الموضوع: ضرورى قبل ما اشترى 307

انا بدور علي واحدة كويسة بقالي سنة تقريبا هي عربية ممتازة ثبات و اداء و كل حاجه هتحافظ علي مواعيد صيانتها مش هتلاقي منها اي مشاكل بس هي مشكلتها ان قطع غيارها غالية شوية وهو ده الي مخلي عربية بالإمكانيات و الاوبشنز دي تنزل للسعر ده
يا ريت بقي لو لقيت واحدة كويسة كدة و انت بتدور تقولي لحسن انا دخت بجد من التدوير

السلام عليكم ورحمه الله و بركاته
انا هحكي ليك عن 307 عن تجربه ..
مبدئيا العربيه دي من افضل العربيات اللي عملتها بيجو
موتور رياضي - سواء منيوال او اوتوماتيك لان العربيه دي ايزي ترونيك ..يعني ممكن في الشد تجيب المانيوال و تعيش
عفشه كويسه جدا .. فرامل abs و والله انا اول ما ركبت العربيه دي مصدقتش ثبات العربيه واتزانها علي السرعات العاليه و امكانيه التحكم في العربيه .. مبدئيا عادي جدا تاخد ملف - قطم - علي 130 و بأيد واحده و من غير مبالغه
انا لو قعدت احكيلك علي مميزات العربيه مش هخلص دلوقتي ..بس انا هقولك علي الحاجات اللي لازم تاخد بالك منها قبل ما تشتريها
لازم تكشف عليها عند التوكيل ..دا هيكلفك حوالي 150 جنيه بس لازم تعمله لانه ممكن يوفر عليك الاف ودي الاماكن اللي ممكن تكشف فيها
مودرن سيرفس -طريق السندباد جنب رينو
احمد ندا ---------القاهرة الجديده
احمد غلوش----جنب توكيل اوماترا جسر السويس
احمد عمارة -----الفسطاط
وابعد عن محطات البنزين

مهم اوي تكشف عن الفتيس و لازم تجربه في كل اساليب السواقه و مع استخدام و ضع القياده الرياضيه او بدونه
و علي فكره في ناس كتير بتقول ان العربيه دي فيها مشكله في الفتيس .. ودا مش حقيقي كل القصه انك لازم تتابع مقياس الزيت و لونه و تعمله صيانه دوريه لان الفيس دا قلب العربيه دي و اهم حاجة تكشف عليها ضغط زيت الجيربوكس و الكولر بتاعه عشان لو فيه رواسب زى الكرتون كده يبقى معناها ان القربة بتاعت زيت الجير لازم تتغير و ده معناه ان الجير كولر لازم يتفك يعنى شغلانة 3000 -4000
و برده فى قعدتين بتوع الفتيس لازم تكشف عليهم برده
مكنة الباور 5200 جم جديدة و 1500 استعمال للاسف لازم تكون بتسوق العربية كتير عشان لو فيها حاجة تعرفو بتكون زى تقطيع فى الدركسيون وانت بتلف

ولو في اي حاجه الكترونيك هتبان في الكمبيوتر ..
العربيه دي هتعشقها لو عاملتها كويس بس لو اهملتها التعويره فيها بتوجع

ربنا يوفقك

هي معروضة عليك بكام ؟؟؟؟؟؟؟؟؟؟؟؟؟؟

السلام عليكم
انا عندى الsw منتهى الثبات عايز اقول انى اتعلمت عليه القيادة
و لما ركبت عربيات كورى خفت جداً اجرى بيها

مكنت باور ب 5200 ليه يعني هي طبعا عربيه ممتازه بس خرام اسعار قطع غيارها دي اغلي من البي ام

انا لسة واخد العربية امبارح عايز اقولك ان العربية وهم في كل حاجة
شكل خارجي و صالون . موتور و عفشة رغم ان الجنط ١٧ .ثباااااات مقولكش انا كنت راكب الاوبل فيكترا ٢٠٠٣ ودي مفيش كلام علي ثباتها .بس انا مستعد اراهن ان ثبات البيجو دي احسن منها . انا خلصت العربية علي ٧٠ الف عمتا موديل ٢٠٠٦ و حالتها ممتازة و صالونها جديد و فبريكا برة و جوة بس فيها شوية خدوش بسيطة من برة بس فبريكة و عاملة ٧٠ الف كيلو ( يعني كل كيلو ب ١٠٠٠ جنيه :) هههه
حاول تنزل معاه في السعر شوية تحسبا لاي مصاريف هتصرفها عليها لان كدة كدة المستعمل لازم تصرف عليه اول متجيبو و تظبتو كدة علي مزاجك و إن شاء الله العربية تعجبك