الموضوع: ارجوكم كيفية الذهاب الى الهانوفيل اسكندرية من شبرا او رمسيس

مفيش ردود خالص؟؟

ياسيدي الموضوع سهل

انت هتخرج من شبرا البلد ولا شبرا الخيمة؟

لو من رمسيس هتاخد كوبري اكتوبر اتجاه الدقي، وتفضل ماشي لحد ما تاخد نزلة كوبري 15 مايو، خد بالك لان النزلة دي صغيرة وديقة ، ومتقلقش هتلاقي يافطة كبيرة عريضة على اكتوبر مكتوب عليها نزلة كوبري 15 مايو

تاخد 15 مايو وتكمل طوالي طوالي ولا يمين ولا شمال لحد ما تلاقي نفسك على المحور وهتفضل مكمل طوالي طوالي على المحور ومتتعداش ال100 عشان في رادارين ، لحد ما تقابلك يافطة كبيرة عريضة برضو مكتوب عليها الطريق الصحراوي لاسكندرية

تاخد النزلة دي وبراحة وانت نازل عشان فيها كيرف رخم حبتين ، وياسيدي هوب هتقابلك البوابات وتدفع ال3 جندي لو انت شخصية عامة غلبانة زينا، وتاخد الطريق طوالي طوالي ولا في يمين ولا شمال

هتفضل ماشي لحد بوابات اسكندرية و تعدي ونقولك حمدله على السلامة .

تروح بقا تمشي طوالي بعد البوابات وتفضل ماشي ماشي حوالي 5 دقايق بالظبط وتسأل ساعتها عن دخلة النخيل او كيلو 21، عموما هو تاني يوتيرن هيقابلك لكن انا مش هقدر اقولك بالظبط مكانه فين.

او لو مش عايز تسأل حد و هتاخد بالك يبقى ، تاخد بالك من ماكدونالدز و تاخد تاني يوتيرن بعد ماكدونالدز، هيبقى على شمالك هو يعني الحارة التانية من الطريق هيقابلك مكدونالدز وساعتها تاني يوتيرن بعده تاخده وتلف.

بعد ماتاخده وتلف اول يمين هيقابلك تدخل فيه وبكدا انت في الكيلو 21 او في النخيل يعني...تفضل بقا ماشي طوالي لحد ما يقابلك تقاطع كبير تاخد يمين وتعدي من جمب النخيل وتفضل ماشي طوالي لحد الهانوفيل ياسيدي

دي وصفة مفصلة ان شاء الله وعموما الاسكندرانية جدعان جدا ، ولكن خد بالك لانهم بيقولو على الكوبري نفق :d

اشكرك بجد استاذى r0xer جدا جدا وربنا يبارك فيك

معلش هطمع فى طلب تانى

ياترى البنزين ال 80 هناك ب 90 قرش برضه ولا اغلى؟؟ عشان كل مابروح هناك بلاقى كل حاجة غالية
وايه البنزينات اللى فى الهانوفيل اللى فيها بنزين 80 واماكنها؟؟

وشكرا لسعة الصدر

اشكرك استاذى جدا انا وصلت اسكندرية انهارده وبكتبلك من هناك ومشيت على وصف حضرتك ووصلت..ربنا يباركلك يارب

الله يخليك ياريس وحمداً لله على سلامتك وسلامة كل اللي معاك وترجع على خير بعد ما تكون انبسطت عندك.

بالنسبة لسؤال البنزينات اعذرني انا من شبرا زيك ومش متعمق اوي في اسكندرية لدرجة البنزينات...فالاسكندرانية يفيدوك احسن مني.

ايه اخبار الطريق معاك وهل كان كويس ولاوحش وفي رادارات ولالا؟