النهاردة كان يوم صيانة 30000 و حبيت أكتب لكم تقرير عنه.
كالعادة عملت الحجز من الأسبوع اللي فات عشان أطمن اني مش هتأخر لما أروح أعمل الصيانة و النهاردة وصلت في تمام الساعة 9:30 لمركز الوهدان في 6 أكتوبر و استلموا مني العربية ركبولها طقم بلاستيك اللي بيتحط علي الكرسي و الدركسيون و الفتيس.
بعد شوية جه المهندس عشان يسألني هعمل ايه و قلتله هعمل صيانة 30000 . المهم أخدوا العربية و أنا طلعت فوق الاستراحة و وقفت أتفرج عليها و هم عاملينلها كونسلتوا الصيانة :)
المهم تم عمل البنود التالية:
1- تغيير الزيت موبيل 1 303 جنيه
2- تغيير فلتر الزيت 44 جنيه
3- تغيير فلتر الهواء 116 جنيه
4- تغيير طقم البوجيهات (4 بوجيه) 168 جنيه
5- اسبراي فوم لغسيل الموتور 22 جنيه
6- اسبراي شحم 39 جنيه
7- مياه للمساحات 11.5 جنيه
8- مصنعيات 280 جنيه
اللي فات ده طبعا بالاضافة للكشف علي كل حاجة من أول الأنوار و الكهرباء و المساحات و وضع العربية علي الكمبيوتر و الكشف عليها
الاجمالي كان 983.5 جنيه و الضريبة 10% حولي 98.35 جنيه يبقي الاجمالي 1081.85 جنيه
الحلو بقي في الموضوع ان كان في حملة مجانية صيفية للكشف علي العربيات و كان في تخفيض 10% علي قطع الغيار (باستثناء الزيت) و 15% علي المصنعيات المهم ان الاجمالي بعد الخصم كان 990 جنيه
العربية خلصت الصيانة الساعة 12:30 و جالي المهندس عشان أنزل أدفع و أخد العربية و بالفعل دفعت المبلغ و استلمت العربية. و دي كانت صيانة ال 30000 عقبال ال 100000
ملحوظة: في حاجة كده كنت فاكر انها بتحصلي لوحدي لكن دي طلعت حالة عامة ان ماكينة الزجاج الأمامي يمين فيها عيب الا و هو ان الزجاج بيطلع لحد التلت كده و بعدين هوووب يقوم فاتح تاني لوحده و لما تحاول تاني هووووب يفتح تاني لوحده و التالتة تابتة با برنس و يتوقف عمل الاوتوماتيك و عليك أن تظل ضاغطا علي الزرار لحد ما الزجاج يقفل خالص. المهندس قاللي ان دي عيب معروف و بيغيروا الماكينات دي بس لسه بييجوا شوية شوية و بيتصلوا بيك لما ييجي دورك لأن مفيش من الماكينة دي و بتيجي كميات صغيرة