السلام عليكم يا شباب ,,,

كنا قاعدين فى القهوة فى امان الله فى شارع اسكندر ابراهيم فى ميامى حوالى الساعة 11 مساء
(واللى ميعرفش شارع اسكندر ابراهيم هو شارع مليان ناس وكافتريات وعربيات فى اتجاهين ونهايته طريق الكورنيش وطبعا ميامى معقل المصيفين اللى بيجوا اسكندرية )

المهم ...
فجأه لاقينا فى وسط الشارع امام القهوة بالظبط (القهوة فيها ما لا يقل عن 100 واحد ) بنت بتصرخ جامد و واحد ماسكها وفى ايده مطواه (بيقول انها مراته ) ومسك البنت وعمال يضربها (ويغزها) بالمطواه فى جسمها وفى ايديها واماكن حساسة اخرى فى جسمها

طبعا كل الناس اتجمعت عليه ولمده حوالى نصف دقيقة مفيش حد عارف يقرب منه علشان المطواه اللى فى ايده وعمال يهوش بيها الناس اللى بتقرب منه وكان حامى ظهره فى عربية راكنه...

لغاية لما واحد مننا جاه من وراه وضربه بشومه على ايده و وقع من المطواه و مسكناه وطبعا اخد ضرب بدون رحمة ...
والبنت قامت جريت وهيا بتقع ودخلت القهوة وراحت واقعة على الارض وفقدت الوعى وكانت بتنزف ......

بفضل الله النزيف وقف شويه بس البنت لسه كانت مش دارية بحاجة .....

الواد اخدناه على مخزن جنب القهوه وربطناه لغاية لما البوليس يجى (الواد اخد كمية ضرب جامده جدا بس هو ولا هنا ولا حاسس بأى حاجة ومنطقش كلمة اه )

طولت عليكم....
بنسأل الواد عملت كده ليه يا ابنى .. يقول محدش عارف هيا عملت معايا ايه ... انا عايزكم تسلمونى ... ده شرفى يا جدعان

الاسعاف جت بعد حوالى تلت ساعة واخدت البنت وكان لسه فيها نفس... وبعديها البوليس جه واخد الواد

,,,,,,,,,,,,,,,,,,,

بجد اللى بيحصل ده كتير قوى قوى ...