الموضوع: قائمة فنيين بمدينة نصر

السلام عليكم

يا شباب انا عندي طلب يا ريت الاقي مشاركة منكم...
انا ساكن في مدينة نصر (زهراء مدينة نصر) وماعرفش فنيين سيارات كتير هنا وجربت مرة واتنين ودفعت مرة واتنين في الهوا لحد لما بوصل لواحد كويس ولما بوصل مابيبقاش عندي بديل لما بيحصل اي ظروف
مش عارف لية مدينة نصر مافيهاش حد مشهور في كل مجالات صيانة السيارات؟!؟

فياريت لو اي حد عنده معلومة مؤكده ومجربة عن القائمة التالية من الفنيين يشارك بيها هنا:

1. ميكانيكا: أنا بتعامل مع طنطاوي (صاحب المركز اسمة استاذ ياسر) في الحي السابع (او السادس زي ماتشوفوا) هو قدام قهوة سي عمر وبنخشلة من عند ابو رامي يمين لحد مانلاقية على اليمين وسي عمر على الشمال. وبصراحة هو كويس معايا من ساعة ماروحتلة من سنة ونص تقريبا ومن ساعتها انا معاه, بس انا بخلي ناس معينة تشتغل في عربيتي مش اي حد... ومنهم (محمد شرقية - تخصص ميكانيكا) و (أشرف - تخصص عفشة) و (عادل أو على - تخصص كهربا). دول اللي انا بثق فيهم
2. كهربا: طنطاوي
3. سمكري: لا يوجد
4. خراط: لا يوجد
5. تكييف: قالولي على ورشة في وش الوفاء والامل على طريق الزمر, اول دخلة يمين بعد الكافية اللي في التقاطع ودي مش شارع دي جراج بس الكحل جوة... اسمهم ورشة محمد ومحمود وممكن اروحلهم الاسبوع ده ان شاء الله عشان يشوفوا التكييف في اية
6. ريداتير: سيد مزاجة - في السوق برده في السابع
7. قطع غيار وكماليات: انا بجيب برده من عند طنطاوي وفي برده خالد في السوق, جنب طنطاوي علاطول
8. سروجي: أنا أعرف واحد اسمة خالد جنب فهوة سي عمر علاطول... هو محترم جدا وشغله عجبني. هو بصراحة ماعمليش حاجة جامده... بس لما عملها عملهالي بنظافة... ركبلي الغطا بتاع مسند الرقبة كانه راكب في المصنع ولسة احتمال اجربة في تقفيل صدر العربية باللباد عشان بيدخل هوا سخن وانا ماشي

دي معلوماتي, اتمنى الشباب اللي عندهم معلومات سواء كانت عن التخصصات اللي في القائمة او تخصصات جديده يضيفوها

المشاركة الأصلية كتبت بواسطة hima012

ورشة محمد ومحمود انا سمعت عنها كتير

الله يجبر بخاطرك يا استاذ هيما... انا حاسس اني صعبت عليك ان ماحدش رد عليا فدخلت ورديت... انا فعلا مش عارف لية اوصل لقائمة كويسة من الفنيين في مدينة نصر!!!؟؟؟ اتمنى الناس تساعدنا شوية