المشاركة الأصلية كتبت بواسطة ghazy12
مع كامل احترامي لكل وجهات النظر, و اسمحولي اخرج بره الموضوع الاساسي بعد اذنكم
و ارد على الأعضاء الكرام m3_dolphen و الباشمهندس otefa من وجهة نظري...
نعم ربنا علينا لا حصر لها طبعاً, بس اللي احنا فيه في البلد دي مش فرض علينا اننا نعيشه,
و بمعنى آخر... ممكن اي شخص يسيب البلد و يعيش في بلد تانيه, و بردو ربنا يكرمه عادي
مش معنى ان الغرب عندهم مشاكل لانهم غير مسلميين, يبقى العيشه في بلادهم نكد او غير مناسبه
هما ليهم دينهم, و احنا لينا ديننا... لو خدنا مثال ان شخص مسلم عايش في الخليج, او كندا, او استراليا...
هو الشخص ده مش هيكون عايش بشكل محترم جدااا و افضل من العيشه في مصر ألف مره ؟؟
و ده على اعتبار انه قدر يلاقي فرصة عمل مناسبه, و ان ربنا وفقه و كرمه...
هتقوللي دي مش بلده... هقولك على مستوى الخليج صح مش بلده و ممكن يحصل اي حاجه و يستغنوا عنه,
طيب ما هنا في مصر ممكن يحصل اي حاجه و بردو يستغنوا عنه, و ده حصل بالفعل كتييييير
لو في استراليا او في كندا, يبقى ممكن يقدم على هجره و يبقى مواطن كندي او استرالي رسمي
و يحمل جنسية البلد, و بالتالي بيتعامل معاملة المواطن الكندي او الاسترالي او غيره...
لو عايش في كندا او استراليا, و قدر يلاقي شغل مناسب و ظبط اموره مش هيبقى مرتاح ؟؟؟؟؟؟؟؟
و مع كل ده... مازال مسلم و ملتزم و بيصلي و يصوم و يزكي و يتصدق و كل حاجه... ايه المشكله ؟؟؟
في المقابل... هيلاقي تعليم محترم, و مستوى معيشه محترم, و حياة راقيه, و نظام محترم, و بياخد حقه,
و الأهم من كل ده... بيتعامل على انه انسان (بني آدم) ليه حقوق و عليه واجبات و من حقه يعيش
حياة كريمه بشكل محترم و آدمي و انساني و يتعامل بنفس الشكل بردو... ده مش هيفرق بردو ؟؟؟؟
هل تقبل تعلم اولادك بالمستوى الحالي للتعليم في مصر ؟؟؟؟ ( انا شخصياً لا اقبل )
احنا في مصر بنصبر نفسنا بكلام كتييييييييييير, بس ده مجرد كلام ليس له ادنى علاقه بالواقع للأسف
انا في يوم من الايام كنت عايش في الخليج, و مولود هناك اصلاً, و سافرت اكتر من بلد في الخليج
و ناس كتييير عارفه حق المعرفه مستوى المعيشه هناك عامل ازاي, و الحياة هناك شكلها ايه ؟؟؟
يا سيدي الفاضل احنا في مصر عايشيين بأقل من أقل مستوى في دول كتيييييير حوالينا المفروض
ان احنا (بالأسم بس) احسن منهم, و بنطنطن بكلام رنان زي مصر ام الدنيا, و مصر الحضارة,
و مصر هي قلب الوطن العربي.......... كل ده كلام جميل, لكن احنا فين فعلياً منه ؟؟؟؟؟؟؟
احنا فعلاً عندنا حضارة هي الأعرق و الأقدم في العالم كله... و لكننا بلا حــاضر للأسف
مش هقول و بلا مستقبل, لان ده في علم الغيب و لا يعلمه إلا الله سبحانه و تعالى, لكن يا رب يكون في مستقبل
بلاد كتيييييييييير حوالينا بلا حضارة, لكنهم يملكون حاضر مشرف و حافل بالانجازات, و مستقبل
مشرق جدااااااااا لا تغيب شمسه ابدااااا لما ينتظرهم من ازدهار و تقدم و نمو على كل المستويات...
الحمد لله على كل شئ و على كل نعمة انعم بيها علينا طبعاً, لكن لازم نحمد ربنا مليون مره
على نعمة العقل اللي ربنا انعم بيه علينا علشان نفكر و نتدبر امورنا و نختار مصيرنا و مستقبلنا,
لان الانسان مخير و ليس مسير, و بالتابعيه لك الحق في ان تختار مستقبل افضل و حياة افضل
و كل ده بنعمة العقل و التفكير بشكل سليم لنفهم واقع الامور و نقرر ماذا سنفعل بصدد هذا الواقع...
انا مش بقول نسيب البلد, لكن لو الحياة في بلدك اتسدت في وشك تماماً, فلا مفر من انك تسيبها
و ارض الله واسعه و رزق ربنا كبييييير و في كل مكان, و ماحدش عارف الخير فين...
اسف جداا على الاطالة, و ارجو ان اكون قد شرحت وجهة نظري بشكل واضح و بسيط...
تقبلــوا تحيــاتي...