ارجوا من الاخوة الاعضاء ابداء ارائهم بخصوص سرفيس الباور و الفرامل متى يتم تغيير الزيوت و هل عدم تغييرهم لمدة طويلة يؤثر بأي شكل من الاشكال ؟ و لسيادتكم جزيل الشكر
عرض للطباعة
ارجوا من الاخوة الاعضاء ابداء ارائهم بخصوص سرفيس الباور و الفرامل متى يتم تغيير الزيوت و هل عدم تغييرهم لمدة طويلة يؤثر بأي شكل من الاشكال ؟ و لسيادتكم جزيل الشكر
زيت الباور يقال انه بيتغير كل حوالي 30 أو 40 الف كيلو أنا مع فكرة تغييره مع السيرفيس الكامل كل 45 ألف لو عندك زيت باور احمر فا اعمل حسابك اني الطرميه حتودع وغيره يا بزيت اخضر بتاع فولكس او زيت ابيض امريكاني
بالنسبه لزيت الفارمل فا لازم تتأكد أني اللي عندك DOt 4 لاني ال 3 مش بيمشي مع عرياتنا وبيخرب الفرامل تماماً بالنسبه لتغييره انا مع فكرة تغييره مع كل تغيير تيل أمامي في ناس بتسيبه وتزوده بس وأحسن نوع Ate وده اللي بتنصح بيه فولكس العلبه ب 30 جنيه
بالنسبة لزيت الباور لازم طبعا يتغير كل فترة بس مش عارف كام كم بس ممكن كل 30,000 زي معظم الزيوت
ودي علبة زيت شوفتها ب 50 جنيه عند واحد بتاع قطع غيار فولكس
http://www7.0zz0.com/2011/07/03/10/657409403.jpg
وبالنسبة لزيت الفرامل يستحسن طبعا Dot4 ودة هتلاقيه مكتوب في الكتالوج وعلي خزينة الباكم نفسها
انا أشتريت شل ب 15 جنيه وحطيتها كلها
بس طبعا قبل ما تغير زيت الفرامل لازم تسحب كل الزيت الموجود او تنزله من المساتر
وبعد كدة تحط زيت Dot 3 عشان تنظف بيه وتنزله هو كمان من المساتر (عشان يغسل الخراطيم والمساتر والأنابيب)
وتفك الخزينة (علي كلبسات) وتغسلها كويس بالماء وتسيبها تصفي ميتها وتنشفها كويس (ممكن تسيبها في الشمس لمدة ساعة)
وبعد كدة تحط الزيت الجديد
وعموما بيتغير كل سنتين بحد اقصي او 60,000 كم
ويجب ايضا تغيير زيت الفتيس وليكن مع زيت الفرامل
وحاول تجيب 75W/ 90 ودة الي بتوصي بيه فولكس في عربياتها
احتمال مش تلاقيه
بس هتلاقي 80W/90 اعتقد ممكن يوفي بالغرض
والله المستعان
،
،
اياك تغير زيت الباور بره التوكيل .. هتندم .. أنا دفعت 1500.. بسبب تغيير زيت باور خارج التوكيل بالزات .. ليه .. كانت عندى الاسكاترا اتخبطة ورحت غيرتها المهم الراجل العفشجى حط زيت أحمر من العادى .. وطبعاً طرنبة زيت الباور .. اترمت فى الزباله على طول .. وطبعاً كان لازم أغير الزيت .. المهم غيرت الطرنبة وجبت الزيت الابيض اللى موجود فوق ده .. ودى كانت الغلطة الثانية اضطريت طبعاً أحط أكثر من علبه لعل وعسى الاسكاترا تنضف وبعدين الراجل بتاع قطع الغيار قالى الزيت ده تقيل وجابلى طرنبة من عنده ولقيت فعلا ان زيت الباور بيكون خفيف ولونة أخضر عامل زى المايه .. ريحت دماغى ورحت التوكيل وخليتهم يغيرولى زيت الباور مش فاكر حوالى 160 جنية وجبت كمان شويه حركة 0.5 ليتر وأنا جاى .. وعلى فكرة برده كانت طرنبة الزيت والاسكاترا بأو أى كلام .. بس أنا ماشى بيها وخلاص.. ودى تجربتى وانته فى الآخر القرار قرارك
ميشو.. انا مش قصدى .. انا كنت بوضح بس تجربتى .. ونصحتى ليكم .. بلاش زيت باور من أى مكان غير التوكيل .. بيجى عندهم فى براميل كبيرة كدة .. وهو خاص بسيارتهم فقط .. والراجل فى التوكيل قالى مش موجود فى أى مكان آخر ... وبعدين مش فارق قوى فى السعر .. لوجيت تغير زيت كامل من الابيض ده النصف ليتر ب 50 جنية تقريباً وزيت الباور بالكامل حوالى ليتر وربع أو يمكن ليتر واحد فقط مش فاكر .. يعنى ثمنهم برة التوكيل بدون التغيير 100 جنية وأنا بقولك فى التوكيل بحوالى 160 شامل تغيير الزيت بالكامل ومصنعية كمان .. وقبل ما تعمل أى حاجة اسأل عن التكلفة وبعدين غير ..
انا شوفت الزيت الاخضر كذا مره عند الميكانيكي الي بتعامل معاه بيكون في علبه بيضه ومحطوط عليها ختم فولكس واودي والكتابه بالاخضر وانا شغال بالزيت الابيض الامريكاني ماركة ( جانك ) العلبه ب 45 جنيه وشغال بيه بقالي سنتين دلوقتي التاني عامل 100 بس للآسف مسألتش على مكان بيع الاخضر حبقه أسألكم إن شاء الله اخلص أمتحانات بس
وبالنسبه لزيت الفرامل انا باكد تحذير للمره التانيه من Dot3 انا مره كان حيحصلي كارثه وربنا ستر بسببه تاني يوم أشتريت العربيه وأكتشفت اني الراجل كان حاط دوت 3 من علبة الزيت اللي كان ناسيها في شنطة العربيه
ياجماعة انا جبت عربيتي عاملة 85 الف كم و دلوقت عاملة 176 الف كم و مغيرتش الزيوت دي خالص ياترى حيكون حصل حاجة فى العربية و ازاي واحد زي م / هاني رايح جاي عليه بقالي اكتر من سنتين و عمره ماجابلي سيرة الموضوع دة ربنا يستر و الله انا خايف لايكون حصل حاجة انا هاغير الزيت ضروري فى اسرع وقت
انت قصدك توكيل العبور ؟ و ممكن تقولي التوكيل بحجز و لا لأ لموضوع زي دة و ممكن اروح امتى احسن ميعاد انا روحت التوكيل دة مره واحد فى حياتي فى عام 2008 كنت لسه شاري العربية و عايز اعملها سرفيس كامل لعنت اليوم ال جبت فى العربية دي اصلا و لولا م / هاني بجد كنت بعت العربية من تاني اسبوع جبتها
حرام يعني انك تروح التوكيل عشان تغير زيت باور ده انت ممكن تعملها في الجاج أو تحت البيت العمليه مش مستاهله توكيل شوف انت بتتعامل مع اي ميكانيكي وقوله عايز اغير زيت الباور وخد معاك علبة الزيت وخلصت الحكايه
حضرتك في جدول صيانة لازم تمشي عليه
كل 7500 كم
تغير زيت الموتور (مكتوب كل 15,000 ولكن الأفضل علي نص المسافة)
كل 15,000 كم
الكشف علي تيل الفرامل الأمامية
كل 30,000 كم
تغيير البوجيهات (3 شمعة)
تغيير فلتر التكييف (الأتربة والغبار)
الكشف علي مقياس زيت الفتيس
كل 60,000 كم
تغيير فلتر الهواء
تغيير فلتر البنزين
كل سنتين (بغض النظر عن ال كم)
تغيير المبرد (مياة الردياتير)
تغيير زيت الفرامل
الكشف علي انبعاثات الشكمان
زيت الموتور بيتغير علي حسب الزيت نفسه في زيت بيمشي 5000 واخر بيمشي 10,000
زيت الفرامل (Dot4) بيتغير كل سنتين او 60,000
زيت الباور (الزيت الأبيض مش زيت فتيس اوتوماتيك) والفتيس (75w/90) نفس الموضوع كل سنتين او 60,000
الفلاتر كمان لازم تتغير
فلتر الزيت (كل 30,000 والأحسن لو كل 15,000)
فلتر البنزين (سبق ذكره)
فلتر الهوا (سبق ذكره)
فلتر التكييف (سبق ذكره بأسم فلتر الأتربة والغبار)
اهتم حضرتك بعربيتك اكتر من كدة شوية
والله المستعان
،
،
انا مقصدش طبعا اقول انك بتهمل عربيتك
لسبب ان الي يركب فولكس وكمان يشترك في المنتدي دة اكيد بيهتم بعربيته
بس حضرتك انا اقصد التزم بمواعيد الصيانة وتغيير الزيوت والفلاتر
انا شخصيا كنت بعمل زيك كدة بس في عربية لادا
يعني لو حطيت زيت قلية بتاع التموين هتمشي زي العسل
بس من اول لما ركبت فولكس واشتركت في المنتدي دة لقيت نفسي بفكر في حاجات مكنتش بهتم بيها اساسا
ربنا يباركلك فيها
وانا تحت امرك في اي استشارة والناس هنا في المنتدي الصراحة كلهم متعاونين جدا جدا
والله المستعان
،
،