ما يشاهده الأطفال

**TaoTao** · 01-05-2008 12:36 PM

لما باشوف برامج الأطفال بيصعب علي الأطفال جدا !! ايه اللي بيشوفوه ده؟ مافيش قصص ولا دراما، وكله نسخة من كابتن ماجد، واحد بيلعب لعبة ويتحدى واحد تاني (كونغ فو، عربيات، وصلت لصيد السمك و لعبة الدبور ابو أوطان سموه بوكيمون :d:d)

فيه زمان كام مسلسل مايتنسوش بالنسبالي،
"طمطم" وده كان بيحكي عن ولد في عصر ماقبل التاريخ (كانوا بيلعبوا مع ديناصور :)) كان فيه معلومة ودراما (وفاكر أغنية التتر لو حد عاوز يسمعها :))
ومسلسل فرنسي اسمه "تاوتاو"، وتاوتاو كان باندا صغير له مغامرات وبعدين والدته تحكيله حكاية قديمة بنفس أسلوب أبلة فضيلة الساحر الواحد ياخد منها عبرة وحكمة.
وطبعا "بابار" اللي هو نفس أسلوب "تاوتاو" الأفيال الصغيرة تعمل نصيبة، وييجي بابار يحكيلهم حكاية ويديهم حكمة :)

وأنا مع رأي الزملاء، Dvd يتظبط عليهم المواد المناسبة وتتعرض، مجهود عليكي بس مجهود مثمر ان شاء الله وأحسن من الدش.

**ahmed ismail** · 01-05-2008 01:15 PM

قناة طيور الجنة يا جماعة

وكمان ساعات قناة الاقصى بتجيب كارتون لذيذ لاطفال فلسطسن

**OlaOsman** · 01-05-2008 09:47 PM

ايه قناة طيور الجنة دي يا جماعة؟؟

**OlaOsman** · 01-05-2008 10:21 PM

المشاركة الأصلية كتبت بواسطة TaoTao

فيه زمان كام مسلسل مايتنسوش بالنسبالي،
"طمطم" وده كان بيحكي عن ولد في عصر ماقبل التاريخ (كانوا بيلعبوا مع ديناصور :)) كان فيه معلومة ودراما (وفاكر أغنية التتر لو حد عاوز يسمعها :))

أيوه عايزين :)

ومسلسل فرنسي اسمه "تاوتاو"، وتاوتاو كان باندا صغير له مغامرات وبعدين والدته تحكيله حكاية قديمة بنفس أسلوب أبلة فضيلة الساحر الواحد ياخد منها عبرة وحكمة.
وطبعا "بابار" اللي هو نفس أسلوب "تاوتاو" الأفيال الصغيرة تعمل نصيبة، وييجي بابار يحكيلهم حكاية ويديهم حكمة :)

هو انت مسمي نفسك على إسم الباندا ده؟

**TaoTao** · 02-05-2008 11:20 AM

المشاركة الأصلية كتبت بواسطة OlaOsman

أيوه عايزين :)

كورال: طمطم أتى طمطم أتى .... حيوا الفتى حيث أتى
طمطم (صوت سيد عزمي): طمطم أنا .... شبل الفَلا
طمطم أنا .. شبل الفلا .. مثلُ الصغار أهوى العلا
كورال: هيا بنا خلف الزمان .... فقد نرى فيما مضى الشيء الجديد
طمطم: هيا بنا
كورال: نحكي ونسمع يا فتى
طمطم: هيا بنا
كورال: طمطم أتى طمطم أتى

(ممكن نكتبها في موضوع ذكريات مواليد السبعينات، واقترح نعمل موضوع منفصل لأفلام الكارتون والمسلسلات القديمة)

المشاركة الأصلية كتبت بواسطة OlaOsman

هو انت مسمي نفسك على إسم الباندا ده؟

إحم إحم، آه ليه؟

بالمناسبة، فيه كارتون مصري جديد وظريف اسمه "هنادي" كويس مافيهوش عنف ومصري أحسن كتير من بكار :)

**Moh.Fahmy** · 02-05-2008 11:50 AM

فيه برنامج عالم سمسم و الله رغم بساطته انما مفيد جدا للاطفال من 4 الي 6 سنوات و بيديهم معلومات ظريفة جدا جدا و بييجي علي القناه التانية الساعة 5
كمان يا جماعة المفروض اللي بيربي لازم يضحي شوية يعني مافيش مانع افرج ابني علي افلام لهنيدي تحت رقابتي انا و ابقي مستعد لكل الاسئلة و الاستفسارات
انما بقية الافلام اعتقد غير مناسبة لانها بترسخ عند الاطفال افكار غريبة جدا يعني مثلا لو الطفل حب شخصية اللمبي و اعجب حتنقلب عنده المفاهيم و يبقي الحرامي و البلطجي شخصيات ظريفة و ظابط البوليس ده راجل غلس ووحش فللازم ناخد بالنا من الامور دي و غلط كبير جدا اني اسيب الاطفال لوحدهم امام التليفزيون حتي لو كان كارتون
مافيش مانع اني افرج ابني علي المباريات و اخليه يحب الاهلي و يحفظ نجومه و يعرف بقية الفرق لان ده مدخل كويس انه اقوله معلومات اضافية زي مثلا الاتحاد بيلعب في اسكندرية و الاهلي بيلعب في القاهرة و المصري في بورسعيد و ان كل المحافظات دي تبع مصر و جميل اني انمي ذاكرته بالمعلومات دي و نتائج المباريات
ايضا مافيش مانع اني اخليه مهتم بالعربيات و ماركتها و الوانها لاني كده حكون علمته الالوان و نميت قدرته الثقافية و احساسه بالثقة بالنفس
المهم هو المعلومة لازم اديله معلومات و اكلمه في السياسة و اعلمه اسماء الوزراء و المحافظين و اكافئه كويس لما الاقيه مركز في المواضيع دي
مش لازم اسيبه فريسة للتليفزيون و خلاص عشان قولت في بداية كلامي ان اللي بيربي صح لازم يضحي شوية يعني انا و الله ما بقدر اتفرج علي فيلم بحبه غير لما مازن و مالك يناموا بالرغم اني عندي تليفزيون في اوضة النوم انما بحب اني اكون قدوة كويسة لمازن بالذات عشان مالك لسه عنده سنتين لما حد يدخل فجأة ما يلاقيش باباه بيعمل حاجة منعه انه يعملها لازم الواحد يكون قدوة عشان يكون مقنع

محمد فهمي

**alaa_dash** · 02-05-2008 11:53 AM

المشاركة الأصلية كتبت بواسطة borgelharm

مافيش مانع اني افرج ابني علي المباريات و اخليه يحب الاهلي و يحفظ نجومه
محمد فهمي

نصيحة في محلها ... وكمان عشان يحافظ عليه من ارتفاع الضغط و الاكتئاب.... و مبروك للاتحاد بالمناسبة :)

**Moh.Fahmy** · 02-05-2008 12:07 PM

الله يبارك فيك علاء باشا و الله فرحنا كتير بالرغم من اني اهلاوي انما في حالة لعبه مع الاتحاد ببقي محايد و ما بتفرقش معايا مين اللي يكسب
انما امبارح كان نفسي الاتحاد يكسب بس كان جول واحد كفاية

محمد فهمي