الموضوع: طبيبة نساء و توليد

المشاركة الأصلية كتبت بواسطة kamalantivirus

بغض النضر عن رغبتك الشخصية في اختيار الطبيبة التي يجب ان تحترم انا عاوز اسال عن سبب وجود اشخاص تشعر بالخجل من الدكتور الذكر و لعلم حضرتك مافيش دكتورة تقدر تنزل في نص اليل علشان مريض و الدين يسر و ليس عسر

ليه بس كده ياباشا

انا عن نفسي الولادة في المرة الأولى كانت الساعة 6 الصبح والدكتورة كانت معانا من الساعة 2 بالليل وكان عندها ولادة قبليها على طول كمان

والمرة التانية كانت الدكتورة مسافرة مطروح وكانت هية عاملة لنفسها أسبوع إجازة للمصيف المفروض مافيهوش مواعيد ولاده حسب ماهية مقدرة في الجدول بتاعها وكان المفروض الميعاد بتاعنا بعد الأسبوع ده فعلا بس شاء الله العلي القدير ان الولادة تيجي بدري قبل ماهي تنزل من مطروح بيوم لما كلمناها في التلفون نزلتلنا مخصوص وكانت متابعانا طول طريق السفر وجت من طريق السفر على المستشفى على طول

برغم ان هي أصلا خلال الأسبوع ده كانت مديانا رقم دكتورة تانية زميلتها عشان نروحلها لو حصل حاجة طارئة

وطبعا مافيش حاجة إسمها اني جاي في معاد مش معادي عشان الفلوس اللى دافعها على قد الزيارة مرة كل 3 أسابيع ايه العبط ده ... أولا الزيارة كانت مرة كل أسبوعين ولو روحتلها على حاجة إستثنائية انشالله عشر مرات في الأسبوع عمرها ماكنت تقول حاجة بالعكس دايما ليطفة المحيا بسيطة الكلام وعارفة وفاهمة شغلها كويس ومتمكنة من مهنتها

وفوق كده الكشف بتاعها كان بـ 15 جنيه ايام ماكنت بروح (دلوقتي تقريبا بـ 25) والناس ماكانتش بتخلص من عندها تقريبا كانت بتروح كل يوم الساعة 2-3 بالليل

وبصراحة انا رأيي ان الموضوع راحة نفسية في المقام الأول وبعد كدة بقى ييجي تقييم الدكتور من الناحية الفنية وهل متمكن من مهنته وماهر فيها ولا لأ


وده اللى عملناه لما كنا بندور على دكتورة في الأول روحنا لكذا واحدة ومن أول كشف وحياتك ماعتبناش عيادتها تاني وروحنا لواحدة تانية كانت كويسة في المعاملة بس يعني حاسينا انها لسة بتتعلم شوية أو كانت مش ماهرة قوي لغاية ماعرفنا الدكتورة دي ... وده الأسلوب اللى بنصحك بيه فعلا لأن ممكن يكون فيه دكتورة انا شايفها كويسة في المعاملة انت تشوفها غير كده