الموضوع: شرح مبسط لكيفية تسقيط النقلات ومعناها ! !

السلام عليكم

كتير بندخل على مواضيع سواء كانت مواضيع عادية او مواضيع شد وجري ونلاقي صاحب الموضوع كاتب انه كان ماشي عادي وهوووووب راح مسقط نقلة وفتح

فيه ناس مش عارفة يعني ايه تسقيط نقلات او ليه لما بنسقط نقلة العربية بتسحب بطريقة احسن واقوى

وبصراحة انا كنت واحد من الناس اللى مش عارف تسقيط النقلات بيخلي العربية تسحب بقوة ليه لحد فترة قريبة جدا واكتشفتها من خلال بعض التجارب في العربية عندي وحبيت انقل لكم تجربتي واللى فهمته من الموضوع

وطبعا لو في اي حاجة او معلومة غلط اتمنى من الخبراء تصححها عشان محدش يوصله معلومة غلط

الموضوع بإختصار

لما بنكون ماشيين بطريقة عادية وهادية المفروض اننا بنريح الماتور في الغيارات وبتنقل عند rpm قليل وتلاقي نفسك مثلا ماشي على سرعة 70 وانت مدي الغيار الرابع او الخامس

وده بيريح الماتور وبيوفر في استهلاك البنزين وبيطول فترة عمر الماتور لانك مديله غيراته براحته وبدون مشاكل

ونفس الحالة بالنسبة للعربيات الاوتوماتيك لو ماشي براحة ومن غير قرص هتلاقي الماتور بينقل بدري عشان يوفر استهلاك البنزين ويطول عمر الماتور

طيب معروف ان كل عربية بتتكون من اربع او خمس غيرات سواء اتوماتيك او مانويل لو افترضنا اننا ماشين قرصين من الغيار الاول

يعني حارق على الغيار الاول والتاني والتالت الى اخره

هتلاقي مثلا على سبيل المثال عندي في الياريس لما بكون حارق الاول ممكن يوصلني ل 45

التاني = 85-90

التالت = 130-140

والرابع للاخر طبعا العربية مكونة من اربعة غيارات فقط

طيب ده كلام جميل جدا

هنفترض بقى اننا ماشين على سرعة 70 وبراحة والماتور واخد الغيار الرابع ومافيش اي مشاكل سعتها هيبقى ال Rpm عند 2.5 تقريبا لانك مريح الماتور ومديله غيار عالي على سرعة قليلة

وهووووووب مرة واحدة حبيت تجري << ايوة تجري بمعنى تجري

لو دست بنزين جامد هتلاقي ال Rpm بدأ يعلى من الفين لفة في الثانية الى تلت الاف بعدين اربعة وخمس وهكذا

ومعروف ان كل مازاد عدد لفات الماتور في الثانية ده هيزود السحب وهيزود القوة الى غير ان كل عربية المفروض اقصى عزم ليها واقصى قوة بتطلع مثلا عند عدد لفات 5500 مثلا

طبعا بتختلف من عربية للتانية وفيه عربيات بيطلع اقصى عزم عند عدد لفات اقل

طيب ده كلام جميل كنت ماشي 70 ودوست بنزين وال Rpm بدأ يعلى فعلما توصل الى عدد لفات كبير يمكنك من ان انت تخرج اقصى عزم للماتور ده هياخد وقت في التجميع شوية

افترض اني ماشي حارق من الاول وبعدين جبت التاني وحرقت علما اوصل لسرعة 70 وانا حارق على التاني هيكون ال Rpm سعتها مثلا وصل ل 4.5 ولا حاجة

طيب كلام جميل نرجع للمثال بتاعنا اننا ماشيين على 70 وعلى الغيار الرابع وهوب رحت مسقط للتاني

سرعة 70 دي في الغيار التاني بتكون عند Rpm عالي لانه اخر الغيار بالتالي انت كدة بدل ماهتبدأ تدوس على البنزين وتعلي عدد لفات الماتور من الفين لفة الى تلاتة الاف وبعدين اربعة الاف

لاء انت سقطت نقلة وبمجرد تسقيطك للنقلة خليت ال Rpm يعلى علطول لان السرعة اللى انت ماشي عليها دي في اخر الغيار وده نتيجته انك هتبدس تدوس بنزين على Rpm عالي يعني عدد لفات اكتر في الثانية وده نتيجته سحب اقوى بكتير

يعني بإختصار انت لما بتسقط نقلة بتعلي ال Rpm وبالتالي هيديلك سحب وعزم اقوى

طيب بس لازم في نقطة نبقى عارفينها وواخدين بالنا منها ايه هي ؟ ؟ ؟ ؟

كل غيار اقصى سرعة ليه كام ؟ يعني على سبيل المثال لو انا الغيار التاني عندي اخره 80 وكنت ماشي 90 براحة ورحت مسقط للتاني كدة انا هبقى بحرق الماتور لانك سعتها هتدخل في الريد زون والسرعة دي مش موجودة في الغيار التاني اساسا

يبقى لازم قبل مانبدأ نسقط نقلات نكون عارفين كل غيار سرعته من كام لكام وقبل مافكر اسقط ابص بصة على السرعة اللى انا ماشي عليها واشوف السرعة دي موجودة في انهي غيار واقوم مسقط عليه علطول

سعتها هتحس بفرق جامد في السحب

طيب كلام جميل ويارب يكون مفهوم ومافيهوش حاجة غلط

دلوقتي لو حبيت اسقط نقلة هسقطها ازاي ؟

الموضوع بسيط

لو الفتيس مانويل هيبقى مافيش اي مشكلة غير انك تسيب بنزين وتدوس دبرياج وتنقل اكنك بتنقلة نقلة عادية جدا

بس لازم برضوا تكون واخد بالك من سرعتك ومن الغيار اللى انت هتنزل عليه

ايووووووووة عشان ماتحرقش الماتور لازم تاخد بالك

----

طيب لو الفتيس اوتوماتيك

الفتيس الاوتوماتيك بيبقى مبرمج كومبيوتر انه بيطلع سحب وعزم للعربية على حسب قوة دوستك على دواسة البنزين

بمعنى لو انا بدوس براحة الكومبيوتر هيفهم انك عايز تمشي براحة وهينقل بدري عشان يريح الماتور ويوفر استهلاك البنزين

طيب لو انا حارق ودايس جامد سعتها الكومبيوتر هيفهم انك عايز تسوق سواقة رياضية وعايز تطلع اقصى عزم للماتور بالتالي هتلاقي الماتور بدأ ينقل عند Rpm عالي عشان يديلك سحب اقوى وطبعا ده بيعتمد في الاخير على قوة الدوسة بتاعتك

طيب كلام جميل جدا لو انا ماشي هادي وحبيت احرق مرة واحدة ؟ ؟ ؟

الفتيس الاوتوماتيك فيه حاجة اسمها Kick Down او كيكاية بالمصري

ودي معناها اني اجيب اخر دواسة البنزين واسم كيك داون ده جاي لان العربيات العالية بيكون فيه زرار تحت دواسة البنزين لما بتجيب الدواسة للاخر بتدوس على الزرار ده والزرار ده حاجة كدة زي الاوفر دريف معنديش معلومات عنه كتير غير انه مش موجود الا في العربيات العالية زي البي ام والاودي والكلام ده

لكن ده مش موجود في العربيات بتاعتنا على حد علمي ومن هنا طلع مصطلح كيكاية

نرجع لموضوعنا

لما اكون ماشي براحة وحبيت احرق هدوس الدواسة للاخر الكومبيوتر هيفهم انك عايز تجري هيقوم بشكل اتوماتيك لوحده مسقط على غيار مناسب وهيحرق عليه

يعني الموضوع في الاتوماتيك بيكون ابسط وبيحصل لوحده لكن لو انت اللى سقط بنفسك هيديلك عزم اقوى وسحب اكتر

طيب اسقط بنفسي ازاي ؟؟؟

برضوا الموضوع بسيط لو الفتيس استيبترونك هتجيب الفتيس على المانويل وتنزل العصاية لتحت مرة او مرتين على حسب عدد النقلات اللى انت عايز تنزلها

وبرضوا لازم ناخد بالنا من السرعة ومن الغيار اللى هننزل عليه

---

طيب لو الفتيس اتوماتيك عادي ؟ ؟ ؟ ؟ ايوة هنا فيه مشكلة

هي مش مشكلة ولا حاجة وبرضوا حاجة بسيطة

الفتيس الاوتوماتيك العادي بيتكون من P , R , N ,D , 3 , 2 , L

طيب معروف اننا لما بنسوق بنكون جايبين على D

طيب لو حبيت اسقط نقلة هيكون كل اللى عليك انك تسيب بنزين وتحرك عصاية الفتيس الى 2 او 3

2 = لو حبيت تنزل على الغيار التاني

3 = لو حبيت تنزل على الغيار التالت

بس لازم تاخد بالك من السرعة اللى انت ماشي عليها اييييوة عشان تسقط على غيار مناسب

وبعد كدة تخلي بالك ان الماتور مش هينقل لوحده لانك خليته على وضع المانويل بالتالي لازم بعدها لو فرضنا اننا سقطنا على التاني يبقى تاخد بالك قبل ماتدخل على الريد زون تكون شلت رجلك من البنزين وحولت الفتيس الى 3 او D

-------------

دي كانت تجربتي لتسقيط النقلات وحبيت انقلهالكم اتمنى يكون الشرح واضح وطبعا الاخطاء واردة فلو في حاجة غلط اتمنى تصحيحها

وللامانة انا مش عارف بصراحة اذا كان موضوع تسقيط النقلات ده بيأثر على الماتور و الفتيس او لا ! بالذات الاوتوماتيك العادي

فلو حد عنده خلفية ياريت يفيدنا عشان نطمن