أنا معايا ميتسوبيشى 1800ِِcc من 0 إلى 100 فى حوالى 9 ثوانى
طوال عمرى بجيب بيها لحد 210
أخر مرة جربت مش راضية تعدى 180
مع العلم أنا مركب eridum $ K&N $ SuperSprint Exhauster
هو فى حاجة بتعالج التوب سبيد ؟؟؟؟؟!!!!!!!!
عرض للطباعة
أنا معايا ميتسوبيشى 1800ِِcc من 0 إلى 100 فى حوالى 9 ثوانى
طوال عمرى بجيب بيها لحد 210
أخر مرة جربت مش راضية تعدى 180
مع العلم أنا مركب eridum $ K&N $ SuperSprint Exhauster
هو فى حاجة بتعالج التوب سبيد ؟؟؟؟؟!!!!!!!!
ماشاء الله انت متأكد ان العربية مافيهاش جناحات ؟؟؟؟؟انا بس ليا سؤال بتجيب ال 180 في انهو طريق في مصر تحياتي
بجد انت شكلك بتهزر
انا لما عربيتى بتجيب ال120 ببقى فرحان قوى
i think having a sport filter and things like that that increase your power horse, it deceases your full speed
I'm just guessing not a pro, i think i read sth like this b4 here in the forum
جايز الطريق كان مطلع والهوا عكس اتجاهك
فى اية يا جدعان انا ليا أصحابى بيجيبو 200 وليا واحد صحبى جاب 240 بالمرسيدس
عادى ياعنى
هو الموضوع قلب حقد علي الراجل كده ليه :)
يا ريت حدي يساعده في المشكلة دي
و ابقا خلي بالك من نفسك يا خالد باشا ;)
الـ Exhaust System اللي انت مركبه مصمم للعربيه؟ ممكن يكون هوا السبب
طب انت بقالك فترة عندك المشكلة دي ؟؟؟
يعني متكررة و لا مرة و عدت او ايام وايام ؟؟
لأن ممكن يكون السبب :
تفويلة مش قد كده
وساخة (تراكم) في مجرى الوقود بيمنع التدفق المطلوب (بس ده هايبان في السحب)
او فعلا رياح معاكسة
أو حالة الكاوتش اتغيرت
يعني شيك على الحاجات دي لأن العيب هايكون بسيط
و خلى بالك من نفسك
في احتمال انك ماتكونش مركز وانت بتسوق
مافكرتش لو حصلت اي حاجة وانت ماشي بالشكل دة هاتكون النهاية اية !!!
ربنا يهديك
المحرك صغير نسبيا و عشان كده أعتقد انو ال210 هى الى كانت استثناء و ال180 هى السرعة الطبيعية!!
بص على السرعة القصوى فى الكتالوج, و غالبا مش هتتعدى ال180, و كويس اوى انها بتوصل 180, بعد ال180 مشفتهاش فى أى عربية سوى المرسيدس و البى ام مش عشان حاجة لكن عشان محركاتهم كبيرة.
بص ياباش اكشف على الاسطوانه و الديسك و غالبا دي تكون اسطوانه
شوف استهلاك البنزين شوف صوت العربيه شوف العربيه عامله ايه في المطالع و الحموله الدبرياج بيفصل على العالي
يا عم احمد ربنا انها بتجيب 180 كم
صديقي العزيز أولا النصيحه بعدم السرعه مش علشانك ولكن علشان خطأ الغير تقدر تتفاداه أما بالنسبه للمشكله دي فتكمن في الصيانه بالنسبه للسيارات الحقن الالكتروني اعمل صيانه على الاتي فلتر الهواء فلتر البنزين طلمبة البنزين طقم البوجيهات الصيانه الصيانه وبلاش موضوع السرعه
مع اني ضد السرعه بتاتاً وخصوووووووووووووووصا جوا مصر لان مفيش ولا طريق يساعد و اقل مشكله مش هتلاقي لا الوقت و لا مساحه انك تناور بالعربيه بتاعتك لتفادي اي شئ لا قدر الله ...
بس انا هقولك للعموم
اول حاجة الكوتشات اتأكد من الضغط الداخلي وانه متوزع على العربيه ككل بالتساوي و اتأكد من الميزانيه لان في بعض العربيات ال ECU بيعمل بلوك لزياده السرعه علشان يمنع العربيه ككل من دخول دايره رنين ممكن تخلي العربيه تتفكك في السرعات العاليه
اتأكد من انظمه الحقن وده عن طريق سائل منظف (نوع معين مش فاكره) بيتحط مع البنزين
الفلاتر برضو بتكتم العربيه و بالتالي بتقلل من السرعه القصوى ... غيرها او نظفها ..
شوف اتجاه الهوا و شوف وزن العربيه الاجمالي (حاول تقلل وزن العربيه عن طريق انك متعبيش التنك على الآخر) ..
نصيحه لوجه الله عن تجربيه ليا ربنا سترها وكنت ماشي وقتها على 150 والعربيه مشيت بعرض الشارع في الامارات (ولاحظ الامارات ... يعني شوارع نظيفه وواسعه جدا و كوتشات نظيفه ).... اللعب في في السرعه في الالعاب زي NeedForSpeed حاجة و الواقع حاجة تانيه خااااااالص ... العربيه بمجرد ما تفقد السيطره عليها ... يبقا تنسى تماماً انك تعرف تلمها إلا لو ربنا سترها معاك .... الغلطه ممكن تقعدك على كرسي بعجل طول حياتك تترجى الناس انهم يمشوك من مكان للتاني
ربنا يسلم طريقك
تحياتي
يا جماعة السرعة المناسبة لأي مكان في العالم بسيارة مهما كان نوعها لا يتعدى 100 كم / س و ساعة لما نقول الراجل ده مخاطر يبقى 120 كم / س
إنما أعلى من كدل يبقى أسمه أنتحار و قتل غيرك بالخطأ
هي الناس مش بتتعظ ليه من الحوادث اليومية على الطريق
210 كم /س
180 كم / س
ليه هي حلبة فورميلا .؟؟؟؟
و عموما ربنا يهدينا جميعا إن شاء الله
و خلي بالك يا أستاذ خالد علشان ترجع إن شاء الله سليم لأهلك و برضه غيرك من زملاء الطريق يرجع سليم لأهلة
و في التآني السلامة و في العجلة الندامة
و العجلة من الشيطان
و ربنا يهدينا
إنت كنت بتجيب 210 من امتى ؟ وارد جداً إن الموتور مبأاش بنفس كفائة زمان عشان عوامل كتير منها الإحتكاك عبر الزمان وبردو جايز يكون الطريق الجبة فيه 210 غير الطريق الإنت كنت ماشي فيه ومش عرف تعدي 180 وحتى لو نفس الطريق جايز ال-210 أنت كنت في منزل شوية عن الحتة الجبت فيها 180 بالعافية وجايز حتى لو نفس الطريق والحتة بظبط جايز إتجاه الهوى غير لما كنت جبت ال-210
يا باشا ربنا يسترها معاك ومعانا بجد والله هو احنا لازم نستنى الحادثه علشان نتعظ .في التأنى السلامه وبحسبه بسيطه تقريبا انت لو ماشي على سرعه 180 كم/ساعه يعنى بتقطع كل 100 متر في 2 ثانيه انت عارف ايه الى ممكن يحصل في 100 متر أكيد مش هتقدر تلحق في ثانيتن ربنا يسترها معاك برضه وخد الصورة ديه يمكن تتعظ تفتكر السواق فين ؟؟؟؟؟؟؟؟؟!!!!!!!!
http://www6.0zz0.com/2008/05/02/21/986715351.jpg
لو سمحتوا انا عايز اعرف ايه نوع منظف البنزين اللى احطه اولا
ثانيا عايز اعرف هل فلتر البنزين لو اتسد يضعف سحب العربية ولا لأ؟؟؟
ياريت الرد ضروري على السؤالين دول من فضلكوا لان العربية تحت رجلي مختلفة جدا حاسس انها تقيله جدا وسحبها تقيل واستهلاك البنزين كتير وشكرا جزيلا
طب دي اعراض اسطوانه و ديسك
للأسف بعض الناس لا يتعظ فى الوقت المناسب
سيب العربية آخرها 180 الله يكرمك وما تقعدش تجرب تزيد عن كده ، جرب تقلل عن كده وإرحم نفسك من العاهات والإصابات والكوارث وإرحم غيرك من نفس القصة، والعاقل اللى بيتعظ قبل المشكلة ، إنما اللى بيصحى بعد المشكلة رغم النصح يبقى .....
السرعه ليها مخاطر لا يعرف مداها الا الله فلا داعي للسرعه من غير سبب سوي المتعه فقط فحافظ علي حياتك
شكرا جزيلا على رد حضرتك
بس انا كنت عايز اعرف اجابة السؤالين دول ضروري لاني رايح التوكيل لو سدد الفلتر يضعف السحب اغيره لان من كام يوم جيت اشغلها الصبح ولا رضيت تشتغل ولما اشتغلت فضل الموتور يترعش ومكنش مضبوط خالص ولكن بعد فترة رحت المشوار بيها كده وانا راجع بدأت تتضبط لحد ما اضبطت تمام فرحت للميكانيكي قالي ده رواسب بنزين فغالبا الفلتر اكيد يهبقى فيه رواسب فهل الرواسب دي تضعف سحب العربية؟؟؟
وايه نوع منظف البنزين اللى اجيبه واستعمله واجيبه منين؟؟؟
ياريت الاجابة على السؤالين دول وشكرا جزيلا
بالنسبة لمنظف لرشاشات هتلاقية بيتباع فى البنزينة انا بجيبة من موبيل ب 22 جنية انت بس قول للراجل اللى فى البنزينة انا عاوز منظف رشاشات دة لو عربينك رشاشات اصلا وهو بيتحط كلة وتفول علية التانك ويا ريت بعدة تمشى مشوار طويل علشان يعمل مفعول سريع
موضوع الفلتر بقى ممكن تغيرة وتريح دماغك بواحد جديد
طيب هل سدد فلتر البنزين بيضعف سحب العربية؟؟؟
طبعا ..... لأن البنزين مش بيوصل بالطريقة المثالية للمحرك
فبيقلل من كفاءة الحرق الداخلي و بالتالي من كفاءة المحرك نفسه
و لو عربيتك كاربراتير أو رشاشات
فأنتمحتاج الأول تجرب تنظف اللي عندك قبل ما تغير فلتر البنزين
لأني أعتقد إن فلتر البنزين غالي شوية
على العموم فيه منتج أنا جربته كتير جدا و هو أكثر من رائع مع الرشاشات و أسمه رابيدوا
و تقريبا ثمنه 6 جنيه مصري و هو موجود في كارفور و موجود في بعض البنزينات
و من فضلك لا تشتري الأمريكي .... لا تُشجع منتجاتهم
رابيدو ده مصري و نتائجة بجد مُبهرة لو مشكلتك في الرشاشات بس أو الكاربراتير بس
و لكن لو فلتر البنزين مُشترك معاهم يبقى لازم يتغير
بس الأول جدرب تنظف الرشاشات أو الكاربراتير أولا
و شكرا
شكرا جزيلا للرد السريع ده
هي العربية رشاشات شاهين موديل 2006 وفلتر البنزين اعتقد انه مش غالي في حدود ال10 جنيه او 20 بالكتير وانا رايح بكرة التوكيل فغالبا هغيره وأرتاح
ولكن في منظف رشاشات ب22 جنيه في محطة موبيل مع العلم اني لفيت على رابيدو ملقتهوش فأجرب ده ولا ايه رأيكو؟؟؟
السلام عليكم
ياباشا انا مش هقدر افيدك فنيا
لكن انا عاوز انصحك لوجه الله بلاش السرعه الزايده دي
لانها سلاح ذو حدين
وربنا يسترها معاك ومعانا
طبعا السرعه ممكن تكون مدمرة وعلى رأي المثل امشي بالراحه توصل بسرعه
ربنا يسترها مع الجميع
انا شايف نمشي بسرعة:superman: و نموت (لا قدر الله .....فال الله و لا فالي ) و بكدة هنحل مشاكل كتير
1- عدد الناس هيقل ( مشكلة الذيادة السكانية ):evil1:
2- عدد العربيات هيقل ( مشكلة الازدحام المروري , الانبعاثات الضارة بالبيئة هتقل , استهلاك البنزين و بالتالي هنقلل من احتياجتنا من الوقود )
3- توافر بعض قطع الغيار من سيارات الحوادث
4- ملهاش لازمة 4
( كنت عاوز اكتب كلام هنا بس لقيت ملوش لازمة ..كلنا عارفين حال البلد ):banghead:
اما ليه مبتجبش فوق ال 180 فده ليه اسباب كتيرة
1- فلاتر ( البنزين + الهواء )
2-اطارات ضغطها مش مظبوط
3-تجنيط العربية بجنط اكبر من الاصلي
4-مكنتش بتنقل صح دي لومانيوال
احنا كده يامصريين راسنا ناشفه ومبنخدش عظه مما نراه ولازم نجربه بنفسنا . تلاقي الحوادث تريد مارك بنفس الطريقه يا اما عند تقاطع او عند التخطي في اللحظه الخطأ .
وتاني يوم تلاقي نفس الحادث وبنفس الطريقه سبحان الله.
ربنا يسترها معانا جميعا ومع صاحب الموضوع وربنا يهديه ويمش علي الأرض الهوينا فهذا من التقوي.
انتا ممكن تجيب اخر الخامس طبعا هايجيب معاك ال180 وتفضل عليه شوية صغيرين بعدها تنزل بيه لى 140 وبعدين تسقط رابع هايجيب معاك ال160 بعدين تحط الخامس وتجيب ال200
مش عارف ممكن تكون اسطوانه ولا ايه
على العموم
استنى رأى فلاينج بيجو ...
انا لاحظت انو من خبراء التعديل هنا
يا رااجل حراام عليك.هون على نفسك.180 ايه بس,دا الواحد بيبقى ماشي على 80 وحاطط ايده على قلبه
طبعا فعلا وحشه
How Fast He Is Running
http://www.postimage.org/aVma2q0.jpg
http://www.postimage.org/Pq1mSsB9.jpg
http://www.postimage.org/aVmcv3S.jpg
http://www.postimage.org/aVmcK1J.jpg
http://www.postimage.org/Pq1mSF3S.jpg
http://www.postimage.org/aVmd7Z9.jpg
http://www.postimage.org/aVmdhXJ.jpg
http://www.postimage.org/aVmdJoi.jpg
http://www.postimage.org/aVmdYm9.jpg
http://www.postimage.org/Pq1mThZ9.jpg
http://www.postimage.org/aVmejOr.jpg