-
حادثة و عاوز رأيكم
امبارح بالليل خال مراتى عمل حادثة و التفاصيل اللى عرفتها مش كاملة علشان لسه مش متماك اعصابه بس مبدئيا محتاج رأيكم بخصوص عربيته.
اللى حصل ان شاب مسطول بيجرى على 120 فى شبرا عند مدرسة التوفيقية :eek: :eek: :eek: بعربية النترا جديدة و هوب راح خابط يمين عربية رائد شرطة راح حدف شمال و لبس فى عربية خال مراتى الأكسيل من ورا، الشنطة اتعجنت بالكامل و دخلت على الكنبة، الحمد لله الأصابات كانت اغلبها كدمات جامدة و مراته كتفها اتشرخ شرخ بسيط.
طبعا راحوا القسم و عملوا الأجراءات المعتادة و كمان الولد اللى خبطهم اتحول مستشفى علشان يعملوله تحليل و بصراحة مش قادر اتعاطف معاه مع انه فى القسم و النهاردة فى النيابة اقواله كانت واحدة و قال انه كان ماشى 120 و مكنش فى وعيه :eek: بصراحة مستغربها جدا بس واضح انه ولد عبيط و اهله جم لخال مراتى النهاردة و قال انهم ناس طيبين و العربية مكنتش بتاعته و كانت بتاعة اخت صاحبته اللى كانت راكبة معاه، خال مراتى الطيب اتنازل لما والدة الولد و اخوه اترجوه و بالرغم من كده النيابة حبست الولد النهاردة.
المهم العربية راحت لناس معرفة خال مراتى فى القللى و قالوا انهم هيجربوا يعملوا زراجين الأول قبل ما يتكلموا فى تغير نص او حاجة من دى، و بيقولوا لو الشاسية مش هيتعدل كويس، هيجيبوا شاسية استيراد؟!!! بصراحة اول مرة اسمعها بس انا خبرتى قليلة و ياريت لو مفيهاش تتقيل تقولولى رأيكم فى الكلام ده
-
بص انا مش خبير في حكاية تغيير الشاسيه
لكنها ممكنه لو ورقها يتغير في المرور
بس النصيحة اللي ممكن اديهالك
1 - غير و ماتستعلدش حاجه (لأن الاكسيل مش ناقصة حد يلعب فيها - هيا مش ثابتة اساسا)
2 - لو ما لاقيتش نتيجه كويسة عندك
هاتهالى المنصورة وأوعدك انها هاترجع جديدة
الف سلامة على خالك و غلط طبعا لما اتنازل (الولد ده كان لازم يعرف هوا عمل ايه)
-
احسن صنايعيه في المنصوره و صدقني مش هتندم
اهم حاجه سلامه الباشا و المدام و اكبر غلط انه اتنازل يعني حرام العربيه الي باظت و حرام الارواح الي كانت ممكن تروح و حرام لفلوس و الوقت الي هيضيعوا هدر
انا بابا حصلوا نفس الي حصل لخال حضرتك
يعني بابا من النوع الطيب و المتسامح بس لما شاف ان عيل صغير سايق الميكوباص و دخل فيه ضيع الفانوس و طبق الشنطه قام كلم عمي ساق العربيه و بابا ساق الميكروباص و عانه في الجراج يمكن مش هتصدق بس ده الي حصل
و اول كلمه بابا قالها لسواق الميكروباص انه لو ايه الي حصل مش هيتنازل عن عربيه جديده بدلها مع ان الموضوع بسيط و ميستاهلش ده فانوس و شنطه يعني حوالي الف جنيه
الراجل قال حرام و مش حرام بابا قاله ان هو ملوش عنده ميكروبصات و شوف مين الي هيديك الميكروباص
المهم تاني كلمه قالهاله انا متنازل عن عربيه جديده يروح يقف على ايد السمكري لحد ما تخلص
و يدفع تمن العطله الي هو اتعطلها و خصوصا انه دكتور نسا و توليد
كمان قاله ان الميكروباص هيستعمله لحد ما العربيه تخلص
الراجل جابله فانوس صيني مكان اليباني بابا كسرهوله على الارض و قاله يركب مكانه واحد جاي بفاتوره من التوكيل
المهم الباشا الي هو بابا عان الميكروباص في الجراج لانه مش هيستعمله طبعا
و بعد ما العربيه خلصت بابا دفع نص التكاليف
القصه دي مش ان بابا بيرخم او هو مش متسامح لا
لانه بيحط مبدا ان الغلط مش بيجيب الا غلط و انه بيعلم السواق و صاحب الميكروباص الصح ايه
كمان لما يقعدوا يحكوا مع بعض تبقى الرساله واضحه
على العموم ربنا يعوض على خالك خير و روح المنصوره مش هتندم والله
-
لا حول ولا قوة الا بالله وحسبي الله ونعم الوكيل في الاستهتار وعدم الاحساس بالمسؤوليه اللي الناس بقت فيه ........قدر الله وماشاء فعل يا استاذ حسام وربنا يرفع عنهم ان شاء الله ويجازي خال زوجتك خير بغض النظر عن قراره صح او خطأ لكن اللي متأكد منه ان ثوابه كبير عند ربنا سبحانه وتعالى وان شاء الله الموقف ده مردود ليه في حياته هو واسرته ان شاء الله .
بالنسبه للإصلاح خصوصا الشاسيه انا واحد من صحابي كان برضه عمل حادثه احتاجت استعدال الشاسيه وكان الجزء اللي محتاج يتعدل في الشاسيه شمال تقريبا المهم كان رقم الشاسيه موجود في الجزء ده للصدفه السيئه وانا فاكر ان وقتها ناس كتير نصحتنا بعدم الاصلاح لخطورة استعدال الشاسيه في المستقبل من ناحيه ومن ناحيه اخري انهم قالوا لازم ندق رقم الشاسيه تاني ودي مشكله مع المرور وعند اعادة البيع ومشاكل كتير كده وانا لقيت ان من باب الامانه اقول لحضرتك مع اني فنياً برضه ماقدرش اساعد للأسف لكن دائما في رأي عام ان بلاش التصليح في الشاسيه والكلام ده ومع ذلك اذا لزم الأمر ومفيش بديل لما كنت بسأل مع صاحبي قالوا بتاخد اذن من المرور اللي السياره تبعه فا اعتقد الموضوع ده هايحسم بزياره للمرور اللي خال زوج حضرتك تابع ليه وان شاء الله تتحل وربنا معاكم جميعاً .
-
اخى العزيز حسام الف سلامه اولا لخال المدام واسرته
ثانيا ابعد تماما عن موضوع شراء الشاسيه ده اللى هايحصل انكم تشتروا ربع خلفى كامل بيبقى متقطع جاهز والسمكرى بيظبط المقاسات على الخبطه اللى فى العربيه وممكن تلاقى نفس لون العربيه كمان ( هيا لونها ايه وانا اسألك عندنا على الموضوع ده)
-
لا حول و لا قوة إلا بالله
قدر الله و ما شاء فعل و إن شاء الله فى ميزان حسناته
إللى حصل خلاص حصل مش هانتكلم فيه مع إن الولد كان يستحق يتعاقب عشان يفوق ما علينا
رأيى ذى ما قال بعض الإخوة - تغيير ربع خلفى
بس ده مش هايكون أكيد إلا لما سمكرى ثقة يبص عليها لو عندك صورها إرفعها أو من الآخر إبعت العربية على الحرفيين و كلم كريم منير يقولك توديها لمين و أكيد كريم هايقوم بالواجب و زيادة
-
قدر الله و ما شاء فعل يا حسام.
هيا من الوصف كده يا تتعدل لو عضم العربيه لسه ناشف و بحالته .
اما لو كانت العربيه اتعمل فيها شغل بارومه و لحامات قبل كده يبقي حتغير نص خلفي .
اما موضوع تغيير الشاسيه بلاش لانها مش مستاهله .
و ربنا يجعلها اخر الاحزان
-
قدر الله وما شاء فعل.
تغيير الشاسية يعني تغيير العربية بالكامل
وتجميعها من اول وجديد على الشاسية الجديد
ودي شغلانة صعبة ونتيجتها ضعيفة وكفاية ان
المصانع عندنا تجميعها وتقفيلها زي الزفت
فما بالك من الصنايعية. دة غير الغلبة في المرور
للترخيص وغير مصاريف التسجيل ونقل الملكية
لان في الحالة دي بتعتبر عربية جديدة لان في مصر
الشاسية هو العربية اتغير الشاسية يعني عربية جديدة
على طول ولازم لها اوراق جديدة وافراجات جمركية
وشغلانة.
خلية في الزرجينة الاول لو اتلمت على كدة يبقى خير وبركة
اما لو الشاسية مظبطش يبقى يغير ربع والامر لله.
-
لا حول ولا قوة الا بالله
قدر الله وما شاء فعل
لاء يا حسام مانحش بتغيير الشاسية
غلبة جامدة في المرور وحوارات غبية
العربية تتدخل على الطبلية بتاعت الشاسية يضرب مقاسها على الكمبيوتر ويتم استعددال الشاسية
ده الفيد بصراحة
والصاج الخارجي مقدور علية
لو فيه سمكرة يتعمل لو فيه تغييري يتغير دي حاجتها رخيصة
وبعد كدة العربية تتباع لانها اتعابت بصراحة ولا انصح انكم تخلوها لان الاكسيل بطبعها ضعيفة شوية
قدر الله وما شاء فعل
تليفوني معاك على الموبايل واكيد مش هاتاخر
انا الولد اخو مراتي لسه داخل امبارح في عربية كرولا زي بتاعتي بهدلهالوة من قدام ونزلت مع الراجل الحرفيين اظبطهالة وان شاء الله هاتخلص خلال يومين
شوف ولو عايزني انا تحت امرك
-
قدر الله و ما شاء فعل و لعلها تكون كفارة إن شاء الله
انا عمري ما سمعت عن موضوع شاسية استيراد ...؟؟ غالبا بيكون يا ربع يا نصف سياره لأن على حسب معلوماتي المتواضعه غير مسموح باستيراد الشاسيهات و لذلك بيقطعوا السيارات المستورده
و لله الأمر من قبل و من بعد
Content Relevant URLs by
vBSEO 3.6.0 PL2