الموضوع: استاذ كريم منير عمل حادثة امبارح

قدر الله وما شاء فعل
ربنا يستر طريقك يا استاذ كريم وفى داهية العربية المهم انتا سليم

المشاركة الأصلية كتبت بواسطة karim_monir

السلام عليكم ورحمه الله
شكرا ليكم جميعا على اطمئنانكم عليا وربنا يديم المعروف
وشكرا انسة دينا على تبليغك الزملاء بس انا حقيقي مش فاكر اني رديت عليكي امبارح
بفضل الله عليا وعلى اولادي ان لسه في عمري بقية بعد اللي حصل امبارح
ومعذرة قبل اي شيئ اني قافل تليفوني لانه في الحادث اتدلق عليه نسكافية والميكروفون باظ والهاند فري في العربية ومش جايلي شجاعة انزل اشوف منظرها كدة
الاحداث بتروح وتيجي في دماغي مشاهد وتختفي
لاني اخدت خبطة في دماغي في الازاز اللي جنبي كسرت نضارة الشمس ولقيتها مكسورة بعدين في العربية
والحمد لله اني كنت رابط الحزام واما كنت طلعت من الازاز من عنف الصدمة
كنت ماشي على الدائري في مكان مش قادر افتكره
وكان في نقل تقيل قديمة راكنة على الدائري بتصلح كاوتش
وصاحبها مش مكتفي بالحارة اللي شاغلها لاء حاطط اقفاص فاضية في الحارة اللي جنبه
كانت ماشية قدامي لانسر حمرا وشاف الاقفاص فرمل جامد جدا
حسيت اني مش هاقدر اقف من غير مالبس فيه
رميت يمين شوية في الحارة اللي واقفة فيها النقل عشان المسافة للتوقف اطول شوية
وفرملت كنت هاقف ورا النقل وبلمح في المرايه الوسطي والجانبية لقيت صاروخ جاي عليا بسرعة رهيبة مش اقل من 120 مثلا
سبحان الله رميت شمال تاني في الحارة اللي فيها اللانسر لانها كانت بعدت شوية
وسمعت اقوى ارتطام سمعته في حياتي والعربية اتحدفت حدفة رهيبة
كانها اترفعت شوية من على الارض واتهبدت تاني ورغم اني كنت قافل الازاز ومشغل التكيف لقيت كل حاجة جوة العربية اتقلبت
وعفرة غريبة جوة العربية
بس العربية لسه في نفس الحارة وماشية سلانسية بعوجة
بحاول اركز لقتني عديت النقل اللي واقفة دي ووقفت بعدها بشوية بحاول اجمع في ايه
ونزلت اقف رجلي مش شايلاني كان مفيش ركب في ساقي
قعدت على السور الاسمنتي وشوية لقيت اصوات كتير ورا
جريت عليها
لقيت عربية شيفروليه دبابة رشقت تحت النقل
البية كان بياخد غرزة يمين فوق ال 100 كم عالدائري رغم ان النقل واقفة وعالية لازم تتشاف
عربيتة لغاية الكابينة رشق تحت النقل من ورا
وبيحاولو يطلعوهم
اعصابي سايبة ومتخيل لو مكنتش جيت شمال شوية كان زمانه دعكني في النقل وكان زماني انا اللي تحت النقل
(وما رميت إذ رميت ولكن الله رمى وليبلي المؤمنين منه بلاء حسنا إن الله سميع عليم)
لما شيفرولية الدبابة بعافيتها حصل فيا كدة
امال الملاكي بتاعنا الورق لما تيجي بين مطرقة وسندان بالشكل ده كان حصل فيهم ايه
طلعو السواق واللي جنبه بس متبهدلين
ورجعت لقيت عربيتي الجنب كله ضايع
الخبطة جت في الجنط الخلفي عوجتة وعوجت القنطرة كلها
والجنط الامامي برضه اتعوج
الاكصدام الخلفي بالباب بالرفر الخلفة بقو لوحة سيرالية
وبقيت جنب العربية كله راح في داهية
الحمد لله
مشاهد كتير لناس بتجبلي كف الراية وناس بتلم فلوسي اللي واقعة تديهالي
مشاهد متداخلة لحاجات كتير برتوح وتيجي
موبايلي وناس بتتصل وناس تسمع ومش فاكر برد وبقول ايه
زوج اختي كلمني هو واحمد قدورة مدير الورشة مين كلمني وجه خدني منين وانا العربة سوقتها و مشيت ازاي بالمنظر ده
تفاصيل كتير مش قادر اجمعها
الحمد لله انا بخير
وشكرا على اتصالاتكم ونعم الاخوة
اللهم لكم الحمد والشكر حمدا كثيرا طيبا

انا بقرأ كلامك ومش مصدق الحمد لله انك بخير ربنا كتبلك عمر جديد فعلا انا لسه شايف الموضوع حالا

وحاله الذاكره دى حتقعد يومين وتروح ان شاء الله لانى اتحطيت فيها قبل كده ربنا ميكتبها على حد بس ممكن تحلم باليل بحاجات من اللى حصلت
بجد الحمد لله انك بخير وان شاء الله العربيه ترجع زى الاول

الف سلامة عليك يا استاذ كريم .... وحمد لله على سلامتك

قدر الله ما شاء فعل ..... الحمد لله على كل شئ ...

فداك العربية وربنا يعوضك خير عنها .....