الموضوع: عفشه كورولا 97

عندي مشكله في عفشه العربيه بعد مشوار المصيف السنه دي طبعا فيه تحميل و اوزان في العربيه و كمان خدت مطب هواء بسرعه المشكله اللي حاسس بيها كالاتي

1- لما اجي الف الدركسيون وانا واقف و دايس فرامل لو العربيه و اقفه علي مطب او ارض مش مستويه باسمع صوت زي خبط حديد في بعضه غير كده مش باحس بالصوت ده يعني لو علي ارض مستويه او وانا ماشي بالف الدركسيون و مفيش صوت خالص

2- صوت تزييق في الجنب اليمين لو ماشي علي ارض مش مستويه او باعدي مطب علي التاني مثلا لكن لو خدت المطب بالراحه خالص مش باحس بالتزييقه دي

ان شاء الله هاروح لعفشجي يوم السبت وربنا يستر وتطلع بسيطه انا متوقع كاوتشات او مساعدين يا ريت اللي عنده فكره المشاكل دي ممكن تكون من ايه يفدني

الحمد لله انهارده روحت لعفشجي و بعد ما جربنا سوا كان فيه صوت خبط حديد في الطرق غير الممهده في الجانب اليمين و بعد ما بص علي العفشه مش لاقي اي حاجه فك الجنب اليمين قدام كله و مش لاقي حاجه مش طبيعيه
المهم في الاخر لقينا المشكله من مسمار افيز بتاع التكييف اللي كنت عنده من حوالي شهرين ركبه علشان يربط مواسير التكييف المسمار مربوط في العلبه بتاعه البطاحه و طويل جدا حوالي 4 سم فكان بيحتك بالمساعد وهو بيلف مع العجل او وهو بينضغط في المطبات وطبعا كان بيسبب صوت صريخ زي متكون العفشه مش متربطه
فكينا المسمار لقينا فعلا اثر الاحتكاك باين فيه و بعد ما جمعنا الجنب تاني و الراجل بالمره فك كاوتشات الجنب و بص علي الشحم

الحمد لله المشكله اتحلت والعفشجي طمني ان ده مأثرش علي المساعد لان الاحتكاك في الجزء العلوي من المساعد اليي مبينضغطش

شكرا لكل الزملاء اللي حاولو يحللوا المشكله معايا و الحمد لله انها طلعت حاجه بسيطه