم شيفورليه ولقيت الناس ما شاء الله عاملة مجهود ومواضيع ممتازة..

ربنا يخليك يا باشا ، وده برضه ميقلش عن مجهودات كل الشباب فى كل الأقسام وخصوصاً قسم نيسان .

**abazax** · 22-06-2011 07:49 PM

المشاركة الأصلية كتبت بواسطة ahmed_hanafi

انصحك بنيسان سوبر صالون للاسباب الاتية:

1- السعر قريب من امكانياتك (102 الف)
2- اوبشنز اكتر بكتيير اوي من الاوبترا
3- توكيل محترم اوي
4- موتور قوي جدا
5- ثبات عالي
6- اعتمادية عالية
7-تكييف ثلاجة
اما لو مش فارق السعر يبقي السيراتو

أنت فعلاً رأيك محترم ومنطقى جداً.. النيسان وبالذات السوبر صالون عربية ممتازة.. بس هى بالنسبالى كلاسيكية زيادة عن اللزوم.. وموضوع التقفيل المصرى ده مش مريح شوية..وانت عارف كدة فيه شوية حاجات ممكن تكون صغيرة بس بتبقى مقرفة قوى لما تظهر فى العربية..

المشاركة الأصلية كتبت بواسطة bassem raafat

ماشى يا باشمهندس ، كده بتقطع على الأوبترا ، ده حتى إحنا لسه واكلين مع بعض عيش وتورته فى مقابلة نيسان ..... ماشى ماشى ... ليك منسق يترد عليه : ))))

بجد كلام الباشمهندس / أحمد حنفى مظبوط فى موضوع النيسان ، وبرضه الرأى الأول والأخير ليك وبالتوفيق .

متقلقش يا باشمهندس باسم.. مفيش تقطيع ولا حاجة :)) وانا إن شاء الله أياً كان اللى حرسى عليه، ححاول أكون نشيط فى جميع الأقسام :))

**abazax** · 22-06-2011 07:55 PM

طب حد يا جماعة يعرف معلومات عن ال Accent RB ووضعها بالنسبة للإلنترا والأوبترا؟؟

أنا سألت صاحب معرض جديد فى مصر الجديدة قاللى إنها عربية خفيفة قوى.. بس أنا الصراحة مش واثق فى كلامه قوى لأن شكله بيقول الكلام ده عشان الطلب على العربية جامد وهو ضامن أنه بايع الدفعة اللى عنده وعايزنى آخد حاجة تانية...