السلام عليكم الموضوع ده هنقول عن شويه اساليب يستخدمها وطبعا بعض مش كل التجار فى بخس حاجه الناس وفى العموم يبقى استغلال نتيجه لقله خبره البائع
1- من ساعه اتفاقيه الجات والناس طالعه فى تخويف الناس كل شويه يقولوا العربيات هتبقى ببلاش الحق بيع عربيتك وخساره قريبه احسن والكلام ده بيخوف ناس كتيير من غير ما يسألو ا اذا كان فى تخفيض للجمارك فعلا ولا ايه واذا كان فى تخفيض على انهى منطقه السيارات الأوربى ولا امريكى او اسيوى ولو فى فعلا تخفيض على منتجات منطقه على اى فئه من السيارات الملاكى النقل اعلى من 1600 او 2000 التخفيض فى الجمارك هيقابله زياده فى الرسوم ولا ايه
2- لو عارض عربيتك على النت يجى جمب اعلانك ويلزق اعلان مشابه لأعلانك مع فارق انه كاتب نصف السعر اللى انت كتبه ويمكن اقلل ولو دورت كويس هتلاقى الأعلان من غير رقم تليفون او موقع الكترونى عشان يعرف يشد الناس انهم يدخلوا لرخص السعر المكتوب وكده يتشهر الموقع وحتى لو فى رقم التليفون تتصل يقولك اتياعت حتى بعد وضع الأعلان بخمس دقائق
3-لو العربيه دخلت دماغه وليها زبون عنده هيخلى كذا واحد بتصلوا بيك يفهموك لله ويكلفوا نفسهم حق المكالمه عشان يقولوا ان العربيه عمرها ما تتباع بالسعر دة بس وخلاص على كده مش حتى يخلى حد يقول سعر واقع دول جزاريين قوى
4-يشكك فى عربيتك ويقولك ويحلف ايمانات مسلمين وغيرهم ان العربيه دى عامله حادثه وجامده كمان مع انك اول يد ومحدش بيركبها غيرك او يقول كام سي سي تقول 1300 مثلا يستغرب قوى ويقول تبقى مغيره موتور دى الشركه عمرها ما عملت 1300 منها والى اخره حسب افكاره اللى تجد عليه
5-يخضك على العربيه ويدور على اى قطعه لا يوجد عليها دهان وطبيعى هتبقى مأكسده ويقولك العربيه جايبه بارومه يا باشمهندس والبارومه منها باراء
6-يقلب فى العربيه وفجاءه تسمع شهقه تفتكره مات وتستريح من قرفه يقولك دى العربيه فيها كبالن ولا كارونه وعشان انت عارف سعرهم حتى لو بايظين بكام يعنى يفهمك ان دة عيب وان عنده عربيه من قبل ما يخترعوا المحرك رباعى الأشواط عمر ما حصل فيها كده وده ينزل سعر العربيه جامد صح يا ابو فلان هههه ابو فلان ده اللى جاييبه يرد على اغانيه
7- وعشان الراجل حقانى ومش تاجر طابعا ولا ليه فى العربيات هيتصل يسأل اهل الخبره اللى عملوا الموديل ده وباعوه لليابان ولا المانيا عشان يسألهم عن سعر عربيتك وعشان الراجل قلبه طيب هيخبى عنهم عيوب عربيتك وكأنه بيتكلم عن عربيه تانيه بحاله ممتازه ويسمعك الكلام اقل من تمنها بكتيير ويشدد عليه يعنى مش اكتر من كده يا حاج يقولوه ولا مليم الحاج جهبز اللى مظبط معاه
8- لو عربيتك اعلى فئه فى الموديل بتاعها هيكلمك على سعر اقل فئه فيها والتعبان منها كمان
9- طول ما انت بتسمع طول ما هو هيتكلم وموش هيسكت هتقول دى العربيه فيها طقم صوت يرد شيلوا مش عايزه ولو عملت ناصح وشلتوا ساعه دفع الفلوس ينقص فلوس ويقول ده تمن كذا اللى اتشال وده بالنسبه ليه احسن وهو بيبيع ولو الزبون سأل يقولو ابقه هات تسجيل بخمسين جنيه ده حاجه هايفه ولا جنطها 300 جنيه ويبسطها وهو المستفيد
10- دايما عنده اخت عربيتك بسعر فى الأرض لو طلبت تشوفها يا يتحجج انها اتباعت او يوريك زباله على هيئه عربيه ويعرضها عليك وكمان تتدفع فرق عشان يأكد انها احسن ويخلصك من عربيتك اللى مكنتش هتعرفها تبيعها ابدا