حوالى الساعه 10.30م كنت فى شارع منصور خلف وزارة الداخليه لزيارة صديق لى مكتبه فى العمارة التى خلف الداخليه وانا لسه بعدى الشارع والدنيا هاديه ومفيش عربيات تقريبا بسبب مولد السيده والشوارع مقفوله فى المنطقه
وهوب لقيت ناس بتجرى وزجاجات مولوتوف بتطير على الداخليه وبتطير من جوه الداخليه ؟!!!
وحجاره برضه فى الاتجاهين
فى ايه (والعهده على الراوى) قالك بلطجيه ضربوا الناس فى البالون فى حفل تكريم شهداء الثوره والناس راحوا يشتكوا والداخليه واقفه تتفرج وبتقول انهم اسر شهداء ملناش دعوة
فالناس الى اتصابت جم على الداخليه وحصل الى حصل
قلت خلاص اطلع للراجل صديقى ولسه بطلع الرصيف ولقيت ضرب النار بقى زى القليه
وفرق امن مركزى زى زمان بتجرى وتلوش بالعصيان والناس بتدى بالحجاره
المهم خدت ساتر واتصلت بصديقى نزل جرى مكنش سامع علشان مقفل ومشغل التكيفات
خدنا عربيته وطيران واحنا ماشيين عربيات الامن المركزى بدأت بالانتشار والناس بتقول فى مصابين بس انا ماشفتش
وعقبال ما فكوا الحصار رحت جبت مراتى والاولاد وماشى من ش القصر العينى ولقيت العيال بتعيط جامد انا فاتح الشبابيك والاقى نفس مش شايف وعيونى نار اتارى الغاز اشتغل ولقيت فرق الامن عماله تضرب غاز
بعرض ش القصر العينى والشيخ ريحان تجاه الميدان
زى يوم 25 و 28 يناير بالضبط
والضباط مستخبين فى سواتر مجلس الشعب والسفارة الامريكيه وبيشاوروا اننا ندخل من ميدان سيمون بوليفار طبعا انا قفلت الشبابيك وطيران على الكورنيش
بس انا اتغاظت جدا علشان رجعت ريما لعادتها القديمه