الموضوع: صيانة الخمسين مع الكثير من التغير

بسم الله الرحمن الرحيم

تم اليوم بعون الله وتوفيقه اجرء صيانة الخمسين الف مع توكيل السبع
وصلت للتوكيل الساعه الثامنه والنصف صباحا بدون حجز وتم تسليم السياره الساعه التاسعه مع قليل من الاستعجال للمهندس عمرو مدير الصيانه له كل تقدير واحترام
وقد تم الاتي:
1- تغير زيت موبيل عشرة الاف مع الفلتر وذلك بمقدار 2.8لتر من الزيت للغياره
2- تغير كاوشت تراب للمساعد الامامي شمال (الثمن 65ج+80 ج مصنعيه)
3- تركيب فلتر التكيف مجانا
4- تركيب وشراء بعض الكلبسات الناقصه في شنطت العربيه والاكصدام الخلفي(16ج)
5- تركيب اريال راديو بدل اللي اتكسر ب(225ج+100ج مصنعيه لكن تم خصمها من قبل المهندس عمرو له جزيل الشكر) ياريت كل واحد يحافظ علي اريله
6- الكشف عالعربيه بالكومبيوتر بعد الشكوي من زيادت الاستهلاك
7- الكشف عالبوجهات وعلي التيل امامي وخلفي مع ابداء ملاحظة ان التيل الخلفي والطنابير في حاجه للتغير بعد مسافه لاتزيد عن خمسة الاف كيلومتر
8- اتمام باقي صيانة الخمسين الروتينيه من تربيط العفشه واللازيمنه الخ...........
9- الكشف علي كرسي السائق ومعالجت طقه مع المطبات
10- غسيل العربيه في السريع ودي اول مره يعملوها مع ان الدنيا اتزحمت جدا قبل الساعه 10
الملاحظات:
تغير جذري وكبير في كل مايخص الصيانه
الله يكون في عونك يابشمهندس عمرو مجهود غير عادي وخناقات مع الصنايعيه وضغط مش طبيعي والتأكيد علي كل شيئ بنفسك حقيقي كان الله في العون
علي فكره وانا بتكلم معاه جبتله سيرت نيل موتورز والاستاذ احمد وطبعا الراجل قلي انه نفسه يخدم اي حد عنده مشكله وانه متابع المنتدي دايما يارت اللي محتاج لمساعده في اي مشكله تخص الصيانه يتواصل مع الراجل المحترم ده
في النهايه تم دفع 599 بعد خصم 50 +15% من المصنعيات
وطبعا عايز اقول ان انطباعي عن الصيانه بعد تجربت العربيه انطباع اعلي من جيدجدا
وشكرا للجميع
تحياااااااااااااااااااااا اااتي

المشاركة الأصلية كتبت بواسطة samsong

الحمد لله انها تمت كما تريد وفي وقت جيد وبدون حجز كمان...وكده العربيه فاقت .......
مبروك وعقبال 100000 و 200000 و................

الله يبارك فيك والعربيه احساس تاني خالص

المشاركة الأصلية كتبت بواسطة sonasteel

عقبال صيانة الــــ 100000000000000000000000
ان شاء الله
تقرير مميز جدا ماشاء الله .
معقولة الاريال ب225 جنيه ... و 100 مصنعية ؟؟
غالي اووووووووي ..... امال لو كهربا هايصل ايه
جزاك الله خيرا انك قلتلنا .... علشان احافظ علي اريالي :)))
اقعد بالعافية

ربنا يخليك ياباشا
بالنسبه للاريل اللهم بلغت اللهم فشهد كل واحد ياخد باله من اريال عربيته ههههههههه

المشاركة الأصلية كتبت بواسطة peaceman

ألف الف مبروك علي الصيانة و عقبال صيانة الـ 100000 كيلو ان شاء الله

هو في سؤالين :

1- هل تم تغيير الزيت موبيل بالفعل ؟؟ انا اعرف ان السبع بيغير شيل
2- هل الـ 600 جنيه اللي حضرتك دفعتهم شاملة ثمن الاريال و المصنعية و لا الـ 600 جنيه ديه الصيانة فقط ؟

الله يبارك فيك ياجميل
وبالنسبه للزيت انا اللي جايبه معايه لاني وكيل اكسون موبيل
وبالنسبه لل600 دي كل الفلوس وبالتفاصيل
150 مصنعيات صيانة الخمسين الف
50 فلتر زيت
225 الاريال
16 كلبسات
65 كاوتشت تراب المساعد الامامي
80 مصنعيت تركيب الكاوتشه
2 4 قافيز للطاسات

المشاركة الأصلية كتبت بواسطة omar-saad

الف مبروك على الصيانة
وعقبال 1000000 ك
الكلبسات اللى انتا ذكرتها فى التقرير
دى اللى بتركب فى الاكصدامات علشان تمسكهم ولا ايه؟

الف شكر ليك ياريس
الكلبسات دي بتمسك الفرش بتاع الشنطه+1 كلبس للاكصدام بس ده خدته بدون تركيب

المشاركة الأصلية كتبت بواسطة mohamednagib

الف مبروك يا خالد باشا ... و يا رب عقبال صيانة ال 200000 للجوك كمان ...

ربنا يبركلك ياباشا
بس انا زعلان منك!!!!!!!!!!!

المشاركة الأصلية كتبت بواسطة ahmed_hanafi

الف مبروك يا باشا وعقبال صيانة ال 100000000000000

وتقرير مميز جدا
وليا سؤال :
انت غسلت العربية من برة بس ولا غسلت الموتور كمان؟
علشان انا اسمع ان هما بيغسلو الموتور كمان
سؤال كمان: هو انت عملت الصيانة غي السبع اللي في المعادي ولا فين ؟؟

شكرا لمرورك ياباشا
الغسيل من بره بس واعتقد غسيل المتور بيكون بفلوس وبيكون بمواد كيماويه وكده
وبيني وبنكوا انا بغسل المتور بصابون بريل وزي الفول ولا بيحصل اي حاجه

المشاركة الأصلية كتبت بواسطة ahmed.tv

اولا مبروك الصيانة والحمد لله انها تمت على خير

ثانيا تسلم ايدك على التقرير المفيد الجميل ده

ثالثا شكر كبير وعميق وخاص للمهندس محمد عمر مدير الصيانات فى السبع على الاهتمام .. واعتقد ان هو ده اللى حضرتك تقصده .. وفعلا المهندسين هناك دايما بيهتموا بالعميل .. وباى مشاكل بتيجى من السيارات

والحمد لله على علاقتنا بكل المراكز .. فعلا نايل موتورز الحمد لله ليه سمعة طيبة فى كل مراكز الخدمة دلوقتى .. والحمد ان مجهودنا فى قسم نيسان ليه صدى كبير فى كل المراكز .. وده اللى وصلنا ليه بالتكاتف بين الاعضاء

وكل ما يكون قسمنا اكتف ونشط وفى تكاتف بين الاعضاء حيكون فى كتير جدا للاعضاء .. وحتحسوا بيه لما تروحوا تعملوا الصيانات

تسلم على مجهودك فى التقرير

وعقبال صيانة المليون

تحياتى

احمد باشا منور الموضوع والف شكر لمرورك ياريس
مجرد ذكر اسم نيل موتورز واسم حضرتك ده كان كافي ان العربيه تحظي بكل الاهتمام والرعايه
وفعلا انا قصدي علي محمد عمر الراجل ذوق
بالمناسبه هو بيقول انه لما بيلاقي مشكله عند حد في المنتدي مابيعرفشي ازاي يتصل بيه عشان يحلهاله والاتصال المقصود بالتلفون



تحياتي للجميع