العربية جابت جوان وش سلندر و بعدها مبقتش مظبوطة .. ايه السبب يا رجالة ؟

**hhnnaayy** · 01-07-2011 07:08 PM

السلام عليكم و رحمة الله و بركاته

معلش يا جدعان انا هحكيلكم القصة من الاول و باختصار على قد ما اققدر عشان احاول اوصل ايه اللي حصل بالظبط عشان تقدروا تساعدوني
انا معايا عربية كيا شوما موديل 2000 كانت زي الفل مفيهاش اي مشاكل لغاية ما في يوم التكييف لاقيته بيعلق
فروحت للكهربائي قعد يشيل فيوزات و يحط فيوزات و فك الطابلوه كله و في الاخر قالي دى مشكلة في الدفيرة او علبة الفيوزات نفسها المهم مشيت على اتفاق ارجعله يوم الاتنين عشان الاحد مفيش حد فاتح
يوم الاحد العربية سخنت مني جامد جدا وانا في طريق صحراوي و رايح الشغل طبعا وقفت بيا في الصحرا و جابت جوان وش سلندر
روحت للميكانيكي تاني يوم غير الجوان و ترموستات كوع المية بتاع الموتور بعدها العربية على السلانسيه لاقيتها بتفصل
اهدي عشان مطب تبطل ارجع مرشدير تبطل اجيب العجل اخر يمين او اخر شمال تبطل
رجعت للميكانيكي قالي دة طبيعي عشان الصبابات مبقتش مريحة زي الاول و هتظبط مع الشغل و كلام غريب كدة
المهم روحت لكهربائي تاني عشان قصة التكييف قالي الفيوزات مش محطوطة في مكانها و ظبط التكييف
اشغل التكييف على السلانسيه العربية تبطل و بعدين الاقي عداد الار بي ام يعلى و ينزل مع نفسه
فطبعا العربية بقت متبرجلة و مش زي الاول خااااالص و انا مش عارف دة عيب ايه بالظبط
يا ريت يا جماعة تفيدوني في العيب دة و الف شكر و اسف على الاطالة

**mrastra** · 02-07-2011 09:37 AM

السيارة انجكشن ولا كربراتير

**hhnnaayy** · 02-07-2011 03:21 PM

العربية انجكشن

**medododo** · 02-07-2011 03:38 PM

متابع بإهتمام

**HotRide** · 02-07-2011 03:58 PM

طيب بص
في خرطوم اسمه vacum ده بيركب علي intake انا شاكيك انه مش راكب
او الايلدر فيشته مش راكبه او عايز يتفك و يتنضف

**hhnnaayy** · 02-07-2011 05:13 PM

طيب معلش ممكن تشرحلي الكلام دة شوية عشان ابقى فاهم هروح اققول ايه للميكانيكي

**ABO_MAREM** · 02-07-2011 05:32 PM

روح لواحد غيره احسن

**hhnnaayy** · 02-07-2011 05:55 PM

شكلي هعمل كدة بس المشكلة اني شغلي في الغردقة و دي اول مرة احتاج ميكانيكي وانا هنا و معرفش ميكانيكي محترم او مفيش اصلا

**alzelafy** · 03-07-2011 03:12 AM

مشكله كهرباء او ميكانيكا انزل الحرفيين و انهى القصه دى

**elewey** · 03-07-2011 03:13 AM

المشاركة الأصلية كتبت بواسطة hhnnaayy

طيب معلش ممكن تشرحلي الكلام دة شوية عشان ابقى فاهم هروح اققول ايه للميكانيكي

بص يا باشا الايدل دة حساس حتلاقة موجود تحت الكربارتير كدة و ليه فيشة و دة فايدة كله انه بيعلى الار بى ام بتاع العربيه لما تسخن الصبح مثلا او تشغل التكييف و كدة و من اعراض تلفه انك تلاقى الار بى ام بيقعد يطلع و ينزل و دة الحل بتاعة انه يتفك و يتنظف او يتغيير و خلى بالك لو الميكانيكى كان فكه قبل كدة لازم يعمله ايدل ليرن